Ewe Áeúin Taropwe Ngeni Chón Korint 9:1-27
9 Esap ngang mi ngaseló? Esap ngang emén aposel? Esap úa kúna Jises ach Samol? Esap ámi uwaan ái angang lón ewe Samol?
2 Inaamwo iká esap ngang emén aposel ngeni ekkewe ekkóch, nge ngenikemi ngang emén aposel! Pún ámi impwangen ánenneten wisei we aposel lón ewe Samol.
3 Iei met úa pélúwen ngeni chókkewe mi etittinaei:
4 Esap pwe a wor ám pwúúng* le mwéngé me ún?
5 Esap pwe a wor ám pwúúng ám áúpwe pwúlúweni emén fefin chón lúkú me áúpwe uwei lón ám sái, ussun met ekkóch ekkewe aposel me pwiin ewe Samol kewe me Kefas* ra féri?
6 Are, itá ám chék me Parnapas ese wor ám pwúúng le úkútiw le angang fán iten tufichin manawem?
7 Ié soufiu a fiti maun nge a pwisin mééni mettóchun? Ié a fótuki eú ataken kreip nge ese ochooch seni uwaan? Are, ié a fóóleni eú mwichen siip nge ese ún milik seniir?
8 Met, úa apasa ekkeei mettóch seni ekiekin aramas? Are, esap pwe ewe Allúk a pwal apasa ekkeei mettóch?
9 Pún a mak lón ewe Allúkún Moses: “Kosap éppwélú awen emén átemwánnin kou atun a puri ekkewe umwun wiich.”* Met, ekkewe átemwánnin kou, ewe Kot a kon ekiekiir?
10 Are, a apasa ena wesewesen fán ásengesich? A wesewesen makketiw fán ásengesich pún ewe aramas mi ttu pwúl me ewe mi wisen puri umwun wiich, repwe féri ena lón ar ápilúkúlúk pwe repwe angei wiser seni.
11 Iká áúa amwora leimi ekkewe mettóch seni Kot, epwe ngaw iká áúpwe kini senikemi álillisin pekin áion?
12 Iká pwe ekkewe ekkóch a wor ar pwúúng le angei senikemi, esap pwe epwe fen kon watte ám pwúúng? Iwe nge, ikáámwo a wor ám pwúúng,* áúse tingor senikemi och mettóch, nge áúa likiitú fán mettóch meinisin pwe esap wor met epwe eppeti ewe kapas allim ussun ewe Kraist.
13 Ouse silei pwe ekkewe mwán mi féri ekkewe angang mi pin ra mwéngé ekkewe mettóch lón ewe imwenfel, me chókkewe mi akkangang ren ewe róóng ra angei inetiir seni ewe róóng?
14 Iwe, pwal iei chék ussun, ewe Samol a allúkú pwe iir ekkewe mi arongafeili ewe kapas allim repwe manaw seni ewe kapas allim.
15 Ikáámwo ina, nge úse tingor senikemi och mettóch. Ren enletin, úse makkeei ekkeei mettóch pwe epwe fis ngeniei, pún a múrinné ái úpwe fen máló lap seni an epwe péút seniei ái pwúúng le sikásini.
16 Iwe, iká úa afalafala ewe kapas allim, ese wor popun ái úpwe sikesik pún a kewis ngeniei ei wis. Enlet, riáfféú ngeniei iká pwe úse afalafala ewe kapas allim!
17 Iká úpwe féri ei seni mochenin letipei, epwe wor liiwini. Nge ikáámwo úa féri esap seni mochenin letipei, Kot a chúen lúkúlúk wóói ái úpwe féri ei angang.
18 Iwe, met ena liiwini? Liiwini, ina ái afalafala ewe kapas allim nge ese kamé. Iwe ren ei, úpwe tongeni ttii seniei ái úpwe áeámwáálli ái nemenem* wóón ewe kapas allim.
19 Pún inaamwo iká úse slave ngeni emén, nge úa pwisin féri pwe úpwe emén slave ngeni meinisin pwe úpwe tongeni liapeni chómmóng aramas.
20 Ren ekkewe chón Jus, úa wiliiti emén chón Jus pwe úpwe liapeni ekkewe chón Jus. Ren ekkewe mi nóm fán allúk, úa wiliiti ussun emén mi nóm fán allúk inaamwo iká úse nóm fán allúk pwe úpwe liapeni chókkewe mi nóm fán allúk.
21 Ren chókkewe ese wor ar allúk, úa wiliiti ussun emén ese wor an allúk inaamwo iká úa nóm fán ewe allúk mwen mesen Kot me fán ewe allúkún Kraist, pwe úpwe liapeni chókkewe ese wor ar allúk.
22 Ren ekkewe mi apwangapwang, úa wiliiti emén mi apwangapwang pwe úpwe liapeni ekkewe mi apwangapwang. Me úa féri mettóch meinisin úkúúkún ái tongeni ái úpwe álisi meinisin sókkopaten aramas pwe úpwe tongeni amanawa mwaren ekkóch me leir.
23 Nge úa féri mettóch meinisin fán ásengesin ewe kapas allim ren ái úpwe tongeni afalafala ngeni ekkewe ekkóch.
24 Ouse silei pwe ekkewe chón kitir mi fiti eú kitir ra ssá meinisin nge emén chék epwe angei winnan? Oupwe ssá lón ewe napanap oupwe tongeni winneni ewe win.
25 Iwe, iteiten chón fiti eú okkuffengen* repwe nemeni mocheniir lón mettóch meinisin. Ewer, ra féri ena pwe repwe angei epa mwárámwár mi tongeni móróló, nge kich, sipwe angei ewe esap tongeni móróló.
26 Ina minne, úa ssá pún úa silei ia úpwe ssáló ie, me úse kéfén ussun itá úa éfénú ásepwál,
27 nge úa éfénú* inisi me emmweni ussun emén slave, pún iká úse ina ussun, iwe ngang, ewe mi asukula ekkewe ekkóch, úpwe wiliiti emén ese ketiw me ren Kot.
Footnote
^ Krik, “nemenem.”
^ Pwal itan Piter.
^ Napanapen an epwe áimuni ekkewe féún seni wasan ren an puriir are ren ekkewe pisekin atake ekkewe man ra luki.
^ Krik, “nemenem.”
^ Are “pwúúng.”
^ Are “iteiten chón urumwot.”
^ Are “apwúngúchowu.”
