Néún Jon Áeúin Taropwe 3:1-24
3 Nengeni úkúúkún watteen án ewe Sam tongekich, pwe sipwe iteni néún Kot! Iwe, a ina ussuch. Ina minne, fénúfan ese silei kich, pún ese silei i.
2 Ámi mi áchengicheng, iei sia néún Kot, nge esaamwo pwááló met sipwe ussuni. Nge sia silei pwe sipwe ussun chék i atun epwe pwááló, pún sipwe wesewesen kúna i.
3 Iwe, ié mi eáni ei ápilúkúlúk lón i, a pwisin eliméchú, ussun chék ena emén mi limeliméch.
4 Ié mi féfféri tipis a atai allúk, pún tipis a wewe ngeni atai allúk.
5 Oua pwal silei pwe i a feito* pwe epwe uwealó ach tipis, me ese fókkun wor tipisin.
6 Ié mi nónnóm lón an tipeeú ngeni i, ese féfféri tipis. Pún ese wor emén mi féfféri tipis epwe kúna i are silei i.
7 Ámi nei kana mi áchengicheng, ousap mut ngeni emén an epwe otupukemiiló. Ewe emén mi féfféri minne mi pwúng, i mi pwúng, ussun chék ena emén mi pwúng.
8 Ewe emén mi féfféri tipis a pop seni ewe Tefil, pún ewe Tefil a tipis seni me lepoputáán.* Ina popun ewe Néún Kot a feito pwe epwe ataieló án ewe Tefil angang.
9 Ié mi upu seni Kot ese féfféri tipis, pún án Kot we ngún mi fel a nónnóm lón i, me i ese tongeni féfféri tipis, pún a upu seni Kot.
10 Néún Kot me néún ewe Tefil ra pwápwááló ren ei mettóch: Ié ese féfféri minne mi pwúng me ié ese tongei pwiin, rese pop seni Kot.
11 Pún iei ewe pwóróus oua rong me lepoputáán, pwe sipwe tongfengen lefilach,
12 sisap ussun Ken, ewe mi pop seni ewe mi ngaw me nieló pwiin we. Met popun a nieló i? Pún an féffér ra ngaw, nge án pwiin we féffér ra pwúng.
13 Ámi pwii kana, ousap máirú ren án ei fénúfan oputakemi.
14 Ussun itá sia máló, nge iei sia manaw, pún sia tongei pwiich kewe. Ewe emén ese tongei pwiin, a chúen má.
15 Ié mi oputa pwiin, i emén chón nimanaw, me oua silei pwe chón nimanaw resap kúna manaw esemuch.
16 Sia silei ussun tong pokiten án ena emén fangoló manawan fán itach, me pwal ina wisach ach sipwe fangoló manawach fán iten pwiich kewe.
17 Nge iká a wor ren emén wéún fénúfan nge a kúna pwe pwiin a osupwang nge ese mochen pwáári tong ngeni, ifa ussun a tongeni apasa pwe a tongei Kot?
18 Ámi nei kana mi áchengicheng, ámi tong esap chék pwá lón minne oua apasa, nge epwe pwá lón minne oua féri me epwe enlet.
19 Ren ena sipwe silei pwe sia pop seni ewe enlet, me sipwe alúkúlúkú letipach mwen mesan.
20 Iwe, inaamwo iká letipach epwe apwúngúkich, Kot a lapalap seni letipach me i a silei mettóch meinisin.
21 Ámi mi áchengicheng, iká letipach ese apwúngúkich, sia tongeni fós ngeni Kot fán lúkúlúk.
22 Iwe ese lifilifil met sia tingorei, sia angei pún sia apwénúetá an kewe allúk me féri met mi apwapwaai i.
23 Iwe, iei an we allúk: sipwe eáni lúkú lón iten Néún we Jises Kraist me tongfengen lefilach, ussun met a fen allúkú ngenikich ach sipwe féri.
24 Pwal och, ié mi apwénúetá an kewe allúk epwe chék nónnóm ren Kot me Kot epwe nónnóm ren i. Pokiten a fang ngenikich an we ngún mi fel, iwe sia silei pwe i a nónnóm rech.
Footnote
^ Krik, “pwááló.”
^ Are “seni ewe atun a poputá.” Weween ewe atun a kerán poputá le ú ngeni Kot.
