Minne Ekkewe Aposel Ra Féri 10:1-48
10 Iwe, a wor emén mwán lón Seseria itan Kornelius, emén meilapen soufiu* lón ewe kinikin a iteni soufiun Italy.*
2 Kornelius i emén mi niwokkusiti Kot me a fel ngeni i lón imwan we fiti meinisin chón an we famili, me i a eáni chómmóng liffangen úméúméch ngeni aramas me a kan ikkiótek ngeni Kot.
3 Ina epwe lón ewe etiuen kulókun ewe rán,* i a kúnaéchú me lón kúnaan emén néún Kot chónláng a feito ren me apasa: “Kornelius!”
4 Fán niwokkus Kornelius a newenewen ngeni, me apasa: “Ngang iei, Samol.” I a ereni: “Kot a rongorong ngeni óm kewe iótek me a kúna óm álilliséch ngeni ekkewe mi osupwang.
5 Iwe, iei kopwe tiinaaló ekkóch mwán ngeni Joppa me kérato emén mwán itan Simon ewe mi iteni Piter.
6 Ei mwán emén waséla a nóm ren Simon, emén chón angang ngeni silin man, ewe a wor imwan órosset.”
7 Atun chék ewe chónláng mi fós ngeni a ló seni, i a kéri rúúemén me lein néún kewe chón angang me emén soufiu mi niwokkusiti Kot,
8 me a apwóróusa ngeniir mettóch meinisin me tiiniireló ngeni Joppa.
9 Lón ewe rán mwirin, atun ra sássái me arap ngeni ewe telinimw, Piter a tétá wóón ewe imw pwe epwe iótek, ina epwe lón ewe awonuen kulók.*
10 Iwe, i a fókkun echik me a mochen mwéngé. Iwe, atun ra ammólnatá ewe mwéngé, a wor kúnaan
11 me a kúna láng a suukuló me och mettóch a feitiw ussun chék eché chéwatteen mangaak mi úrútiw me rúáánú lepwokukuun wóón fénúfan,
12 nge a wor lón, meinisin sókkun man wóón fénúfan mi wor fófóch pecher me man mi té wóón upwer* me machchang fán láng.
13 Mwirin, eú méngúngú a apasa ngeni: “Piter, kopwe útá, nireló me ochooch!”
14 Nge Piter a apasa: “Aapw Samol, úse tongeni féri ena pún ngang úse mwémmwéngé mettóch mi pinepin me limengaw me ren allúk.”
15 Iwe, ewe méngúngú a pwal kapas ngeni lón oruuen fansoun: “Kopwe úkútiw le apasa pwe a limengaw ekkewe mettóch Kot a fen eliméchúroló.”
16 A fis ei fán úlúngát, me mwittir chék minne Piter a kúna a úrútá lón láng.
17 Atun Piter a chúen osukosuk ussun met weween kúnaan we, ekkewe mwán mi tiitiito me ren Kornelius ra eis imwen Simon me ra útá únúkkún ewe ttit.
18 Ra kékké me eis iká Simon ewe mi iteni Piter a waséla ikena ie.
19 Atun Piter a chúen ekiekifichi ussun kúnaan we, ewe ngún mi fel a apasa: “Nengeni! Úlúmén mwán ra eis en.
20 Iwe, kopwe útá, kopwe tétiw fan me fitiireló, kosap fókkun tipemwárámwár, pún ngang úa tiiniireto.”
21 Mwirin, Piter a feitiw fan ren ekkewe mwán me a apasa: “Ngang iei, ena oua kútta. Pwata oua etto ikeei?”
22 Ra apasa: “Kornelius, emén meilapen soufiu, emén mwán mi pwúng me niwokkusiti Kot, ewe mwán ekkewe chón Jus meinisin ra kapaséch ussun, a angei emmwen seni Kot me ren emén chónláng mi pin pwe epwe tiiti en óm kopwe feito ngeni imwan me epwe aúseling ngeni minne kopwe apasa.”
23 Iwe, a etiwerelong me ra waséla ikena.
Iwe, lón ewe rán mwirin, a ammólnatá me a fitiireló, nge ekkóch me lein chienan kewe chón lúkú seni Joppa ra eti i.
24 Lón ewe rán mwirin ena, i a tori lón Seseria. Nge Kornelius a chék ésúkúsúkúúr me a fen kérfengeni aramasan kewe me chiechian kewe.
25 Atun Piter a war, Kornelius a towu pwe epwe chuuri i, a fótopwúkútiw mwen i me asamolu* i.
26 Nge Piter a aútáái, a apasa: “Kopwe útá. Ngang chék pwal emén aramas.”
27 Lupwen a kakkapas ngeni, i a tolong me a kúna chómmóng aramas mi mwichfengen.
28 I a ereniir: “Oua fókkun silei pwe ese fókkun mumutá me ren allúk án emén chón Jus epwe chiechi ngeni are chuuri emén aramasen ekkewe ekkóch einang. Nge Kot a pwáár ngeniei pwe úsapw onómu emén aramas lón tettelin limengaw.
29 Ina popun úa feito, ese fókkun wor ái tipemwárámwár atun oua tiiti ngang. Iei minne, úpwe eisinikemi iká pwata oua tiiti ngang.”
30 Iwe, Kornelius a apasa: “Rúáánú rán a ló, állea seni ei kulók, ngang úa iótek lón imwei ei lón ewe etiuen kulók.* Mwirin emén mwán mi úféúf úf mi saramaram a útáló mwei,
31 me a apasa: ‘Kornelius, Kot a rongorong ngeni óm iótek, me a chechchemeni óm kewe liffangen úméúméch.
32 Ina minne, kopwe tiinaaló ekkóch mwán ngeni Joppa me kérato Simon ewe mi iteni Piter. Ei mwán emén waséla lón imwen Simon we órosset, emén chón angang ngeni silin man.’
33 Iwe, mwittir chék úa tiiti en, me a fókkun éch pwe ka feito ikeei. Iei minne, ám meinisin áúa nóm mwen mesen Kot pwe áúpwe aúseling ngeni meinisin ekkewe mettóch Jiowa* a allúkú ngonuk óm kopwe apasa.”
34 Mwirin, Piter a poputá le kapas, a erá: “Iei úa enletin weweiti pwe Kot ese lifilifil aramas,
35 nge lón iteiten mwú meinisin, emén mi niwokkusiti i me féri minne mi pwúng, a ketiw me ren.
36 A tiinaaló ewe kapas ngeni ekkewe chón Israel pwe repwe esile ngeniir ewe kapas allim ussun kinamwe me ren Jises Kraist—ei emén i Samolun meinisin.
37 Oua silei ewe pwóróus aramasen lón unusen Jutia ra pwóróusfengen wóón, poputá seni Kalili mwirin ewe papatais Jon a afalafala:
38 ussun Jises seni Nasaret, ussun án Kot epiti ren ewe ngún mi fel me ngeni i manaman, me a fetálfeil lón ewe fénú me féri féffér mi múrinné me echikara meinisin chókkewe mi kúna riáfféú seni ewe Tefil, pokiten Kot a nónnóm ren.
39 Me ám chón pwáraatá ussun ekkewe mettóch meinisin i a féri lón fénúen ekkewe chón Jus pwal lón Jerusalem, nge ra nieló i ren ar eitiwaatá wóón efóch irá.
40 Lón ewe aúlúngátin rán Kot a amanawaatá i me a mut ngeni án aramas repwe kúna i.
41 I ese mut ngeni meinisin ar repwe kúna i nge kich chék ekkewe mi mwéngé me ún ren i mwirin an manawetá seni máló. Kich sia fen kefilitá me ren Kot me mwan pwe sipwe kúna i me kapas ussun i.
42 Pwal eú, i a allúkú ngenikich ach sipwe afalafal ngeni aramas me áweweéchú pwe iei i ewe emén mi kefilitá me ren Kot an epwe wisen soukapwúng wóón ekkewe mi manaw me ekkewe mi máló.
43 Ekkewe soufós meinisin ra pwáraatá ussun i, pwe meinisin mi lúkú lón i repwe kúna omusomusen ar tipis ren itan we.”
44 Atun Piter a chúen kakkapas ussun ekkeei mettóch, ewe ngún mi fel a feitiw wóón meinisin chókkewe mi aúseling ngeni ewe kapas.
45 Iwe, ekkewe chón lúkú mi sirikomsais* mi fitato Piter, ra mwaar pokiten ewe liffang ese kamé, ewe ngún mi fel, a pwal ninitiw wóón aramasen ekkewe ekkóch mwú.
46 Pún ra rong ar kapas lón ekkóch kapasen ekis me mwareiti Kot. Mwirin, Piter a apasa:
47 “Ekkeei aramas ra angei ewe ngún mi fel ussun chék kich, ina minne, ié a tongeni apasa pwe resap tongeni papatais lón konik?”
48 Ren ena, a ereniir ar repwe papatais lón iten Jises Kraist. Mwirin, ra tingorei an epwe nónnóm rer ekkóch rán.
Footnote
^ Are “emén senturion,” mi nemenem wóón 100 soufiu.
^ Eú mwichen soufiun Rom mi wor 600 soufiu lón.
^ Ina epwe 3:00 p.m.
^ Ina epwe 12:00 leolowas.
^ Are “serepenit me kúúen.”
^ Are “chapetiw ngeni.”
^ Ina epwe 3:00 p.m.
^ Are “ekkewe mi túppwél.”
