Ewe Oruuen Taropwe Ngeni Timoty 3:1-17
3 Nge kopwe silei pwe fansoun mi áweires me efeiengaw repwe war lón ekkewe ránin lesópwólóón.
2 Pún aramas repwe tongei pwisin iir, tongei moni, sikesik, tipetekia, turunufas, álleasolapa sam me in, resap sile kilisou, resap túppwél,
3 esap wor ar tong, repwe tipeférea, repwe chón pweni, resap tongeni nemeni pwisin mocheniir, repwe mwacho, repwe oput minne mi múrinné,
4 repwe chón afangemá, úneférea, lamalamtekia, repwe aúcheani pwapwaan pwisin letiper nge resap tongei Kot,
5 repwe pwomweni pwe iir chón fel ngeni Kot, nge resap pwáári lón manawer. Kopwe fókkun sú seni ekkeei sókkun aramas.
6 Ekkóch me leir ra otuputup me repwe ánnifelong lón imwen ekkewe fefin mi tupukkái me choutiw ren tipis me otupwaaló letiper. Ekkena fefin ra chék akkapwénúetá mochenin letiper,
7 ra kákkáé iteitan nge resap fókkun tongeni tikeri ewe sile mi pwúng ussun ewe enlet.
8 Chókkana ra pwal ú ngeni ewe enlet, ussun chék án Jannes me Jampres ú ngeni Moses. A fókkun limengaw ekiekin ekkena esin aramas me iir rese nóm fán án Kot chen pokiten ra ú ngeni minne sia lúkú.
9 Ina minne, resap fókkun sópwéch ussun chék ekkena rúúemén mwán, pún féfférúr mi umwes a pwápwááló ngeni aramas meinisin.
10 Nge en ka áppirúfichi met úa eáni káit, napanapen manawei, met úa achocho ngeni, ái lúkú, ái mosonottam, ái tong, ái likiitú,
11 ái riáfféúmwáál me weires ussun ekkewe mi toriei me lón Antiok, Ikonium, me Listra. Úa likiitú fán ekkena riáfféúmwáál me ewe Samol a angasaeiló seniir meinisin.
12 Ren enletin, iir meinisin mi mochen angang ngeni Kot fán túppwél me ákkáppirú Kraist Jises, repwe pwal kúna riáfféúmwáál.
13 Nge ekkewe aramas mi ngaw me chón otuputup epwe chék lallapoló ngawer, repwe otupu aramas me iir repwe pwal pwisin tupuló.
14 Iwe, kopwe sópweeló le apwénúetá minne ka fen káé me met aramas ra alúkúlúkú ngonuk óm kopwe lúkú, pún ka silei ié ka fen káé seni ekkena mettóch,
15 me seni chék leménúkolum ka fen silei masouen ekkewe taropwe mi pin, ekkewe mi tongeni etipáchemak fán iten óm kopwe kúna manaw pokiten ka lúkú Kraist Jises.
16 Meinisin masouen ekkewe Taropwe mi Pin ra pop seni Kot me ra álilliséch fán iten asukul, fén, áwena minne mi mwáál, emirit lón minne mi pwúng,
17 pwe chón angang ngeni Kot repwe unusen lipwákéch me tufich lón sókkun angang múrinné meinisin.
