Áeúin Taropwe Ngeni Timoty 4:1-16
4 Iwe nge, a ffatéch me ren án Kot we manaman mi fel pwe lón fansoun epwe feito, ekkóch repwe likitaaló ewe lúkú, aúseling ngeni pwóróus ese pwúng ussun itá a feito seni Kot, me aúseling ngeni áitien ekkewe timon,
2 me án ekkewe aramas mi likótuputup kapas chofona, iir kewe mwelien letiper a féúló.*
3 Ra pinei pwúpwúlú me allúkú ngeni aramas ar resap mwéngé ekkewe mwéngé Kot a féri pwe chókkewe mi wor ar lúkú me silefichi ewe enlet repwe mwéngé fán kilisou.
4 Pún mettóch meinisin Kot a féraatá ra múrinné, me ese wor met emén epwe oputa iká a angei fán kilisou,
5 pún a fen epinipiniló me ren án Kot kapas me pwal ren iótek.
6 Iká kopwe atoura ngeni pwiich kewe ei kapasen emmwen, kopwe emén néún Kraist Jises chón angang mi múrinné, emén mi péchékkúleló ren ekkewe kapas sia lúkú me ekkewe káit mi múrinné ka apwénúetáéchúúr.
7 Kopwe ttii sonuk ekkewe túttúlap mi chofona mi ésúfélúngaw ussun minne ekkewe chinnap fefin ra kan apwóróusa. Nge kopwe fókkun achocho* le tikeri óm kopwe eáni ewe manaw mi fich ngeni Kot.
8 Pún án emén taiso a wor ekis álilliséchún, nge ewe manaw mi fich ngeni Kot a álilliséch lón mettóch meinisin, pún mi fiti pwon fán iten ewe manaw iei me pwal ewe manaw epwe feito.
9 Ena kapas a alúkúlúk me a fich ach sipwe unusen lúkú.
10 Iei popun sia angang weires me fókkun achocho, pún sia ápilúkúlúkú ewe Kot mi manaw, ewe Chón Amanaw fán iten sókkun aramas meinisin, ákkáeúin ekkewe mi túppwél.
11 Kopwe sópweeló le áiti ngeniir ekkeei allúk me asukula.
12 Kosap fókkun mut ngeni emén an epwe esiitok pokiten óm alúwél. Nge kopwe fen eú leenien áppirú ngeni ekkewe mi túppwél, lón óm kapas, féffér, tong, lúkú, me limeliméch.
13 Kopwe sópweeló le álleani ngeni aramas ekkewe taropwe mi pin, peseer, me asukuler tori ái waroto.
14 Kosap túmúnúngaw ngeni ewe liffang seni Kot mi toruk ren eú oesini atun ewe kúmiin mwán mi ásimaw ra isettá péúr wóóm.
15 Kopwe ekilonei ekkeei mettóch, fókkun achocho ngeniir pwe meinisin repwe kúna óm ásimawetá.
16 Kopwe fókkun achocho pwe kopwe eú leenien áppirú mi múrinné me emén sense mi múrinné. Kopwe achocho le apwénúetá ekkeei mettóch, pún óm féri ena epwe amanawa pwisin en me pwal chókkewe mi aúseling ngonuk.
Footnote
^ Are “a ussun lemóón kinás mi piin kkar ren och mechá mi sarara.”
^ Ewe popun kapas a néúnéú ikeei, a weneiti ewe sókkun taiso mi fiti metekin inis emén chón fiti urumwot a kan féri.
