Ewe Oruuen Taropwe Ngeni Chón Korint 11:1-33
11 Inaamwo iká ussun itá ngang emén mi tiparoch, úa mochen oupwe engiló ngeniei. Nge ren enletin, oua kan engiló ngeniei!
2 Pún ngang úa fókkun chúngúkemi ussun chék án Kot chúngúkemi, pún úa pwisin pwon ngenikemi pwe oupwe pwúpwúlú ngeni ewe Kraist. Úa mochen oupwe fang pwisin ámi ngeni i ussun emén fépwúl mi limeliméch esaamwo tori mwán.
3 Nge úa niwokkus pwe minne a fis ngeni If ewe a tupuló ren ewe serepenit me tipáchem soláán, epwe tongeni fis ngenikemi. Neman emén epwe eingawaló ekiekimi pwe epwe tokkoló seni ewe tong mi liméch me enlet oua meefi fán iten ewe Kraist.
4 Pún iká emén a feito remi me afalafala ussun pwal emén Jises me lúkún ewe áúa afalafala, are oua angei eú ngún me lúkún ewe oua fen angei, are kapas allim me lúkún ewe oua fen etiwa, iwe ámi oua fitaaló i.
5 Pún me rei ese wor met a pwáraatá pwe úa kisikis fán néúmi kewe aposel, ekkewe ussun itá nge iir mi fókkun múrinné.
6 Ikáámwo úse angangéch le kapas, nge ese ina ussui lón sile. Ren enletin, áúa fen affata ngenikemi ei lón mettóch meinisin.
7 Are met, úa féri tipis ren ái átekisonaeitiw pwe oupwe tekiatá, pokiten úa pwapwa le afalafala ngenikemi ewe kapas allim ussun Kot nge úse angei liiwin?
8 Úa etiwa ekkewe álillis seni ekkóch mwichefel, iwe ussun itá nge úa solá seniir pwe úpwe angang ngenikemi.
9 Iwe nge, atun úa nóm remi me a wor met úa osupwangan, úse áweiresi emén leimi, pokiten pwiich kewe mi feito seni Masetonia ra awora met úa osupwangan. Ewer, lón mettóch meinisin úa túmúnúfichi pwe úsapw áweiresikemi, me ina met úpwe sópweeló le féri.
10 Lón úkúúkún ái tapweló mwirin Kraist, esap wor met epwe tongeni eppeti ái eingeing wóón ena lón unusen Akaia.
11 Epwe pwata? Pokiten úse tongekemi? Kot mi silei pwe ngang mi tongekemi.
12 A wor ekkóch ra eingeing me apasa pwe iir aposel ussun chék ám. Iwe, úpwe sópweeló le féri met úa fen féfféri pwe úpwe eppetiir pwe esap wor och popun ar repwe eingeing.
13 Pún ekkena esin mwán iir aposel chofona, chón angang mi otuputup, ra ewilaaló pwisin iir pwe ussun itá iir néún Kraist aposel.
14 Iwe, esap eú minen ámáirú, pún pwisin Setan a kan ewilaaló i ngeni emén chónlángin saram.
15 Ina minne, esap pwal eú minen ámáirú iká néún kewe chón angang ra kan pwal ewilaaló pwisin iir ussun chón angangen minne mi pwúng. Nge sópwólóór epwe lóngólóng wóón ar kewe angang.
16 Úa pwal apasasefálli: Esap wor epwe ekieki pwe ngang mi tiparoch. Nge ikáámwo oua fen ekieki, iwe oupwe chék etiwaei ussun emén mi tiparoch pwe úpwe pwal tongeni ekis eingeing.
17 Ái kapas lón ei atun esap iei napanapen án ewe Samol kapas. Nge úa eingeing ussun án emén mi umwes eingeing.
18 Pokiten chómmóng ra eingeing wóón mettóchun ei fénúfan, ngang úpwe pwal eingeing.
19 Ámi oua ekieki pwe ámi mi fókkun tipáchem, iwe ifa ussun, oua tongeni engiló ngeni ekkewe mi tiparoch?
20 Ren enletin, oua engiló ngeni chókkewe mi néúnikemi chón angang, chókkewe mi angei wéúmi me minne mi nóm remi, chókkewe mi átekiatáái pwisin iir me oputakemi, me chókkewe mi pésapekemi.
21 A mmen ássáw ám apasa ena, pún ussun itá nge ám mi apwangapwang.
Nge iká ekkóch rese sáw le eingeing, iwe pwal ngang úse sáw le eingeing inaamwo iká ekkóch ra ekieki pwe ngang mi tiparoch.
22 Iir chón Ipru? Pwal ngang. Iir chón Israel? Pwal ngang. Iir mwirimwirin Eperiam? Pwal ngang.
23 Iir néún Kraist chón angang? Úa pélúweni ussun ngang emén mi umwes, ngang emén néún Kraist chón angang mi kon lap seniir: Úa féri chómmóng angang lap seniir, úa kalapus fán chómmóng lap seniir, fán fite úa kúna kawet, me fán chómmóng arap ngeni úpwe máló.
24 Fán nimu ekkewe chón Jus ra opuniei fán fáik, áimu eú,
25 fán úlúngát ra wichi ngeniei ekkewe wok, fán eú ra manei ngeniei faw, fán úlúngát a ta me lemataw ewe siip úa fiti, eú pwiin eú rán úa chék nónnóm lemataw.
26 Úa sái fán chómmóng, úa nóm lón efeiengawen chénúpupu, lón feiengaw seni chón solá, lón feiengaw seni pwisin aramasen fénúei, lón feiengaw seni aramasen ekkewe ekkóch mwú, lón feiengaw me lón ewe telinimw, lón feiengaw me lón ewe fénúpéén, lón feiengaw me lemataw, lón feiengaw me lein pwipwi chofona,
27 lón ái angang fán molonei, fán chómmóng úse méúr lepwin, lón echik me kaka, fán chómmóng ese wor enei, lón fansoun patapat me nafangawen úf.*
28 Esap chék ekkena mettóch, nge iteiten rán úa pwal aúrek pokiten meinisin ekkewe mwichefel.
29 Ngang úa weires iká emén a apwangapwang, me ngang úa fókkun song iká emén a efisi án emén epwe péútaaló an lúkú.
30 Iká úpwe eingeing, ngang úpwe eingeing wóón ekkewe mettóch mi pwáraatá ái apwangapwang.
31 Ewe Kot me Semen ewe Samol Jises, ewe Emén sipwe mwareiti tori feilfeiló, a silei pwe úse chofona.
32 Lón Tamasikos ewe governor mi nóm fán nemenien King Aretas, a onómu ekkewe chón mmas ppen ttitin ewe telinimw pwe repwe turufiei,
33 nge pwiich kewe ra senieitiw lón eú pasikit me lón eú asammwachoon etippen ewe telinimw, iwe úa sú seni lepéún.
Footnote
^ Krik, “me lón seleló.”
