Ewe Áeúin Taropwe Ngeni Chón Korint 4:1-21
4 Emén aramas epwe ekieki pwe ám chón angang mi akkangang fán Kraist me chón túmúnú monomonun Kot kewe.
2 Me lúkún ei, a lamot emén chón angang epwe túppwél.
3 Nge me rei, ese fókkun wor lamoten ái úpwe etittin me remi are me ren án aramas kapwúng. Ren enletin, úse pwal mwo nge etittinaei pwisin.
4 Pún ngang úse meefi och mwáálli. Nge ei, ese ánneta pwe ngang emén mi pwúng. Ewe emén mi etittinaei, ina i Jiowa.*
5 Ina minne, ousap apwúngú och mettóch me mwen ewe fansoun mi kefililó, tori ewe Samol epwe war. I epwe pwáári ekkewe mettóchun rochopwak mi monomon me pwáraaló ekiekin letip, mwirin, Kot epwe mwareiti emén me emén.
6 Iwe, ámi pwii kana, ekkeei mettóch úa áwena ngenikem me Apolos fán iten feiéchúmi, pwe oupwe káé ei allúk: “Ousap luló seni ekkewe mettóch mi makketiw,” pwe oute lamalamtekia ren ámi echeni emén nge oput ewe emén.
7 Pún ié a féri pwe kopwe sókkóló seni ekkewe ekkóch? Esap pwe Kot a fang ngonuk mettóch meinisin mi nóm reom? Iwe, iká a ngonuk meinisin, pwata ka sikesik ussun itá nge ka angei seni pwisin óm tufich?
8 Oua fen menemenéch? Oua fen pisekisek? Oua fen poputá le nemenem ussun king me lúkúm? Úa fókkun áneán pwe oua fen poputá le nemenem ussun king pwe áúpwe pwal fitikemi le nemenem ussun king.
9 Ussun me rei pwe Kot a uweikemiwu ekkewe aposel sáingolóón ussun aramas mi kapwúngúló pwe repwe máló, pwe meinisin repwe kúna, pún ám áúa wiliiti minen katol me ren fénúfan, pwal me ren ekkewe chónláng me aramas.
10 Áúa umwes fán ásengesin Kraist, nge ámi oua tipáchem lón Kraist. Áúa apwangapwang, nge ámi oua péchékkúl, ámi oua kúna súfél, nge ám súfélúngaw.
11 Tori lón ei kulók áúa echik me kaka me foutengaw* me kúna kawet me ese wor imwem,
12 me áúa angang weires ren péúm. Lupwen aramas ra esiitakem áúa efeiéchúúr, lupwen áúa kúna riáfféúmwáál, áúa likiitú fán mosonottam.
13 Lupwen aramas ra eitengawakem áúa pélúweni fán pwetete,* áúa ussun chék kápichin ei fénúfan, ewe limengawen mettóch meinisin tori iei.
14 Úa makkeei ekkeei mettóch, esap ren ái úpwe ásáwakemi, nge ren ái úpwe fénékemi ussun nei mi áchengicheng.
15 Pún ikáámwo a wor néúmi 10,000 sense pwe repwe asukulakemi ifa ussun oupwe áppirú Kraist, nge ren enletin, ese chómmóng sememi. Úa ussun emén sam mi asukulakemi ewe kapas allim me ámi oupwe tapweló mwirin Kraist Jises.
16 Ina minne, úa pesekemi pwe oupwe áppirúei.
17 Ina popun úa tiinaaló Timoty remi, pokiten i nei mi áchengicheng me túppwél lón ewe Samol. I epwe áchchemakemi ussun ekkewe kapasen emmwen* úa apwénúetá ussun emén chón angangen Kraist Jises, ussun chék met úa eáni asukul lón iteiten mwichefel ekis meinisin.
18 Ekkóch ra lamalamtekia, ussun itá nge úsapw feiló remi.
19 Ekiseló chék, iká letipen Jiowa,* úpwe feiló remi me úpwe silei esap met ekkena mi lamalamtekia ra apasa, nge iká a nóm rer án Kot manaman.
20 Pún ach nóm fán nemenien án Kot we Mwú a leteló esap ren kapas nge ren án Kot we manaman.
21 Menni oua mochen? Úpwe feiló remi fán efóch wichiwich are fán tong me tipepwetete?
