Ewe Oruuen Taropwe Ngeni Chón Korint 6:1-18
6 Lón ám angangfengen me i, áúa pwal pesei ngenikemi pwe ousap etiwa án Kot kirekiréch mi somwoló, mwirin chék alamotongawaaló.
2 Pún a apasa: “Lón eú fansoun fich úa aúseling mweliom, me lón eú ránin amanaw, úa álisuk.” Nengeni! Iei wesewesen ewe fansoun fich. Nengeni! Iei ewe ránin amanaw.
3 Áúse áchepeteki emén, pwe ete wor chón oputa ám angang fán iten Kot.
4 Nge lón mettóch meinisin áúa pwáári pwe ám néún Kot chón angang, lón ám likiitú fán chómmóng sóssót, lón riáfféú, lón fansoun osupwang, lón weires,
5 lón ninni, lón ám kalapus, lón án aramas efitikoko ngenikem, lón ám angang weires, lón ekkóch atun áúse méúr, lón ám echik,
6 lón limeliméch, lón sile, lón mosonottam, lón kirekiréch, lón ngún mi fel, lón tong ese wor likótuputupun.
7 Áúa kapas enlet, áúa lúkúlúk wóón ewe manamanen Kot, áúa kémwéch ekkewe pisekin maunen pwúng peliefichin péúm* me pelieméngún péúm.*
8 Áúa kúna ling me súfélúngaw, áúa kúna esiit me kapasen mwareiti. Aramas ra erá pwe ám chón otuputup nge áúa kapas enlet,
9 áúse sill me ren aramas nge Kot a silekem, áúa ussun aramas epwele máló* nge ám mi chúen manaw, áúa ussun aramas mi kúna apwúng nge áúse ninniiló.
10 Aramas ra ekieki pwe áúa letipechou, nge fansoun meinisin áúa pwapwa, pwe áúa osupwang, nge áúa fang chómmóng mettóch mi múrinné ngeni chómmóng aramas, pwe ese wor och mettóch rem, nge mi fen nóm rem mettóch meinisin.
11 Ámi chón Korint, áúa kapas wenechar ngenikemi, me áúa suukaaló letipem.
12 Ám áúse éppúngaaló letipem senikemi, nge ámi oua éppúngaaló letipemi senikem.
13 Iwe, iei úa kapas ngenikemi, ussun itá nge ámi nei, oupwe pwal suukaaló letipemi.
14 Ousap iokfengen* me ekkewe rese lúkú. Ifa ussun, minne mi pwúng me pwúngúngaw ra tongeni chiechifengen? Are, ifa ussun, a wor met saram me rochopwak ra lélléfengen wóón?
15 Pwal och, ifa ussun, Kraist me Piliel* ra tongeni tipeeúfengen lefiler? Are, ifa ussun, a wor met emén chón lúkú* me emén ese lúkú ra lélléfengen wóón?
16 Me, ese fókkun tufich pwe ekkewe uluulun repwe nóm lón imwenfelin Kot. Kich eú imwenfelin emén Kot mi manaw, ussun chék met Kot a apasa: “Ngang úpwe nónnóm rer me nónnóm lefiler, me ngang úpwe ar Kot, me iir repwe nei aramas.”
17 Jiowa* a pwal apasa: “Ina minne, oupwe towu seni me leir me áimukemiiló seniir me oupwe úkútiw le attapa mettóch mi limengaw”; “iwe, úpwe etiwakemi.”
18 Jiowa,* ewe mi Unusen Manaman, a pwal apasa: “Ngang úpwe wiliiti emén sam ngenikemi, nge ámi oupwe wiliiti nei.”*
Footnote
^ Neman fán iten fiu.
^ Neman fán iten eppetin feiengaw.
^ Are “mi fich ngeni máló.”
^ Are “ririfengen.”
^ A feito seni eú kapasen Ipru mi wewe ngeni “Mi Lamotongaw.” A weneiti Setan.
^ Are “emén mi túppwél.”
^ Krik, “nei mwán me nei fefin.”
