Minne Ekkewe Aposel Ra Féri 14:1-28
14 Iwe, me lón Ikonium ra mwinelong lón án ekkewe chón Jus we sinakok me ra kapas lón eú sókkun napanap pwe eú mwichemmóngun chón Jus me Krik ra wiliiti chón lúkú.
2 Nge ekkewe chón Jus rese lúkú, ra asongaatá me etipetipa aramasen ekkewe ekkóch mwú ar repwe ú ngeni Paul me Parnapas.
3 Ina minne, ra awora watteen fansoun le afalafal fán pwora pokiten án Jiowa* atufichiir, ewe mi pwáraatá pwóróusen an kirekiréch mi somwoló ren an mut ngeniir ar repwe féri esissil me manaman.
4 Iwe nge, ekkewe aramas lón ewe telinimw ra kinikinfesen. Ekkóch ra peni ekkewe chón Jus nge ekkóch ra peni ekkewe aposel.
5 Atun aramasen ekkewe ekkóch mwú me ekkewe chón Jus fitifengen me néúr kewe sounemenem ra sótun kirikiringaw ngeniir me manei ngeniir faw,
6 iir ra silei ussun, me ra sú ngeni ekkewe telinimw Likaonia, Listra, me Terpe, me ngeni ekkewe leeni únúkkúr.
7 Iwe, ra afalafala ewe kapas allim lón ekkena leeni.
8 Iwe, me lón Listra a wor emén mwán mi chék mómmóót pwe mi ter pechen. I a pechemá seni chék leuputiwan me ese fetál.
9 Ei mwán a aúseling ngeni Paul atun a afalafal. Iwe, Paul a newenewen ngeni me a kúna pwe a wor an lúkú mi tongeni apéchékkúlatá,
10 iwe, a léúwommóng le apasa: “Kopwe útá wóón pecheom kana.” Iwe, ewe mwán a mwetetá me poputá le fetál.
11 Lupwen ekkewe aramas ra kúna minne Paul a féri, ra léúwommóng le apasa lón kapasen Likaonia: “Ekkewe kot ra wililó ussun aramas me ra feitiw rech!”
12 Iwe, ra poputá le kér ngeni Parnapas Seus, nge Paul Ermes, pún i ewe a kon kakkapas.
13 Ewe imwenfelin Seus a nóm lón alelongen ewe telinimw. Néún Seus we souasor, a uweato átemwánnin kou me mwárámwár ren asamen ewe telinimw. Ewe souasor me ekkewe aramas ra mochen eáni asor ngeni Paul me Parnapas.
14 Nge lupwen ekkewe aposel, Parnapas me Paul ra rong ei, ra kamwei úfer kewe me ssáwu lein ekkewe aramas me léúwommóng le apasa:
15 “Ámi pwiim kana, pwata oua féri ei sókkun mettóch? Ám pwal aramas chék mi wor ám apwangapwang ussun ámi. Me áúa afalafala ewe kapas allim ngenikemi pwe oupwe kul seni ekkeei féffér mi lamotongaw me kul ngeni ewe Kot mi manaw, ewe a féraatá láng me fénúfan me mataw me meinisin masouer kewe.
16 Lón fansoun ekkewe táppin aramasen lóóm, i a mut ngeni meinisin aramasen ekkewe ekkóch mwú ar repwe féri met pwisin mocheniir,
17 nge i a chúen pwáraatá ussun pwisin i ren an féri minne mi múrinné, a ngenikemi úút seni láng me fansoun ráás, a ámenemenéchúkemi ren mwéngé me ouraló letipemi ren pwapwa.”
18 Ikáámwo ra apasa ekkeei mettóch, nge rese tongeni pinei ekkewe aramas seni ar repwe asor ngeniir.
19 Nge ekkewe chón Jus seni Antiok me Ikonium ra waroto me ra elliapa ekkewe aramas, iwe, ra manei ngeni Paul faw me oturawu lúkún ewe telinimw pún ra ekieki pwe a máló.
20 Iwe nge, atun ekkewe chón káé ra pwellieló, i a útá me tolong lón ewe telinimw. Lón ewe rán mwirin, a fiti Parnapas le ló Terpe.
21 Mwirin ar afalafala ewe kapas allim ngeni chón ena telinimw me álisi chómmóng ar repwe wiliiti chón káé, ra liwiniti Listra, Ikonium, me Antiok.
22 Me ikena ie, ra apéchékkúla ekkewe chón káé, me pese ngeniir ar repwe chék nónnóm lón ewe lúkú me apasa: “Sipwe tolong lón chómmóng riáfféú me mwen sipwe tolong lón ewe Mwúún Kot.”
23 Pwal och, ra seikaatá mwán mi ásimaw fán iter lón eú me eú mwichefel, ra iótek fiti echikefel, me ra likiti iir ngeni Jiowa,* ewe ra lúkú.
24 Mwirin, ra fetáleló lón Pisitia me feiló ngeni Pamfilia,
25 nge mwirin ar arongafeili ewe kapas lón Perka, ra feitiw ngeni Attalia.
26 Seni ikena ie ra sáiló ngeni Antiok, me ikena ie pwiir kewe ra iótek pwe Kot epwe pwáár ngeniir an kirekiréch mi somwoló ren ewe angang ra áwesaaló iei.
27 Atun ra waroto me emwichafengeni chón ewe mwichefel, ra apwóróusa ngeniir chómmóng mettóch Kot a néúnéú iir le féri, me an suuki ewe asamen lúkú ngeni aramasen ekkewe ekkóch mwú.
28 Iwe, ra awora watteen fansoun ngeni ekkewe chón káé.
