Áeúin Taropwe Ngeni Timoty 3:1-16
3 A alúkúlúk ei kapas: Iká emén mwán a achocho ngeni an epwe emén chónemmwen, i a tipeni eú angang mi múrinné.
2 Ina minne, a lamot emén chónemmwen epwe itéch, epwe pwúlúweni emén chék fefin, nemeni unusen kinikinin manawan, mirit, kókkótéch, awasélaéchú aramas, fich ngeni an epwe chón asukul,
3 esap únnúpuch, esap mwáneson, nge epwe tipepwetete,* esap ánini, esap mochenian moni,
4 epwe nemeniéchú chón leimwan, néún kewe repwe álleasochis me féffér múrinné
5 (pún iká emén mwán ese silei ifa ussun epwe nemeni pwisin chón leimwan, ifa ussun epwe tongeni túmúnú ewe mwichefelin Kot?),
6 esap emén mi kerán wiliiti emén Chón Kraist pwe ete lamalamtekia me tolong lón ewe kapwúng, kapwúngún ewe Tefil.
7 Pwal och, epwe pwal itéch me ren aramasen lúkún* pwe esap turulong lón itengaw me lón án ewe Tefil ssár.
8 A lamot ekkewe chónálillisin mwichefel repwe ngeni leten ar féri wiser, resap aweruu,* resap únnúmmóng wain, resap tipemmóng ren ar repwe angei winner,
9 nge repwe kémwéchúnúk ewe monomonun Kot ussun ewe lúkú* fán eú mwelien letip mi liméch.
10 Nge repwe akkomw asóssót pwe epwe ffat iká a fich ngeniir ena angang. Iká ese wor met ekkóch ra tipi ngeniir wóón, iwe repwe fich ngeni chónálillisin mwichefel.
11 A lamot ekkewe fefin repwe pwal ngeni leten ar féri wiser, resap eáni kapasen pweni, repwe nemeni unusen kinikinin manawer, me túppwél lón mettóch meinisin.
12 Emén chónálillisin mwichefel, epwe pwúlúweni emén chék fefin, nemeniéchú néún kewe me chón leimwan.
13 Pún emén mwán mi féri an angang fán pwúng epwe angei itéch me esap pireir le fós ussun ewe lúkú lón Kraist Jises.
14 Úa mak ngonuk ekkeei mettóch, inaamwo iká úa áneánei pwe úpwe ló reom ekiseló chék,
15 nge iká úpwe mmangoló, kopwe silei ifa ussun kopwe manaweni manawen chón leimwen Kot, ina ewe mwichefel án ewe Kot mi manaw, ewe úrelap me lóngólóngun ewe enlet.
16 Enlet, a fókkun lapalap ewe monomonun Kot mi riri ngeni ewe manaw mi fich ngeni Kot: ‘Jises a wiliiti emén aramas, i emén mi pwúng me ren Kot atun a ewilisefálli ngeni emén ngún, pwá ngeni ekkewe chónláng, pwóróusan a rongfeil lein ekkewe mwú, aramasen fénúfan ra lúkú i, me a feitá láng me angei lingan.’
Footnote
^ Are “esap tipeférea.”
^ Are “chókkewe esap iir chón ewe mwichefelin Chón Kraist.”
^ Are “otuputup lón ar kapas.”
^ Lón ei wokisin, “lúkú” a wewe ngeni meinisin met Chón Kraist ra eáni káit.
