Néún Piter Áeúin Taropwe 5:1-14
5 Iwe, pokiten pwal ngang emén mwán mi ásimaw, emén chón pwáraatá ussun án Kraist kewe riáfféú, me pwal chón angei ewe ling epwe pwááló, úpwe tingorei ekkewe mwán mi ásimaw leimi:
2 Oupwe túmúnú néún Kot mwichen siip a lúkú ngenikemi, ussun ámi chón masen siip. Oupwe túmúnúúr seni enletin letipemi, nge esap seni lúkún tipemi, esap pokiten ámi mochenian moni, nge seni ámi wesewesen mochen.
3 Ousap nemeni chókkewe Kot a lúkú ngenikemi, nge oupwe eú leenien áppirú ngeni ewe mwichen siip.
4 Iwe, atun ewe samolun chón masen siip epwe pwááló, oupwe angei ewe mwárin ling ese tongeni mesiló.
5 Pwal ina ussun ámi kana alúwél, oupwe onómukemi fán emmwenien ekkewe mwán mi watte senikemi. Nge ámi meinisin oupwe tipetekison lón ámi féffér lefilemi, pún Kot a ú ngeni ekkewe mi lamalamtekia me a fang an kirekiréch mi somwoló ngeni ekkewe mi tipetekison.
6 Ina minne, oupwe átekisonakemiitiw fán péún Kot mi manaman, pwe i epwe átekiakemiitá lón ewe fansoun mi kefililó,
7 me oupwe likit ngeni ámi aúrek* meinisin, pún i a tongekemi.
8 Oupwe áeá ámi tufichin ekiek me mammasa! Ewe Tefil, ewe chón oputakemi, a fetálfeil ussun emén laion mi wérúwér o kúkkútta emén an epwe oromaaló.
9 Oupwe ú ngeni, me núkúchar lón ámi lúkú, pún oua silei pwe pwiimi kewe wóón unusen fénúfan ra pwal kúkkúna ekkewe esin riáfféú oua kúna.
10 Nge mwirin ámi kúna riáfféú ren fansoun mwochomwoch, ewe Kot mi uren kirekiréch mi somwoló, ewe mi kérikemi ren Kraist ngeni an we ling esemuch, epwe aunusaaló ámi káit. Epwe apposakemi, apéchékkúlakemi, me anúkúcharakemi.
11 A nóm ren ewe manaman tori feilfeiló. Amen.
12 Pwiich Silfenus,* ewe mi túppwél, a álisiei le makkeei ngenikemi ei taropwe pwe úpwe apéchékkúlakemi me oupwe silei pwe Kot a fang ngenikemi an enletin kirekiréch mi somwoló. Iwe, oupwe kémwéchúnúk wóón.
13 Ewe fefin* mi nóm Papilon, ewe mi filitá me ren Kot ussun chék ámi, a tiinaaló an kapwong ngenikemi, me pwal nei we Mark.
14 Oupwe kapwongfengen ren ámi turufifengenikemi.*
Amwo ámi néún Kraist kewe chón káé meinisin oupwe eáni kinamwe.
Footnote
^ Are “lólilen.”
^ Pwal itan Sailas.
^ A tongeni wewe ngeni eú mwichefel.
^ Krik, “ren eú kiis mi fiti tong.”
