Ewe Áeúin Taropwe Ngeni Chón Tesalonika 2:1-20
2 Ámi pwiim kana, oua fókkun silei pwe ám chuurikemi ese lamotmwáál.
2 Pún ikáámwo áúa fen kúna riáfféú me turunufas me lón Filipai, ussun ámi oua fen silei, nge áúa chék pwora ren án Kot álillis pwe áúpwe erenikemi ewe kapas allimen Kot inaamwo iká a watte eppetin.
3 Pún ewe kapasen pesepes áúa ngenikemi ese lóngólóng wóón minne mi mwáál me minne mi limengaw are otuputup,
4 nge pokiten Kot a apwúngaló pwe a fich ngenikem an epwe ewisa ngenikem ewe kapas allim, áúa kapas esap ren ám áúpwe apwapwaai aramas nge fen Kot, ewe mi etittina letipem.
5 Oua silei pwe áúse fókkun otupukemi ren kapasen emichimich, are tipitipin aramaséch pwe áúpwe angei mettóch senikemi. Kot a silefichi ena mettóch!
6 Ám áúse pwal kútta án aramas repwe ingeitikem, esap ámi are pwal ekkewe ekkóch. Esap pokiten ám néún Kraist aposel, iwe áúa tongeni ewisa ngenikemi ámi oupwe awora met áúa osupwangan.
7 Nge, áúa tongekemi me kirekiréch ngenikemi, ussun chék atun án emén inelap amwéngééni me angepwetete ngeni néún ménúkol.
8 Iwe, pokiten áúa fókkun tongekemi, áúa pwapwa le fang ngenikemi esap chék ewe kapas allimen Kot, nge pwal pwisin manawem pún oua áchengicheng me rem.
9 Ámi pwiim kana, ese wor tipemwárámwár pwe oua chemeni ám angang weires. Áúa angang lerán me lepwin, pwe áúte áweiresikemi atun áúa afalafala ngenikemi ewe kapas allimen Kot.
10 Atun áúa nóm remi ámi ekkewe chón lúkú, ám áúa túppwél, féri minne mi pwúng, me ese wor tikingawem. Ámi me pwal Kot, chón pwáraatá fán item.
11 Oua fókkun silei pwe áúa kan pesekemi me oururukemi me éúréúra emén me emén ámi, ussun chék met emén sam a féri ngeni néún kewe,
12 pwe oupwe tongeni sópweeló le manaweni ewe manaw mi fich me ren Kot, ewe mi kérikemi ngeni Mwúún we me an ling.
13 Ina minne, áúse pwal úkútiw le kilisou ngeni Kot, pún lupwen oua angei ewe kapasen Kot, ewe oua rong senikem, oua etiwa ren met wesewesen enletin, esap kapasen aramas, nge ina kapasen Kot, ewe mi pwal angang lón ámi chón lúkú.
14 Ámi pwiim kana, oua áppirú chón ekkewe mwichefelin Kraist lón Jutia, iir án Kot kewe mwichefel pún oua kúna riáfféú me lepéún chón pwisin leeniemi ussun chék pwal met ekkewe ra kúna riáfféú ren me lepéún ekkewe chón Jus,
15 chókkewe ra pwal mwo nge nieló ewe Samol Jises me ekkewe soufós me eriáfféwúmwáálikem. Pwal och, rese apwapwaai Kot, nge ra ú ngeni met mi échchúiti aramas meinisin,
16 ra sótun eppetikem seni ám áúpwe fós ngeni aramasen ekkewe ekkóch mwú pwe repwe tongeni kúna manaw. Ar féri ena, a fen alapaaló tipisiir kewe. Nge iei arapakkan chék án Kot song epwele feito wóór.
17 Ámi pwiim kana, me mwan, áúa imusenikemi ren ekis chék fansoun lón féúféún aramas nge esap lón letipem. Iwe nge, pokiten áúa fókkun mochen kúnakemi, áúa achocho úkúúkún ám tufich pwe áúpwe ló remi.
18 Ren ei popun, áúa mochen feiló remi, me a fán ruu án ngang Paul sótun feiló remi, nge Setan a eppeti alem.
19 Atun án ach Samol Jises liwinsefál, ié epwe ám ápilúkúlúk, ám pwapwa me mwárin chengel mwen mesan? Esap pwe ámi?
20 Fókkun ámi, ám ling me pwapwa.
