Minne Ekkewe Aposel Ra Féri 12:1-25
12 Lón ena fansoun, King Erot a poputá le kirikiringaw ngeni ekkóch me lein chón ewe mwichefel.
2 I a nieló Jemes, pwiin Jon we, ren ketilas.
3 Lupwen a kúna pwe a apwapwa ngeni ekkewe chón Jus, i a pwal aresini Piter. (A fis ei lón ekkewe ránin ewe Pilawa Ese Lefen.)
4 A turufi i me oturaalong lón imwen kalapus, iwe, rúáánú kúmiin soufiu, ákkáfémén lón, ra nikewiwi le mammasa i, me a ekiekin uwawu* mwen ekkewe aramas mwirin ewe Pasofer.
5 Iwe, atun Piter a nónnóm lón kalapus, ewe mwichefel a tittingormaw ngeni Kot fán ásengesin i.
6 Lón ewe pwinin me mwen án Erot epwele uwawu Piter, i a méúr nge mi féfé ngeni ruuofóch sein lefilen rúúemén soufiu, me ekkewe chón mmas ra nóm ppen ewe asam pwe ra mammasa ewe imwen kalapus.
7 Nge nengeni! Néún Jiowa* we chónláng a útáló ikena ie me eú saram a asarama ikewe Piter a nóm ie. A pisiri lepekin Piter, a féngúni, a apasa: “Kopwe mwittir pwáátá!” Iwe, ekkewe sein ra turutiw seni péún kewe.
8 Ewe chónláng a ereni: “Kopwe úféúf me néúnéúlong ipwom kana.” Iwe, a féri. Mwirin, a ereni: “Úféúfetá úfom na úféúfen lúkún, me tattapwoto mwiri.”
9 Iwe, a towu me tattapweló mwirin, nge ese silei pwe met a fis me ren ewe chónláng, wesewesan. Ren enletin, tittipan nge a kúna eú lángipwi.
10 Atun ra lu seni ewe áeúin mwichen chón mmas me ewe oruuan, ra tikeri ewe asam mechá ngeni ewe telinimw, me a pwisin suukuló ngeniir. Mwirin ar towu, ra feitiw ngeni efóch al, iwe, mwittir chék ewe chónláng a ló seni i.
11 Mwirin án Piter mirititi met ewe a fis, a apasa: “Iei úa wesewesen silei pwe Jiowa* a tiinaato néún we chónláng me angasaeiló seni lepéún Erot me seni mettóch meinisin ekkewe chón Jus ra ekieki pwe epwe fis ngeniei.”
12 Mwirin an mirititi ei, a feiló ren imwen Meri inen Jon ewe mi iteni Mark, ikewe ekkewe ekkóch ra chufengen ie me ikkiótek.
13 Lupwen a fichifich wóón ewe asam, emén chón angang fépwúl itan Rota a feiliwu pwe epwe ppii ié na.
14 Atun a esilla léúwen Piter, i a fókkun pwapwa, iwe ese fen chúen suuki ewe asam nge a fen ssálong me apwóróusa pwe Piter a útá ppen ewe asam.
15 Ra ereni neminna: “A turu sonuk óm ekiek.” Nge i a ánicholó pwe fen i ewe. Ra poputá le apasa: “Ina i néún chónláng.”
16 Nge Piter a chék nónnóm ikena me fichifich. Atun ra suuki ewe asam, ra kúna i me ra máirú.
17 Nge a pomwe ngeniir ar repwe fanafaneló me a ereniir tichikin án Jiowa* atowu i seni ewe imwen kalapus, me a apasa: “Oupwe apwóróusa ekkeei mettóch ngeni Jemes me ekkewe pwal ekkóch mwán.” Mwirin, a towu me feiló ngeni pwal eú leeni.
18 Iwe, atun a rániló, a wor watteen osukosuk lein ekkewe soufiu iká met a fis ngeni Piter.
19 Erot a kúttafichi i, nge ese tongeni kúna, iwe, a chosani ekkewe chón mmas me a allúkú pwe repwele angei kapwúngúúr. Iwe, i a feitiw seni Jutia ngeni Seseria me a nónnóm ikena ekis fansoun.
20 Iwe, a fókkun song ren ekkewe aramasen Tair me Siton, ina minne, ra feito ren eú chék popun. Ra tingormaw ngeni Plastus, ewe emén mi wisen túmúnú imwen ewe king* an epwe álisiir, iwe ra fós ngeni ewe king pwe epwe fis kinamwe. Aramasen ekkeei fénú ra kan kakkamé mwéngé seni ekkewe leeni mi nóm fán nemenien Erot.
21 Lón eú rán mi kefililó, Erot a foutei ngeni och sókkun úf mi kon ling me móót wóón ewe leenien móótun apwúng me a poputá le afalafal ngeni ekkewe aramas.
22 Iwe, ekkewe aramas mi mwichfengen ra poputá le kékké fán léúwommóng: “Léúwen emén kot, nge esap emén aramas!”
23 Mwittir chék, néún Jiowa* we chónláng a efisi án ekkewe métté repwe ocheei Erot me i a máló pokiten a angei ewe ling mi chék fich ngeni Kot.
24 Nge án Jiowa* kapas a chéúfetál me a chómmóngoló aramas ra lúkú.
25 Mwirin án Parnapas me Saul uwealó ewe álillis ngeni pwiir kewe lón Jerusalem, ra liwin nge ra uwei Jon ewe emén mi pwal iteni Mark.
