Ewe Áeúin Taropwe Ngeni Chón Korint 14:1-40
14 Oupwe sópweeló le pwáraatá tong, nge oupwe pwal achocho le kúkkútta ekkewe liffang seni Kot, ákkáeúin ewe tufichin osuni.
2 Pún emén mi tufichin kapas lón sókkopaten fós, a kapas ngeni Kot nge esap ngeni aramas, pún ese wor emén a aúseling inaamwo iká a apasaatá ekkewe monomonun Kot me ren ewe ngún.
3 Iwe nge, emén mi osuni a aúfichietá me apéchékkúlatá me oururu aramas ren an kapas.
4 Ewe mi tufichin kapas lón sókkopaten fós a apéchékkúlatá pwisin i, nge ewe mi osuni a apéchékkúlatá eú mwichefel.
5 Iei, úa mochen pwe ámi meinisin oupwe kapas lón sókkopaten fós, nge ewe úa kon mochen, oupwe osuni. Ren enletin, ewe emén mi osuni a lap seni ewe emén mi kapas lón sókkopaten fós, chilóón chék iká epwe afféúni* an kewe kapas pwe ewe mwichefel epwe péchékkúletá ren.
6 Nge ámi pwii kana, lón ei fansoun iká úpwe feiló kapas ngenikemi lón sókkopaten fós, ifa ussun ei epwe álisikemi? Iká úa mochen álisikemi, a lamot úpwe áeá ewe sile, are eú oesini, are ewe kapas me asukul úa angei seni Kot.
7 A pwal ina ussun ren ekkewe mettóch ese wor manaw rer nge mi wor nikáttik seniir, ussun chék efóch fluut are eú kitar.* Iká emén epwe ettiki ewe fluut are ewe kitar nge eú chék ngingiin, ifa ussun aramas repwe esilla nikáttikin?
8 Pún iká ewe chón ettiki ewe rappwaan maun ese affataéchú an ettiki, ié epwe mmólnetá ngeni maun?
9 Pwal ina chék ussun, iká oupwe néúnéú kapas mi weires le weweiti, ifa ussun emén epwe silei minne oua apasa? Ren enletin, oua chék kapas ngeni ásepwál.
10 A wor chómmóng sókkun fós lón ei fénúfan, nge iir meinisin mi wor weween.
11 Iwe, iká úse weweiti met emén a apasa, úpwe emén chón ekis ngeni ena emén mi kapas, me ena emén epwe emén chón ekis ngeniei.
12 Pwal ina ussun remi, pokiten oua fókkun tipeni ekkewe liffang me ren ewe ngún, oupwe achocho le angei chómmóng liffang epwe apéchékkúlatá ewe mwichefel.
13 Ina minne, ewe emén mi kapas lón sókkopaten fós epwe iótek pwe epwe tongeni afféúni.*
14 Pún iká úa iótek lón eú fós, esap ngang ewe úa kapas nge ewe liffang, ewe mi kawor ngeniei me ren ewe ngún mi fel. Ina minne, úse weweiti minne úa apasa.
15 Iwe, met úpwele féri? Úpwe iótek ren ewe liffang úa angei me ren ewe ngún mi fel, me úpwe pwal eáni eú iótek úa weweiti weween. Úpwe kél ngeni Kot ren ewe liffang úa angei me ren ewe ngún mi fel, me úpwe pwal eáni eché kél ngeni Kot úa weweiti weween.
16 Nge iká ren ewe liffang án ewe ngún mi fel ka isettá óm kapasen mwareiti Kot, ifa ussun án emén ese angei káit mi nóm leimi epwe apasa “Amen” ren óm iótekin kilisou, nge ese silei minne ka apasa?
17 Pwúngún, ka apasa óm kapasen kilisou lón napanap mi múrinné, nge esap apéchékkúlatá ena emén.
18 Úa kilisou ngeni Kot pwe úa kapas lón sókkopaten fós lap senikemi meinisin.
19 Nge lón mwichefel, a fen éch ái úpwe apasaatá nimu kapas aramas repwe tongeni weweiti, pwe úpwe pwal asukula ekkewe ekkóch, lap seni engol ngeréú kapas lón sókkopaten fós.
20 Ámi pwii kana, ousap semirit lón ámi wewe, nge oupwe semirit ngeni minne mi ngaw, me oupwe ásimaw lón ámi wewe.
21 A mak lón ewe Allúk: “Jiowa* a apasa, ‘ngang úpwe néúnéú aramas mi kapas lón sókkopaten fós me ekkewe chón ekis le kapas ngeni ekkeei aramas, nge iir resap mwo nge mochen aúseling ngeniei.’ ”
22 Ina minne, sókkopaten fós eú esissil, esap fán iten ekkewe chón lúkú nge fán iten ekkewe esap chón lúkú, nge oesini esap fán iten ekkewe esap chón lúkú nge fán iten ekkewe chón lúkú.
23 Iwe, iká unusen ewe mwichefel a kochufengen lón eú leeni me iir meinisin ra kapas lón sókkopaten fós nge ekkewe rese angei káit are ekkewe esap chón lúkú ra tolong, resap erá pwe oua umwes?
24 Nge iká ámi meinisin oua osuni nge emén esap chón lúkú are emén ese angei káit a tolong, i epwe kapwúng me etittin me ren minne a rong.
25 Monomonun letipan epwe pwápwááló, iwe i epwe chapetiw me fel ngeni Kot, me apasa: “Kot a wesewesen nónnóm leimi.”
26 Iwe ámi pwii kana, met sia tongeni apasa? Lupwen oua mwichfengen, emén a eáni kélún mwareiti Kot, pwal emén a asukul, pwal emén a apasawu ekkewe kapas a angei me ren Kot, pwal emén a kapas lón pwal eú fós, me pwal emén a afféú me áwewe. Meinisin ekkeei mettóch ra fis pwe repwe apéchékkúlatá ewe mwichefel.
27 Iwe, iká a wor chón kapas lón pwal eú fós, epwe chék rúúemén are úlúmén repwe kapas, emén mwirin emén, nge emén epwe wisen afféú.*
28 Nge iká ese wor emén chón afféú,* i epwe chék fanafaneló lón ewe mwichefel me epwe pwisin fósolong lón letipan ngeni Kot.
29 Rúúemén are úlúmén soufós repwe kapas, me ekkewe ekkóch repwe ekieki weween.
30 Nge iká pwal emén a apasawu ekkewe kapas a angei me ren Kot atun an mómmóót ikena ie, ewe chón kapas akkomw epwele fanafaneló.
31 Pún ámi meinisin oua tongeni osuni, emén mwirin pwal emén, pwe meinisin repwe káé me meinisin repwe péchékkúletá.
32 Iwe, lupwen ekkewe soufós repwe áeá ekkewe liffang me ren ewe ngún, repwe áeá lón napanap mi fich.
33 Pún Kot esap i emén Koten fitikoko, nge Koten kinamwe.
Ussun chék lón ekkewe mwichefel meinisin án ekkewe chón pin,
34 ekkewe fefin repwe chék fanafaneló lón ekkewe mwichefel, pún ese mumu ngeniir ar repwe kapas. Nge repwe fen onómuur fán ekkewe mwán, ussun met ewe Allúk a pwal apasa.
35 Iká ra mochen káé och mettóch, iir repwe eisini pwúlúwer kewe me lón imwer, pún mi ássáw ngeni emén fefin an epwe kapas me lón ewe mwichefel.
36 Met, ewe kapasen Kot a pop senikemi? Are, met, a kawor ngenikemi chék?
37 Iká emén a ekieki pwe i emén soufós, are a wor ren eú liffang me ren ewe ngún, i epwe tipeeú ngeni pwe ekkeei mettóch úa makkeei ngenikemi ikkeei án ewe Samol allúk.
38 Nge iká emén esap áfánni ena allúk, Kot esap pwal áfánni i.*
39 Ina minne, ámi pwii kana, oupwe achocho le osuni, nge ousap pinei ekkewe ra kapas lón sókkopaten fós.
40 Nge mettóch meinisin repwe fis fán pwúng me kókkótéch.
Footnote
^ Are “chiyakúúni.”
^ Eú sókkun minen nikáttik minen lóóm mi wor sáitelin, mi sókko seni kitar lón ei fansoun.
^ Are “chiyakúúni.”
^ Are “chiyakú.”
^ Are “chón chiyakú.”
^ Are ese mwáál, “iká emén ese mochen weweiti ena allúk, i epwe sópweeló nge esap wor an weweiti.”
