Ewe Áeúin Taropwe Ngeni Chón Korint 2:1-16
2 Iwe, ámi pwii kana, atun úa feiló remi, úse feiló remi ái úpwe eingakemi ren kapas are tipáchem lón ái esilefeili ewe monomonun Kot.
2 Pún úa apwúngaló ái úpwe emmweni ekiekimi ngeni Jises Kraist, me an we ninniiló wóón ewe irá.
3 Me úa feiló remi lón ái apwangapwang me ái niwokkus me watteen chechchech.
4 Lupwen úa kapas me afalafal, úse eáni kapas mi amwarar, ekkewe esin kapas ekkewe mi tipáchem ra nénnéúnéú, nge fen ái kewe kapas ra pwáári manamanen ewe ngún mi fel,
5 pwe ámi lúkú epwe lóngólóng wóón án Kot manaman, nge esap wóón tipáchemen aramas.
6 Iwe, sia kapas ussun tipáchem lein ekkewe mi ásimaw, nge esap ewe tipáchemen ei ótóten fénúfan,* esap pwal tipáchemen ekkewe sounemenemen ei ótóten fénúfan, iir kewe repwe móróló.
7 Nge sia kapas ussun án Kot we tipáchem mi nóm lón monomonun Kot, ewe tipáchem mi opoló, ewe Kot a fen filieló me lóóm, mwen poputáán ei ótóten fénúfan mi ngaw pwe sipwe kúna ling.
8 Iei ewe tipáchem ese wor emén sounemenemen ei ótóten fénúfan* a silei ussun. Pún iká ra silei, resap nieló* ewe Samolun ling.
9 Nge iei met a makketiw: “Met maas ese kúna me seling ese rong, are aramas rese ekieki lón letiper, ikkena ekkewe mettóch Kot a fen ammólnatá fán iten chókkewe mi tongei i.”
10 Pún Kot a fen pwáriireló ngenikich me ren an we ngún mi fel, pún ewe ngún mi fel a etittina mettóch meinisin, pwal mwo ekkewe mettóch mi alóllóól ussun Kot.
11 Met, emén aramas a tongeni silei ekiekin emén aramas? Fókkun aapw. Ina och mettóch letipen ena chék aramas a silei. Pwal ina chék ussun, ese wor emén a tongeni silei ekiekin Kot, lúkún chék án Kot we ngún mi fel.
12 Iwe, esap ewe ekiekin* fénúfan ei sia angei, nge ewe ngún mi fel seni Kot, pwe sipwe silei ekkewe mettóch Kot a fang ngenikich fán kirekiréch.
13 Sise asukula ekiekin aramas mi tipáchem, nge ekiekin Kot. Me sia áweweei ussun án Kot ekiek ren ach esilefeili met ewe ngún a áitngenikich.
14 Nge emén mi nóm fán emmwenien pwisin mochenin, ese etiwa* ekkewe mettóch mi feito seni án Kot we ngún mi fel, pún me ren ra umwes, me i ese tongeni weweiti ekkena mettóch pokiten a lamot an epwe etittiner ren álillisin ewe ngún mi fel.
15 Iwe nge, emén mi nóm fán emmwenien án Kot ngún mi fel, i a etittina mettóch meinisin, nge ese wor emén a apwúngú i.
16 Pún “ié a tongeni silei án Jiowa* ekiek pwe epwe tongeni asukula i?” Nge kich, a nóm rech án Kraist ekiek.
