Ewe Oruuen Taropwe Ngeni Chón Korint 2:1-17
2 Pún úa fen apwúngaló ái úsapw feilósefál remi pwe oute letipechou.
2 Pún iká úpwe eletipechowukemi, ié epwe chúen apwapwaaei, esap ewe chék úa eletipechowu?
3 Ina popun úa fen mak ngenikemi, pwe lupwen úpwe feiló úsapw letipechou ren chókkewe itá úpwe apwapwaar, pokiten úa lúkúlúk pwe met a apwapwaaei a pwal ngenikemi meinisin ei esin pwapwa.
4 Pún úa mak ngenikemi fán watteen riáfféú me weiresin letipei fiti ssúrún chénún mesei, esap ren ái úpwe eletipechowukemi nge ren ámi oupwe silei úkúúkún péchékkúlen* ái ei tong ngenikemi.
5 Iwe, iká emén a efisi letipechou, i a eletipechowu ámi meinisin, nge esap fen ngang—úse mochen kapas chómmóng wóón ei mettóch.
6 A naf ei kapasen apwúng ei esin aramas a angei seni chómmóng me leimi.
7 Iei oupwele kirekiréch le omusaaló tipisin me oururu i pwe ete kokotiw lón watteen letipechou.
8 Iei minne, úa tingor ngenikemi ámi oupwe alúkúlúkú ngeni pwe oua tongei.
9 Pwal iei popun úa mak ngenikemi, pún úa mochen silei iká oua álleasochis lón mettóch meinisin.
10 Iká oua omusaaló tipisin emén ren minne a féri, úpwe pwal omusaaló i. Ren enletin, ekkewe mettóch úa fen omusaaló (iká úa fen omusaaló och) úa féri fán ásengesimi mwen mesen Kraist,
11 pwe sisap tupuló ren Setan, pún sia silei ekkewe mettóch a kan áeá pwe epwe liapenikich.
12 Iwe, lupwen úa tori Troas pwe úpwe afalafalafeili ewe kapas allim ussun ewe Kraist me a suuk ngeniei eú angang lón ewe Samol,
13 úse tongeni kinamwe pokiten úse kúna pwii we Taitos. Iwe, úa kapwong ngeniir me ló ngeni Masetonia.
14 Nge áúa kilisou ngeni Kot, ewe mi emmwenikich lón eú karis fiti Kraist. A ussun eú karis aramas ra eáni pwe repwe féri apwapwaan win. Ewe sile ussun Kot a ussun och mettóch mi pwoéch me i a áeá ewe angang sia féri pwe aramas ekis meinisin repwe fáreni pwoéchún.
15 Pún me ren Kot, kich ewe pwokkusun Kraist me lein chókkewe repwe kúna manaw pwal me lein chókkewe repwe péútmwááliló.
16 Me ren chókkewe repwe péútmwááliló, iei eú pwoppwonnen* máló mi emmwen ngeni máló, nge me ren chókkewe repwe kúna manaw, iei eú pwokkusun manaw mi emmwen ngeni manaw. Iwe, ié a unusen fichiiti ekkeei mettóch?
17 Ám, pún ám áúse ussun chómmóng aramas mi eáni amémé kapasen Kot. Lupwen áúa afalafal, áúa afalafal fán wenechar, ám néún Kraist chón káé, Kot a ewisa ngenikem ei angang, me áúpwe útá mwen mesen Kot.
