Minne Ekkewe Aposel Ra Féri 13:1-52
13 Iwe, a wor ekkewe soufós me sense lón ewe mwichefel lón Antiok: Parnapas, Simion ewe mi iteni Niker, Lusius seni Sairine, Manaen chienen Erot we le sukul, ewe sounemenem wóón eú fénú, me Saul.
2 Lupwen ra angang ngeni Jiowa* me echikefel, ewe ngún mi fel a apasa: “Oupwe áimuoló Parnapas me Saul fán iten ewe angang úa kériir ngeni.”
3 Iwe, mwirin ar echikefel me iótek, ra isettá péúr wóór me tiiniireló.
4 Iwe, ekkeei mwán mi tiitiiló me ren ewe ngún mi fel, ra feitiw ngeni Selusia, me seni ikena ie ra sáiló ngeni Saipros.
5 Lupwen ra tori Salamis ra poputá le afalafala ewe kapasen Kot lón án ekkewe chón Jus kewe sinakok. Jon a pwal etiir pwe emén chón álillis.
6 Lupwen ra fetálfeil lón unusen ewe fénú tori Pafos, ra chuuri emén re Jus itan Par-Jises, i emén sourong me emén soufós chofona.
7 A nóm ren ewe governor, Serkius Paulus, emén mi tipáchem. Ei mwán a kérato Parnapas me Saul pún a fókkun mochen rongorong ewe kapasen Kot.
8 Nge ena sourong, ewe mi pwal iteni Elimas (weween emén sourong) a poputá le ú ngeniir, a sótun okullu ewe governor seni ewe lúkú.
9 Iwe Saul, pwal itan Paul, a uroló ren ewe ngún mi fel, a newenewen ngeni
10 me apasa: “En emén mi ur ren sókkopaten chofona me sókkopaten féfféringaw, en néún ewe Tefil, en chón oputa mettóch meinisin mi pwúng, pwata ka siwili án Jiowa* kewe káit mi pwúng?
11 Nengeni! Péún Jiowa* a nóm wóóm, me en kopwe chuun, kosap chúen kúna saram ren och fansoun.” Iwe, mwittir chék mesan kewe ra topuló me rocholó, me a fetálfeil me sótun kútta emén epwe emmweni ren an kémwéch péún.
12 Iwe, atun ewe governor a kúna met a fis, a wiliiti emén chón lúkú pokiten a mwaar ren ekkewe mettóch a káé ussun Jiowa.*
13 Iwe, Paul me chienan kewe ra sái leset seni Pafos me ra wareiti Perka lón Pamfilia. Nge Jon a likitiireló me liwiniti Jerusalem.
14 Iwe nge, ra sái seni Perka me ló ngeni Antiok lón Pisitia. Me lón ewe ránin Sapat ra tolong lón ewe sinakok, ra móttiw.
15 Mwirin álleawuun ewe Allúk me minne ekkewe Soufós ra makkeei, ekkewe néúwisin ewe sinakok ra tiinaawu alor ngeniir, ra apasa: “Ámi pwiim kana, iká mi wor ámi kapasen apéchékkúl ngeni ekkeei aramas, oupwe apasawu.”
16 Iwe, Paul a útá, me a pomwe ngeniir ar repwe mosonosonoló, a apasa:
“Ámi chón Israel me ámi kana pwal ekkóch mi niwokkusiti Kot, oupwe aúseling.
17 Ewe Koten ekkeei aramasen Israel a filaatá semelapach kewe, me a átekiatá ekkewe aramas atun ra chón ekis lón ewe fénú Isip, me ren péún mi manaman a uweiirewu seni ikena ie.
18 Ren úkúúkún ina epwe 40 ier, i a chék engiló ngeniir me lón ewe fénúpéén.
19 Mwirin an ataieló fisu mwú lón ewe fénú Kenan, i a ngeni semelapach kana fénúer kewe pwe eú álemwir.
20 Meinisin ekkena ra fis ina epwe lón 450 ier.
“Mwirin ei, a ngeniir soukapwúng tori fansoun ewe soufós Samuel.
21 Nge mwirin ra mochen epwe wor néúr king, iwe Kot a ngeniir Saul néún Kis we, emén mwán lón ewe einangen Peniamin, an epwe nemenem wóór ren 40 ier.
22 Mwirin an atowu i, a filaatá Tafit pwe epwe ar king, ewe i a apasa ussun: ‘Úa kúna Tafit néún Jesi we, ewe mwán mi apwapwaai letipei. I epwe féri mettóch meinisin úa tipeni.’
23 Seni mwirimwirin ei mwán, Kot a wato ngeni Israel emén chón amanaw, Jises, ussun minne a fen pwonei.
24 Me mwen warotoon ena emén, Jon a afalafala ngeni aramasen Israel meinisin ussun papatais pwe esissillen áier.
25 Nge lupwen a arapakkan án Jon epwele áwesaaló an angang, i a kan apasa: ‘Ié oua ekieki pwe ngang? Esap ngang i. Nge nengeni! Ewe emén epwe feito mwiri ese fich ngeniei ái úpwe epichi féféén ipwan kewe wóón pechen.’
26 “Ámi pwiim kana, mwirimwirin án Eperiam we famili, me ekkewe pwal ekkóch leimi mi niwokkusiti Kot, ewe pwóróus ussun ei amanaw a fen tiitiito rech.
27 Pún ekkewe aramasen Jerusalem me néúr kewe sounemenem rese etiwa ei emén, nge lupwen ra apwúngú i, ra apwénúetá ekkewe mettóch ekkewe Soufós ra kapas ussun, ekkewe ra álleawu iteiten sapat.
28 Inaamwo iká rese kúna och popun an epwe máló, nge ra mochen án Pailat epwe nieló i.
29 Me lupwen ra apwénúetá meinisin ekkewe mettóch mi fen makketiw ussun i, ra ettatiw me wóón ewe irá me waalong lón eú peiás.
30 Nge Kot a amanawasefáli seni máló,
31 iwe, ren chómmóng rán a pwááló ngeni chókkewe mi fiti seni lón Kalili feitá tori lón Jerusalem. Iei chókkana ra néún chón pwáraatá ngeni aramas.
32 “Iwe, áúa esile ngenikemi ewe kapas allim ussun ewe pwon Kot a ngeni semelapach kewe.
33 Kot a unusen apwénúetá ena ngenikich néúr kewe, ren an amanawasefáli Jises, ussun chék met a makketiw lón ewe oruuen kélfel: ‘En nei át, ikenái úa wiliiti semom.’
34 Kot a amanawasefáli i seni máló pwe esap fókkun chúen inisini inisin aramas mi tongeni máló me ngawoló. Kot a alúkúlúkú pwe mi enlet ei lupwen a apasa: ‘Ngang úpwe túppwél le pwáár ngenikemi ewe tong enlet úa pwon ngeni Tafit.’
35 Lón pwal eú kélfel a pwal apasa: ‘En kesap mut ngeni futuken noum we mi túppwél an epwe ngawoló.’
36 Nge Tafit a angang ngeni Kot* lón ánein manawan, a méúrúló lón máló, a peiás ren semelapan kewe, nge inisin a ngawoló.
37 Nge inisin ewe emén Kot a amanawaatá, ese ngawoló.
38 “Iei minne ámi pwiim kana, oupwe silei pwe ren ei emén, Kot epwe omusaaló ámi kewe tipis.
39 Ewe Allúkún Moses ese tongeni féri ámi oupwe chón pwúng, nge pokiten málóón ei mwán, Kot epwe kér ngeni meinisin mi lúkú, chón pwúng.
40 Ina minne, oupwe túmúnú pwe met makkeien ekkewe Soufós a apasa esap nóm wóómi. A apasa:
41 ‘Ámi chón turunufas, ou katol, oupwe rúké me máló, pún úa féri eú angang lón ámi ei fansoun, eú angang ousap tongeni lúkú inaamwo iká emén epwe apwóróusa ngenikemi tichikin.’ ”
42 Iwe, atun repwele towu, ekkewe aramas ra tingormaw ngeniir ar repwe kapas ussun ekkeei mettóch lón ewe Sapat mwirin.
43 Iwe, mwirin sárin ewe mwiich lón ewe sinakok, chómmóng me lein ekkewe chón Jus me ekkewe chón lúkún Israel mi fiti lamalamen chón Juta, iir mi fel ngeni Kot, ra tapweló mwirin Paul me Parnapas. Atun ra kapas ngeni ekkena aramas, ra peseer pwe repwe nónnóm lón án Kot kirekiréch mi somwoló.
44 Lón ewe Sapat mwirin, arap ngeni meinisin chón ewe telinimw ra chufengen pwe repwe rongorong ngeni án Jiowa* we kapas.
45 Lupwen ekkewe chón Jus ra kúna ewe mwichen aramas, ra fókkun lólówó me poputá le ú ngeni Paul me turunufasei ekkewe mettóch a apasa.
46 Mwirin, Paul me Parnapas ra ereniir fán pwora: “A lamot pwe ewe kapasen Kot epwe akkomw torikemi. Nge pokiten ouse etiwa me ouse ekieki pwe oua fich ngeni manaw esemuch, nengeni! áúa sápe ngeni aramasen ekkewe ekkóch mwú.
47 Pún Jiowa* a allúkú ngenikem lón ekkeei kapas: ‘Ngang úa seikuketá pwe kopwe ussun eú saram ngeni aramasen ekkewe ekkóch mwú, pwe kopwe eú amanaw ngeni unusen fénúfan.’ ”
48 Lupwen chón ekkewe pwal ekkóch mwú ra rong ei, ra poputá le pwapwa me mwareiti án Jiowa* we kapas, me meinisin chókkewe letiper a páengeni ar repwe etiwa ewe enlet mi awora manaw esemuch, ra wiliiti chón lúkú.
49 Pwal och, án Jiowa* we kapas a chéúfetál lón unusen ewe fénú.
50 Nge ekkewe chón Jus ra asongaatá ekkewe fefin mi iteféúló mi niwokkusiti Kot me ekkewe mwán mi aúchea lón ewe telinimw, me efisi riáfféúmwáállin Paul me Parnapas me otururowu lúkún kiánin telinimwer we.
51 Ina minne, ra wichikaaló ewe pwúl wóón pecher pwe epwe eú minen éúréúr ngeniir, mwirin ra feiló ngeni Ikonium.
52 Iwe, a chék sópwósópwoló án ekkewe chón káé ur ren pwapwa me ngún mi fel.
Footnote
^ Are “féri letipen Kot.”
