Ewe Oruuen Taropwe Ngeni Timoty 4:1-22
4 Mwen mesen Kot me Kraist Jises, ewe epwe apwúngú ekkewe mi manaw me ekkewe mi máló atun epwe pwááló me nemenem lón ewe Mwú, iei met úa allúkú ngonuk:
2 Kopwe afalafala ewe kapas, kopwe tinikken le esilefeili lón fansoun kinamwe me fansoun weires. Kopwe féri angangen apwúng, fén, pesepes, fán unusen óm mosonottam me lipwákéch le asukul.
3 Pún epwe wor ewe fansoun resap mochen aúseling ngeni ekkewe afalafal mi múrinné,* nge repwe fitaaló pwisin mocheniir ren ar kútta ekkewe sense repwe áiti ngeniir met ra mochen rongorong.
4 Repwe kul seni ewe enlet me aúseling ngeni ekkewe túttúlap mi chofona.
5 Nge en, kopwe áeá óm tufichin ekiek lón mettóch meinisin, likiitú lón fansoun weires, sópweeló le afalafala ewe kapas allim, me unusen apwénúetá óm angang ngeni Kot.
6 Ngang úa ussun eú asoren ún mi niniiló wóón ewe róngen asor, me a chék arapoto ái fansoun ngaseló.
7 Úa fen fiti ewe maun mi múrinné, úa fen fiti ewe kitir tori wesilóón, úa apwénúetá ekkewe mettóch sia lúkú.
8 Seni iei feiló, a fen iseis fán itei ewe mwárin pwúng, ewe mwárámwár ewe Samol, ewe soukapwúng mi pwúng, epwe liffang ngeniei lón ena rán, esap chék ngeniei, nge pwal ngeni meinisin chókkewe mi ésúkúsúkú pwálóón.
9 Kopwe achocho ngeni óm kopwe mwittirito rei.
10 Pún Timas a likitieiló pokiten a tongei ei ótóten fénúfan* me a ló Tesalonika, nge Kresens a ló Kalesia, nge Taitos a ló Talmatia.
11 Luk chék a nóm rei. Kopwe lukeato Mark pún a mmen álilliséch ngeniei lón ái angang ngeni Kot.
12 Nge úa fen tiinaaló Tikikos ngeni Efisus.
13 Lupwen ka etto, kopwe uweato úfei we úféúfen patapat úa likitaaló ren Karpus lón Troas, me ekkewe puk,* nge ákkáeúin ekkewe silin man mi mmólnetá fán iten mak.
14 Aleksanter, emén chón ffér pisek seni piras, a fókkun eriáfféúei. Jiowa* epwe liiwini ngeni liwinin an féffér.
15 En kopwe pwal túmúnuk seni, pún a fókkun luluuló an ú ngeni minne áúa afalafala.
16 Lón ewe áeúin atun úa pwisin peniei lón pekin kapwúng, ese wor emén a peniei. Iir meinisin ra likitieiló. Amwo resap angei chappen ar féffér.
17 Nge ewe Samol a útá únúkki me a apéchékkúlaei, pwe ren ngang, ewe angangen afalafal epwe unusen pwénútá me meinisin chón ekkewe mwú repwe rong ussun. A pwal selániei seni leawen laion.
18 Ewe Samol epwe selániei seni angang mi ngaw meinisin me epwe uweieiló ngeni Mwúún we lón láng. I epwe ling tori feilfeiló chék. Amen.
19 Kopwe ngeni Priska me Akwila ái kapwong me pwal chón leimwen Onesiforus.
20 Erastus a nómotiw Korint, nge úa likitaaló Trofimus lón Mailitus pún a semmwen.
21 Kopwe fókkun achocho ngeni óm kopwe tiketo me mwen fansoun patapat.
Eupulus, Putens, Linus, Klautia, me meinisin pwiich keei ra tiinaaló ar kapwong ngonuk.
22 Ewe Samol epwe efeiéchú ewe napanap mi múrinné ka pwáári. Amwo an we kirekiréch mi somwoló epwe nónnóm remi.
