Emén kúkkún nengngin a kúna ewe étúét mi étútá seni ekkewe paip wóón osun eú watteen imwen fér pisek, nge mwirin an étútá a usun kuchu. Ena nengngin a ekieki pwe popun an wor ena imw pwe epwe kan fér kuchu. Lupwen emén kúkkún a eáni ena sókkun wewengaw, a tongeni atakirikir. Iwe nge, ach wewengaweiti och mettóch mi watte lamotan, a tongeni kkúú manawach. Áwewe chék, ika sia mwáálliló lón ach álleani taropween únnún och sáfei, a tongeni atoto watteen osukosuk mwirin.

Ach wewengaweiti och mettóchun lúkú a fen tongeni kon watte ngawan. Áwewe chék, ekkóch aramas ra wewengaweiti met Jesus a eáni asukul. (Johannes 6:48-68) Iwe rese kútta weweéchún met ra wewengaw wóón, nge ra fen likitaló meinisin minne Jesus a asukula ngeniir. A ifa me solapan!

Ka ákkálleani Paipel me kútta emmwen seni? A mmen múrinné ena. Iwe met, mi tongeni fis óm kopwe wewengaweiti och mettóch ka álleani seni? A fen fis ngeni chómmóng aramas. Sipwe ppii úlúngát mettóch aramas ra kan wewengaweiti.

• Ekkóch aramas ra wewengaweiti án Paipel erá pwe sipwe niwokkusiti are “niueiti” Kot. Ra ekieki pwe ena mettóch a wewe ngeni minne sia meefi ren och mettóch mi fókkun eniwokkus. (Än Salomon Afalafal 12:13) Nge esap ina met Kot a mochen chókkewe mi fel ngeni repwe meefi. Iei met a erá: “Kosap niuokus, pun ngang üa etuk, kosap pwal apilüküngau, pun ngang om Kot. Üpwe apöchökülok, üpwe pwal alisuk.” (Aisea 41:10) Iwe, ach sipwe niwokkusiti Kot a wewe ngeni ach sipwe meefi mwaar ren, me sipwe súféliti seni enletin letipach.

• Ekkóch aramas ra wewengaweiti ei wokisin: “Ren mettoch meinisin a wor ar fansoun. . . . A wor fansoun uputiu pwal fansoun mäla.” Ra ekieki pwe Kot a fen filatá ewe fansoun emén me emén aramas epwe máló. (Än Salomon Afalafal 3:1, 2) Iwe nge, ren enletin ekkena kapas ra chék fós usun minne a fiffis lón manawen meinisin aramas me ra pwáraatá pwe aramas meinisin ra kan máló. Án Kot we Kapas a pwal asukula pwe ach kewe kefil a tongeni attama are amwocha ránin ach manaw. Áwewe chék, Paipel a apasa: “Ach niokusiti ewe Samol mi Lapalap a alangatama manauach.” (Än Salomon Fos 10:27; Kölfel 90:10) Ifa usun? Áwewe chék, ach súféliti án Kot we Kapas epwe amwékútúkich ach sipwe ttii senikich únnúpuch, féffér mi limengaw, me metakkan, ekkewe mettóch mi pwal tongeni apwangapwangaaló inisich.​—1 Korint 6:9, 10.

• Lupwen ekkóch aramas ra kúna alon Paipel we usun ekkewe láng me fénúfan “repwe tala ren ekkei,” iwe ra ekieki pwe Kot epwe ataieló ei wesewesen fénúfan. (2 Petrus 3:7) Nge Kot a pwonei pwe i esap fókkun mut ngeni ei wesewesen fénúfan an epwe taló. Kot a “anükätiu fanüfan won longolongun kewe, pwe esap fokun mwökütüküt tori feilfeilachök.” (Kölfel 104:5; Aisea 45:18) Esap ei wesewesen fénúfan ena epwe taló, nge fen ei ótóten fénúfan mi ngaw, epwe unusen kataló usun itá nge epwe taló ren ekkei. Nge lupwen Paipel a néúnéú ewe itiitin kapas “ekewe läng,” nge esap lón kapas áwewe, a tongeni weneiti fán láng, are ewe leeni ekkewe fúú ra nóm ie, are ewe leeni Kot a nónnóm ie. Ekkena leeni meinisin resap taló.

Ekkena pwóróus asan ra affata pwe aramas ra kan wewengaweiti och pwóróus ra álleani lón Paipel. Nge pwata Kot a mut ngeni an epwe fis ena? Ekkóch neman repwe erá: ‘Ika Kot emén mi unusen tipachem me a silei mettóch meinisin, iwe a tongeni awora ngenikich eú puk mi kon fataffatéch epwe mecheres ngeni meinisin aramas ar repwe weweiti. Pwata ese féri ena?’ Ekieki ekkeei úlúngát popun pwata aramas ra wewengaweiti ewe Paipel.

1.   Ewe Paipel a ffér pwe ekkewe aramas mi tipetekison me tipemecheres le káé repwe weweiti. Jesus a apasa ngeni Seman we: “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate,” are semirit. (Lukas 10:21) A mak ewe Paipel lón ewe napanap chókkewe chék mi pwúng masouen letiper repwe weweiti ewe pwóróus lón. Aramas mi eáni ekiek mi lamalamtekia, ewe ekiek chómmóng me lein “ekewe mi tipachem me silelap” ra eáni, iir ra kan wewengaweiti ewe Paipel. Nge ekkewe aramas mi álleani Paipel mi eáni ekiekin “ekewe tipate,” iir kewe mi tipetekison me mwétéresiti le káé, a watteeló ar weweiti án Kot kapas. A ifa me tipachemen ach Kot le féri ewe Paipel lón ena esin napanap!

2. Ewe Paipel a ffér fán ásengesin aramas mi letip wenechar me mochen án Kot epwe álisiir le weweiti. Jesus a pwáraatá pwe a lamot ngeni aramas álillis ar repwe unusen weweiti met a asukula ngeniir. Ifa usun repwe angei ena álillis? Jesus a erá: “Ewe Soualilis, ewe Ngünmifel, Semei epwe tinato fän itei, epwe aiti ngenikemi ekei mettoch meinisin o achema ngenikemi meinisin mine üa fen ürenikemi.” (Johannes 14:26) Kot a awora ena “Ngünmifel,” are an na manaman mi fel, pwe epwe álisi aramas le weweiti met ra álleani lón Paipel. Iwe nge, Kot a amwéchú an we manaman seni chókkewe rese lúkúlúk wóón pwe epwe álisiir, ina popun fán chómmóng ra meefi pwe a weires ar repwe weweiti masouen Paipel. Ewe manaman mi fel a pwal amwékútú ekkewe Chón Kraist mi weweéchúti Paipel ar repwe álisi chókkewe mi mochen weweiti minne a apasa.​—Föför 8:26-35.

3. Ekkóch kinikin lón Paipel aramas repwap tongeni weweiti lón chék ewe fansoun a fich ngeni. Áwewe chék, Kot a ewisa ngeni ewe soufós Taniel an epwe makkeetiw eú pwóróus fán iten ekkewe rán resaamwo fis. Emén chónláng a ereni: “Taniel, kopwe tukumala ekei kapas, kopwe numala ewe puk o fötala tori fansoun sopolan fanüfan.” Ren fitepúkú ier mwirin ena, chómmóng aramas ra álleani ewe puk lón Paipel Taniel a makkeei nge rese wesewesen weweiti. Ren enletin, pwal mwo Taniel ese weweiti ekkóch ekkewe mettóch a makkeetiw. Fán tipetekison, a apasa: “Üa rong . . . , nge üsap weweiti.” Ló, ló, ló, aramas repwap weweiti án Kot kewe oesini Taniel a makkeei, nge epwe chék fis lón ewe atun mi kefil me ren Kot. Ewe chónláng a áweweei: “Taniel, kopwe feila, pun wewen ekei kapas epwe monomon o kaopola tori fansoun sopolan.” Nge ié epwe weweiti minne Kot a apasa? “Ekewe chon föföringau . . . esap wor eman leir epwe wewe, pwe chokewe chök mi mirit.” (Taniel 12:4, 8-10) Kot ese pwáraaló weween ekkóch mettóch lón Paipel tori ewe fansoun mi fich me ren an epwe pwári.

Nge met, mi wor ekkóch atun Chón Pwáraatá Jiowa ra wewengaweiti mettóch lón Paipel pún esaamwo tori ewe fansoun mi fich an epwe pwá weween? Ewer. Nge lupwen a tori fansoun án Kot epwe affataaló och mettóch, iir ra ekkesiwili minne ra weweiti. Ra lúkú pwe iir ra áppirú néún Kraist kewe aposel, ekkewe mi tipetekison le ekkesiwili ekiekiir atun Jesus a áweneer.​—Föför 1:6, 7.

Án ewe kúkkún nengngin wewengaweiti ia kuchu a feito me ie, sap minne a efeiengaw. Iwe nge, minne Paipel a apasa a mmen watte lamotan ngeni manawach, ina popun sisap sótun weweiti masouan ren chék ach pwisin álleani. Kútta álillis pwe kopwe weweiti met ka álleani. Kútta chókkewe mi káé Paipel fán ekiek tekison, iir kewe mi lúkúlúk wóón án Kot we manaman mi fel pwe epwe álisiir le weweiti, iir kewe mi lúkúlúk pwe Kot a mochen ach sipwe weweiti ewe Paipel iei lap seni me lóóm. Kosap sáw le fós ngeni Chón Pwáraatá Jiowa are álleani ekkewe pwóróus ra káéfichi weweer mi katowu wóón ar we website jw.org. Paipel a pwonei pwe ika ka “siö ngeni Kot pwe epwe fang ngonuk om silelap,” iwe, kopwe “fefeitä lon om silei Kot.”​—Än Salomon Fos 2:3-5.