Néún Piter Áeúin Taropwe 3:1-22
3 Pwal ina chék ussun, ámi fefin kana oupwe onómukemi fán nemenien pwúlúwemi kewe, pún iká ekkóch me leir rese álleasochisi án Kot Kapas, repwe tongeni álleasochisi ren ámi féffér inaamwo iká ouse apasa och,
2 pún ra kúna féfférúmi mi limeliméch fiti enletin súfél.
3 Ousap mut ngeni ámi liéch me lúkún an epwe pwá, áwewe chék ren fúresin mékúr, fouten kolt, are úf mi mémmóng,
4 nge oupwe mut ngeni ámi liéch me lón letipemi an epwe pwá. Ren ei popun, oupwe foutei ngenikemi kinamwe me tipepwetete, pún ikkena met ra fókkun aúchea me ren Kot. Ekkena mettóch resap tongeni móróló.
5 Pún ina ussun án ekkewe fefin lóóm mi pin, iir mi ápilúkúlúkú Kot, foutei pwisin iir. Ra onómuur fán nemenien pwúlúwer kewe,
6 ussun chék án Sara álleasochisi Eperiam me kér ngeni samol. Oupwe néún neminna iká oupwe sópweeló le féri minne mi múrinné me ouse mut ngeni niwokkus an epwe okkufukemi.
7 Pwal ina chék ussun ren ámi mwán kana, oupwe nónnóm ren pwúlúwemi kewe fán ámi wewefichiitiir. Oupwe súfélitiir ussun sepi mi apwangapwang, pún Kot a pwal ngeniir ewe liffangen manaw ussun chék an ngenikemi, pwe esap wor met epwe eppeti ámi iótek.
8 Iwe sáingolóón, ámi meinisin oupwe eáni eú chék ekiek, eú chék memmeef, tongen pwipwi, úméúméch mi fiti tong, me tipetekison.
9 Ousap liiwini ngaw ngeni ngaw are esiit ngeni esiit. Nge oupwe fen liiwini ngeni feiéch pún oua kefil me ren Kot pwe oupwe efeiéchú ekkewe ekkóch, iwe i epwe efeiéchúkemi.
10 Pún “emén mi aúcheani manaw me mochen eáni manaw mi pwapwa epwe túmúnú chénawan seni minne mi ngaw me túnawan seni kapas mi otuputup.
11 Epwe sú seni minne mi ngaw me féri minne mi múrinné. Epwe kútta me efisi kinamwe.
12 Pún mesen Jiowa* a fót wóón ekkewe aramas mi pwúng, me a aú selingan ngeni ar tingormaw lón iótek. Nge Jiowa* a okullu sékúrún ngeni chókkewe mi féri minne mi ngaw.”
13 Ié epwe efeiengawakemi iká oupwe tinikken fán iten minne mi múrinné?
14 Ikáámwo oupwe kúna riáfféú pokiten ámi aramas pwúng, nge oupwe pwapwa. Iwe nge, ousap niwokkusiti met ra niwokkusiti,* me ousap mut ngeni och mettóch an epwe aosukosukakemi.
15 Nge seni lón letipemi oupwe epinaaló ewe Kraist pún i ewe Samol. Fansoun meinisin oupwe mmólnetá le pélúweni chókkewe mi eis popun ámi ápilúkúlúk, nge oupwe féri ena fán mosonoson me watteen súfél.
16 Oupwe sópweeló le eáni eú mwelien letip mi múrinné, pún iká ra apasa och mettóch mi ngaw ussumi, repwe sáw ren ámi féffér múrinné pokiten ámi chón tapweló mwirin Kraist.
17 Pún iká letipen Kot pwe oupwe kúna riáfféú pokiten ámi féri minne mi múrinné, iwe epwe fen éch lap seni ámi kúna riáfféú pokiten ámi féri minne mi ngaw.
18 Kraist a máló fán eú chék fán iten fansoun meinisin, emén aramas pwúng fán iten ekkewe rese pwúng, pwe epwe amóeló tipis me emmwenikemi ngeni Kot. A máló lón inisin futuk nge a manawetá lón inisin ngún.
19 Iwe, lón inisin we inisin ngún, a feiló me esilefeili ewe pwóróusen kapwúng ngeni ekkewe chónláng mi kalapus,
20 iir kewe mi álleasolap atun Kot a mosonottam le witiwit lón fansoun Noa we atun fférún ewe waimw, ewe mi amanawa fitemén chék aramas, iir wanimén, seni ewe noter.
21 Sia tongeni aléllééi minne a fis lón ekkena fansoun ngeni papatais, ewe mi amanawakemi iei (esap ren kamólóón limengawen futuk, nge ina ewe tingor ngeni Kot fán iten eú mwelien letip mi múrinné), ren án Jises Kraist manawsefál.
22 Kraist a feitá láng me a móót lepeliefichin Kot, me ekkewe chónláng me chókkewe mi wor ar nemenem ra álleasochisi.
