Ewe Áeúin Taropwe Ngeni Chón Tesalonika 5:1-28
5 Iwe, ámi pwiim kana, ese pwal lamot ám áúpwe mak ngenikemi ussun ekkewe rán are fansoun mi fen kefililó me ren Kot.
2 Pún oua fókkun silei pwe ránin Jiowa* we epwe waroto ussun chék warawaren emén chón solá lepwin.
3 Lupwen aramas ra apasa, “Kinamwe me núkúnúkéch!” mwirin kitetter epwe mwittir feito wóór. Ei feiengaw watte epwe feito wóór, epwe ussun chék metekin án emén fefin néúnéú, me resap fókkun tongeni sú seni.
4 Nge ámi pwiim kana, ouse nóm lón rochopwak, ina minne ena rán esap ámáirú ngenikemi ussun máirúún ekkewe chón solá ren an a rániló,
5 pún ámi meinisin oua ussun chókkewe mi feffetál lón saram me ussun chókkewe mi feffetál lerán.* Esap kich chón lepwin are chón lón rochopwak.
6 Ina minne, ousisap annut ussun met ekkewe ekkóch ra féri, nge ousipwe chék nenneló me mammasafichi.
7 Pún chókkewe mi annut, ra annut lepwin, nge chókkewe mi sakaw ra sakaw lepwin.
8 Nge kich ekkewe chón lerán, ousipwe mammasafichi me éúféúfa ngenikich lúkú me tong ussun eché chechchen leupw. Sipwe pwal eáni ewe ápilúkúlúkún kúna manaw ussun eú imwach akkaw
9 pún Kot ese filikichetá ach sipwe kúna an song, nge a filikichetá ach sipwe kúna amanaw me ren ach Samol Jises Kraist.
10 I a máló fán itach, ina minne ese lifilifil iká sia nenneló are annut,* sipwe eti i le manaw.
11 Ina minne, oupwe sópweeló le apéchékkúlafengenikemi* me aúfichikemiitá, ussun met oua fen féfféri.
12 Iwe iei áúa tingor ngenikemi ámi pwiim kana, oupwe súféliti chókkewe mi angang weires fán itemi me emmwenikemi lón ewe Samol me fénékemi.
13 Oupwe pwal pwáár ngeniir watteen kirekiréch fiti tong pokiten ar angang. Oupwe kinamwefengen lefilemi.
14 Nge áúa pesei ngenikemi ámi pwiim kana, oupwe fénéú* ekkewe mi lúkúmach, oururu ekkewe mi letipechou, álisi ekkewe mi apwangapwang, me mosonottam ngeni meinisin.
15 Oupwe túmúnú pwe esap wor emén leimi epwe liwini ngeni emén an féfféringaw, nge fansoun meinisin oupwe fókkun achocho le eáni féffér múrinné lefilemi me ngeni meinisin.
16 Oupwe pwapwa fansoun meinisin.
17 Ousap úkútiw le ikkiótek.
18 Oupwe kilisou ren mettóch meinisin. Iei met letipen Kot fán iten chón tapweló mwirin Kraist Jises.
19 Ousap eppeti angangen* án Kot we ngún mi fel wóómi.
20 Ousap turunufasa kapasen oesini.
21 Oupwe etittinafichi mettóch meinisin. Oupwe kémwéchúnúk wóón minne mi múrinné.
22 Oupwe ttii senikemi sókkun féfféringaw meinisin.
23 Amwo ewe Koten kinamwe epwe pwisin unusen epinikemiiló. Ámi pwiim kana, amwo oupwe túmúnú ekiekimi* me letipemi* me inisimi lón mettóch meinisin, túmúnú pwe esap wor tikitikipwúlúmi atun án ach Samol Jises Kraist nónnóm.
24 Kot ewe mi kérikemi a túppwél, me i epwe fókkun apwénúetá ekkena mettóch.
25 Ámi pwiim kana, oupwe sópweeló le ikkiótek fán item.
26 Oupwe kapwong ngeni meinisin pwiich kewe ren ámi turufifengenikemi.*
27 Úa fókkun tingor ngenikemi lón iten ewe Samol pwe oupwe álleani ei taropwe ngeni pwiich kewe meinisin.
28 Án ach Samol Jises Kraist kirekiréch mi somwoló epwe nónnóm remi.
Footnote
^ Krik, “néún saram me néún lerán.”
^ Are “méúrúló lón máló.”
^ Are “oururufengenikemi.”
^ Are “éúréúra.”
^ Krik, “ekkei.”
^ Krik, pneu′ma.
^ Krik, psy·khe′.
^ Krik, “ren eú kiis mi pin.”
