Áeúin Taropwe Ngeni Timoty 6:1-21
6 Ekkewe slave repwe sópweeló le asamolu néúr kewe masta seni unusen letiper pwe iten Kot me an káit esap fókkun itengaw.
2 Pwal och, chókkewe mi wor néúr masta iir chón lúkú, resap ésúfélúngawer pún iir pwiir chón lúkú. A lamot repwe fen alapaaló ar angang, pokiten chókkewe mi kúna feiéch seni ar angang múrinné iir chón lúkú me ra áchengicheng.
Kopwe sópweeló le asukula ekkeei mettóch me atoura ekkeei kapasen pesepes.
3 Iká emén a asukula pwal och afalafal me esap tipeeú ngeni ewe kapasen emmwen mi álilliséch, ewe mi feito seni ach Samol Jises Kraist, are ewe afalafal mi tipeeú ngeni ewe manaw mi fich ngeni Kot,
4 i a lamalamtekia me ese weweiti och mettóch. I a fókkun mochen chék ánini me ákkámis wóón kapas. Ekkena mettóch ra efisi lólówó, tipefesen, pweni, ekiekingaw,
5 ánini ese wor múchchún wóón ekkewe mettóch mi chék kisikis án chókkewe mi eáni ekiek mi ngaw me likitaaló ewe enlet, me ra ekieki pwe repwe angei winnen ar eáni ewe manaw mi fich ngeni Kot.
6 Ewer, mi wor watteen winnen ewe manaw mi fich ngeni Kot iká a wor ach menemenéch.
7 Pún ese wor och mettóch sia uwealong lón fénúfan, me ese wor och mettóch sipwe pwal uwawu seni.
8 Ina minne, iká mi wor anach me úfach, sipwe chék menemenéch ren ekkena mettóch.
9 Nge chókkewe mi tipeni ar repwe pisekisek ra turulong lón sóssót me lón eú ssár me chómmóng mettóch mi lamotongaw me mochenia mi efeiengaw, ekkewe mi oturaalong aramas lón kitetter me feiengaw.
10 Pún mochenian moni, ina ewe popun sókkun feiengaw meinisin. Pokiten ei mochenian moni, ekkóch ra riki seni ewe lúkú me ra pwisin atolonger lón chómmóng riáfféú.
11 Nge en, néún Kot chón angang, kopwe sú seni ekkena mettóch. Nge kopwe achocho ngeni minne mi pwúng, eáni ewe manaw mi fich ngeni Kot, lúkú, tong, likiitú, me tipepwetete.
12 Kopwe fiti ewe maun mi múrinné, ewe maunen lúkú. Kopwe apéchékkúla óm ápilúkúlúkún manaw esemuch ewe ka ké fán itan me ewe ka apasaatá kapasen pwáraatá mi múrinné ussun mwen mesen chómmóng chón pwáraatá.
13 Mwen mesen Kot, ewe mi fang manaw ngeni mettóch meinisin, me Kraist Jises, ewe mi apasaatá kapasen pwáraatá mi múrinné mwen mesen Pontius Pailat, úa allúkú ngonuk
14 óm kopwe álleasochisi ewe allúk lón ewe napanap mi limeliméch me esap wor met aramas repwe tipimwáál ngonuk wóón tori pwálóón ach Samol Jises Kraist,
15 ewe Sounemenem mi pwapwa epwe pwáári an nemenem lón ewe fansoun mi kefililó. I Kingen ekkewe king me Samolun ekkewe samol,
16 ewe emén esap tongeni máló, ewe mi nónnóm lón eú leeni* mi saramaram ikewe aramas resap tongeni arap ngeni ie, ewe emén, aramas rese kúna are tongeni kúna. Ling me manaman esemuch epwe nónnóm ren. Amen.
17 Kopwe ereni chókkewe mi pisekisek lón ei ótóten fénúfan* ar resap lamalamtekia, me resap onómu ar ápilúkúlúk wóón wéúúr mi mwittir móróló, nge wóón Kot, ewe mi fangosom ngenikich meinisin ekkewe mettóch mi apwapwakich.
18 Kopwe ereniir ar repwe féfféréch, repwe pisekisek lón ar féffér múrinné, repwe kisáséú, me tipemecheres le fangafangéch,
19 ar féri ena, ra iseis wéúúr lón pekin ngún fán iten eú manaw mi núkúnúkéch lón ekkan fansoun epwe feito pwe repwe tongeni apéchékkúla ar ápilúkúlúkún eáni ewe manaw mi enlet.
20 Timoty, kopwe túmúnú minne Kot a fen lúkú ngonuk. Kopwe atowauakoló seni pwóróusfengen mi lamotongaw mi turunufasa minne mi pin, me seni sile mi chofona mi efisi pwóróusfengen mi ú ngeni minne mi enlet.
21 Ren án ekkóch sikesik wóón ena sókkun sile, iwe ra tokkoló seni ewe lúkú.
Amwo ewe kirekiréch mi somwoló epwe nónnóm remi.
