Ewe Áeúin Taropwe Ngeni Chón Tesalonika 3:1-13
3 Ina minne, atun áúse chúen tongeni engiló ngeni ám pwosiitikemi, áúa ekieki pwe mi fen éch ám áúpwe mwo nómotiw Aten,
2 me áúa tiinaaló pwiich Timoty, néún Kot chón angang fán iten ewe kapas allimen Kraist, pwe epwe apéchékkúla ámi lúkú me oururukemi,
3 pwe esap wor emén me leimi epwe apwangapwangoló* ren ekkeei riáfféú. Pún ámi oua fen silei pwe sise tongeni sú seni riáfféún ekkeei esin mettóch.
4 Pún lupwen áúa nónnóm remi, ám áúa fen ekkerenikemi pwe sipwe kúna riáfféú, iwe, ina met a fis, ussun met oua fen silei.
5 Ina minne, atun úse chúen tongeni engiló, úa tiinaaló Timoty ngenikemi pwe úpwe silei ussun ámi túppwél, pwe iká ewe Chón Otuputup a otupukemiiló, iwe ám angang weires a lamotmwáál.
6 Nge iei, Timoty a kerán etto senikemi me a apwóróusa pwóróus mi múrinné ussun ámi túppwél me tong, ámi chechchemenikem fansoun meinisin fán pwapwa, me ámi fókkun mochen kúnakem ussun chék pwal ám mochen kúnakemi.
7 Ina minne ámi pwiim kana, lón meinisin ám kewe weires me riáfféú, áúa kúna ourur pokitemi me ewe túppwél oua pwáári.
8 Pún áúa péchékkúleló iká oua núkúchar lón ámi riri ngeni ewe Samol.
9 Iwe, ifa ussun áúpwe pwáári ám kilisou ngeni Kot fán itemi pokiten oua fókkun apwapwakem?
10 Lerán me lepwin áúa tingormaw lón iótek pwe áúpwe tongeni kúna mesemi me áúpwe tongeni álisikemi wóón met mi lamot ngenikemi pwe epwe apéchékkúla ámi lúkú.
11 Amwo ach we Kot me Semach we, me ach Samol Jises repwe atufichikem ám áúpwe ló remi.
12 Pwal och, amwo ewe Samol epwe alapaaló ámi tongfengen lefilemi me pwal ámi tongei meinisin, ussun chék watteen ám tongekemi,
13 pwe epwe apéchékkúla letipemi, esap wor met emén epwe tipi ngenikemi wóón, me oupwe pin mwen mesen ach Kot me Semach we atun án ach Samol Jises nónnóm,* fitifengen me néún kewe mi pin meinisin.
