Ewe Oruuen Taropwe Ngeni Timoty 1:1-18
1 Paul, emén néún Kraist Jises aposel fán letipen Kot pwe epwe afalafala ewe pwon ussun ewe manaw me ren Kraist Jises,
2 ngeni Timoty, ewe naw mi áchengicheng:
Amwo epwe nónnóm reom kirekiréch mi somwoló, úméúméch, me kinamwe án Kot ewe Sam me Kraist Jises ach Samol.
3 Úa kilisou ngeni Kot, ewe úa angang ngeni ussun chék án semelapei kewe angang ngeni, me fán mwelien letipei mi liméch, úa kan chechchemenuk lón ái iótekin tingor lerán me lepwin.
4 Atun úa chechchemeni ssúrún chénún mesom, úa fókkun mochen kúnók pwe úpwe pwapwa.
5 Pún úa chemeni óm lúkú ese wor likótuputupun, ewe úa akkomw kúna seni inom we chinnap Lois me inom we Iunis, me úa lúkúlúk pwe ka chúen eáni ena esin lúkú.
6 Iei popun úa áchchema ngonuk óm kopwe sópweeló óm tinikken le áeá ewe liffang me ren Kot, ewe ka angei atun úa isettá peei wóóm.
7 Pún ewe ngún mi fel* Kot a fang ngenikich ese uwaani niwokkus, nge a uwaani manaman, tong, me ekiekéch.
8 Ina popun kosap sáwásini óm afalafala ussun ach we Samol are sáwásiniei, ngang ewe mi kalapus fán itan, nge kopwe mmólnetá le kúna riáfféú fán iten ewe kapas allim ren óm lúkúlúk wóón manamanen Kot.
9 I a selánikich me kérikich ach sipwe chón pin, esap pokiten ach angang, nge pokiten minne a tipeni me an kirekiréch mi somwoló. A pwáári ngenikich an kirekiréch mi somwoló me ren Kraist Jises seni fansoun lóóm lóóm.
10 Nge iei a ffatoló me ren pwálóón ach Chón Amanaw, Kraist Jises, ewe mi amóeló máló me pwáár ngenikich me ren ewe kapas allim ussun ach sipwe eáni eú manaw me eú inis esap tongeni mwotukotukóló,
11 pwe ngang úa kefilitá ái úpwe emén chón afalafal, emén aposel, me emén sense.
12 Iei popun úa pwal kúna riáfféú ren ekkena mettóch, nge úse sáw ren. Pún ngang úa silei ewe Emén úa lúkú, me úa lúkúlúk pwe i a tongeni túmúnú minne úa lúkú ngeni tori ena rán.
13 Kopwe ákkeáni minen kaúk ekkewe kapas mi álilliséch ka rong seniei fiti lúkú me tong, ekkewe mi nóm ren Kraist Jises.
14 Ren álillisin ewe ngún mi fel mi nónnóm rech, kopwe túmúnú ekkeei mettóch mi aúchea ka fen angei.
15 En ka silei pwe meinisin chókkewe mi nóm lón ewe fénú Eisia ra likitieiló, kapachelong Fikelus me Ermokenes.
16 Amwo ewe Samol epwe úméúméch ngeni chón leimwen Onesiforus, pún fán chómmóng a kan akkapéchékkúlaei, me i ese sáwásiniei inaamwo iká úa féfé lón kalapus.
17 Ren enletin, lupwen a nóm Rom, a fókkun achocho le kúttaei tori an kúnaei.
18 Amwo ewe Samol Jiowa* epwe úméúméch ngeni lón ena rán. En ka silefichi meinisin met a féri fán itei me lón Efisus.
