Néún Piter Oruuen Taropwe 3:1-18
3 Ámi mi áchengicheng, iei oruuen nei taropwe úa makkeei ngenikemi, ussun chék nei we áeúin taropwe, úa pwal ngenikemi kapasen áchchem pwe oupwe sópweeló le eáni ekiek mi fataffatéch,
2 pwe oupwe chechchemeni met ekkewe soufós mi pin ra fen apasa me lóóm lóóm me ewe allúk néúmi kewe aposel ra erenikemi mi feito seni ewe Samol, ach Chón Amanaw.
3 Mwen mettóch meinisin, oupwe silei pwe lón ekkewe ránin lesópwólóón ekkewe chón esiit repwe esiita minne mi múrinné, repwe féri pwisin mocheniir
4 me apasa: “I a pwon pwe epwe liwinsefálito rech, iwe, ifa i? Pún seni ewe atun semelapach kewe ra méúrúló lón máló, mettóch meinisin ra chúen ususuur we chék seni ewe atun Kot a féri aramas.”
5 Ra filaatá ar resap chemeni pwe a fen wor ekkewe láng seni lóóm lóóm, me fénúfan a pwáwu me lón ewe konik me a nóm lukanapen ewe konik ren án Kot kapas.
6 Iwe, ren ekkena mettóch, ewe fénúfan lón ena fansoun a taló atun ewe konik a pwélúoló unusen fénúfan.
7 Nge ren chék pwal ena kapas, ekkewe láng me ewe fénúfan mi nóm iei ra iseis ngeni ekkei tori ewe ránin kapwúng me tori ninniilóón ekkewe aramas rese silei Kot.
8 Iwe nge, ámi mi áchengicheng, ousap fókkun ménúki pwe eú rán me ren Jiowa* a wewe ngeni engéréú ier, nge engéréú ier a wewe ngeni eú rán.
9 Jiowa* esap mmang le apwénúetá an pwon ussun met aramas ra ekieki. Nge i a mosonottam ngenikemi pún ese mochen án emén epwe máló, nge a mochen án meinisin repwe áier.
10 Nge ránin Jiowa* we epwe war ussun emén chón solá, iwe, ekkewe láng repwe móróló fiti eú watteen akúrang, nge mettóchun láng me fénúfan repwe teniló ren pwichikkarer, iwe, fénúfan me an kewe angang repwe pwápwááló.
11 Pokiten meinisin ekkena mettóch repwe teniló lón ena esin napanap, oupwe ekieki met sókkun aramas oupwe ussuni. Oupwe eáni féffér mi pin me pwáári lón ámi angang pwe oua túppwél ngeni Kot,
12 lupwen oua witiwiti o ekipwichi* warotoon ránin Jiowa* we, atun án ekkewe láng repwe taló ren ekkei me mettóchun láng me fénúfan repwe teniló ren pwichikkar!
13 Nge ussun met Kot a fen pwonei, sia witiwiti ekkewe láng mi fé me ewe fénúfan mi fé, ikewe pwúng epwe chéchéló ie.
14 Ina minne, ámi mi áchengicheng, pokiten oua witiwiti ekkena mettóch, iwe oupwe fókkun achocho pwe Kot epwe kúna pwe ese wor tikitikipwúlúmi me limengawemi me oua eáni kinamwe.
15 Pwal och, oupwe ekieki pwe án ach Samol mosonottam a wewe ngeni amanaw, ussun chék met pwiich we mi áchengicheng Paul a pwal makkeei ngenikemi ren ewe tipáchem Kot a fang ngeni.
16 Ren enletin, a mak ussun ekkena mettóch lón meinisin néún kewe taropwe. Iwe nge, a wor ekkóch me leir a weires ach sipwe weweiti, me chókkewe mi apwangapwang ar lúkú iir kewe rese weweiti ekkena mettóch ra ámwááliir ussun chék met ra pwal féri ngeni ekkóch kinikinin ewe Taropwe mi Pin, me ena mettóch epwe efisi ninniilóór.
17 Ina minne, ámi mi áchengicheng, pokiten oua fen silei ekkeei mettóch me mwan, iwe oupwe túmúnúkemi pwe oute fitiir le tokkoló ren ekkewe káit mi mwáál án ekkewe aramas mi ngaw, me likitaaló ámi núkúchar lón ámi lúkú.
18 Nge oupwe sópweeló le mámmááritá lón ewe kirekiréch mi somwoló me sile án ach Samol me Chón Amanaw Jises Kraist. I epwe ling iei me tori feilfeiló chék. Amen.
Footnote
^ Are “mwétéresiiti.” Krik, “atapwalaato.”
