Áeúin Taropwe Ngeni Timoty 1:1-20
1 Paul, emén néún Kraist Jises aposel ren allúkún Kot ach we Chón Amanaw me Kraist Jises, ach we ápilúkúlúk,
2 ngeni Timoty,* wesewesen nei lón lúkú:
Amwo ewe kirekiréch mi somwoló me úméúméch me kinamwe seni Kot ewe Sam me ach Samol Kraist Jises epwe nónnóm reom.
3 Ussun chék ái we peseek óm kopwe nómotiw Efisus ewe atun úpwele ló Masetonia, iei úa pwal erenuk óm kopwe allúkú ngeni ekkewe ekkóch ar resap eáni afalafal mi sókkóló,
4 resap pwal aúseling ngeni ekkewe túttúlap mi chofona me ekkewe áweween tettelin uruwoon lewo. Ese wor álilliséchún ekkena mettóch, nge ra fen efisi án aramas repwe apasa ekkewe mettóch rese tongeni ánnetatá pwúngún. Iir rese kapachelong lón ekkewe mettóch Kot a awora pwe repwe apéchékkúla ach lúkú.
5 Ewe popun a kawor ei kapasen emmwen pwe kich meinisin sipwe pwáári tong seni eú letip mi limeliméch me eú mwelien letip mi múrinné me lúkú ese wor likótuputupun.
6 Ekkóch ra kul seni ekkena mettóch, nge ra kul ngeni pwóróus mi lamotongaw.
7 Ra mochen repwe senseen allúk, nge rese weweiti ekkewe mettóch ra apasa are ekkewe mettóch ra péchéúló wóór.
8 Sia silei pwe ewe Allúk a múrinné iká emén a apwénúetáéchú,
9 pwal och, allúk ese ffér fán iten emén chón pwúng, nge fen fán iten chón atai allúk me álleasolap, chókkewe rese silei Kot me chón tipis, chókkewe rese túppwél* me chón turunufas, chón nieló semer, iner, are ekkewe ekkóch,
10 chón lisowumwáál,* mwán mi lisowu ngeni mwán,* chón sú fán aramas, chón chofona, chón ékképélmwáál, me meinisin mi ú ngeni ewe káit mi álilliséch.
11 Ei káit a feito seni ewe Kot mi pwapwa, a lóngólóng wóón lingen ewe kapas allim mi kewis ngeniei.
12 Úa kilisou ngeni Kraist Jises ach Samol, ewe mi fang ngeniei péchékkúl, pún a apwúngaló pwe ngang mi túppwél ren an ewisa ngeniei eú angang fán iten Kot,
13 inaamwo iká me lóóm ngang emén chón turunufasa Kot me chón eriáfféwú néún kewe chón káé me emén mi ésúfélúngaw. Iwe nge, i a úméúméch ngeniei pún ese wor ái sile, me féfférúi a ussun féfférún emén ese wor an lúkú Kot.
14 Nge a fókkun lapalap ewe kirekiréch mi somwoló ach Samol a pwáár ngeniei, me Kraist Jises a fang ngeniei lúkú me tong.
15 Ei kapas a alúkúlúk me fich ach sipwe unusen lúkú: Kraist Jises a feito fénúfan pwe epwe seláni chón tipis. Iwe, ngang ewe mi fókkun watte tipisin.
16 Iwe nge, Kraist Jises a úméúméch ngeniei, pwe ren ngang ewe mi fókkun watte tipisin, epwe tongeni pwáári unusen an mosonottam, pwe úpwe eú leenien áppirú ngeni chókkewe repwe alónga ar lúkú wóón i fán iten ewe manaw esemuch.
17 Ngeni ewe Kingen feilfeiló, ewe ese tongeni máló, sise tongeni kúna, ewe chék emén Kot, epwe angei itéch me ling feilfeiló chék. Amen.
18 Nei Timoty, ei kapasen emmwen úa lúkú ngonuk a tipeeú ngeni minne a osuni ussumw, pwe ren ei emmwen kopwe sópweeló le fiti ewe maun mi múrinné,
19 émwéchúnúkú óm lúkú me eáni eú mwelien letip mi múrinné, ewe ekkóch ra fen likitaaló mi efisi mórólóón ar lúkú ussun kokotiwen efóch siip.
20 Aiminios me Aleksanter, ra kapachelong lein chókkana, me úa atolonger fán nemenien Setan pwe repwe káé seni kapwúngúúr pwe resap ésúfélúngawa Kot.
Footnote
^ Weween “Emén mi Asamolu Kot.”
^ Are “ese wor ar tong enlet.”
^ Krik, “mwán mi koon ren mwán.”
