Minne Ekkewe Aposel Ra Féri 2:1-47
2 Iwe, atun a fiffis ewe ránin Chulapen Pentikos, iir meinisin ra kochufengen lón eú chék leeni.
2 Mwittir chék, a wor eú méngúngú seni láng, ussun úngúúngún och ásepwál mi péchékkúl, me a ouraló unusen ewe imw ikewe ra mómmóót ie.
3 Me ra kúna chénmwéngé mi ussun ngeten ekkei mi inetfetál, me eú me eú ra sotiw wóón emén me emén leir,
4 me iir meinisin ra uroló ren ewe ngún mi fel me ra poputá le kapas lón sókkopaten fós, ewe manaman a atufichiir le kapas.
5 Lón ena atun ekkewe chón Jus seni iteiten fénú wóón fénúfan mi angang ngeni Kot seni wenecharen letiper, ra nónnóm lón Jerusalem.
6 Iwe, atun a fis ei úngúúng, ekkewe aramas ra kochufengen me osukosuk pokiten emén me emén iir ra esilla pwisin fósun fénúer atun ekkewe chón káé ra kakkapas.
7 Ra fókkun mwaar me ra apasa: “Ou katol, meinisin ekkeei ra kakkapas iir chón Kalili, iká met?
8 Iwe, pwata chék emén me emén kich sia rongorong en me pwisin fósun wesetáán fénúan?*
9 Kich chón Partia, chón Metia, me chón Elam, aramasen Mesopotamia, Jutia me Kapatosia, Pontus me ewe fénú Eisia,
10 Frikia me Pamfilia, Isip me ekkewe kinikin lón Lipia arap ngeni Sairine, waséla seni Rom, chón Jus me chón lúkún Israel mi fiti lamalamen chón Juta,
11 chón Krit me chón Arapia—oukich sia rongorong ar kakkapas lón ach fós ussun ekkewe mettóchun Kot mi amwarar.”
12 Ewer, iir meinisin ra máirú me osukosuk, ra eráfengen lefiler: “Epwe met weween ei?”
13 Iwe nge, ekkewe ekkóch ra turunufaseer me apasa: “Iir mi sakaw.”
14 Nge Piter a útá fiti ekkewe Engol me Emén me a kapas ngeniir fán léúwommóng: “Ámi chón Jutia me meinisin aramasen Jerusalem, oupwe aúselingéch ngeni ái keei kapas me oupwe silei ei.
15 Ren enletin, ekkeei aramas rese sakaw ussun met oua ekieki, pún iei ewe aúlúngátin kulók lón ei rán.*
16 Nge a fen pwénúetá rer minne ewe soufós Sowel a apasa, a erá:
17 ‘Kot a apasa, “Me lón ekkewe ránin lesópwólóón, úpwe ninatiw och ái we manaman wóón sókkopaten futuk, me néúmi kewe át me néúmi kewe nengngin repwe osuni me néúmi kewe alúwél repwe kúna lángipwi me ekkewe mwán leimi repwe ttan,
18 me pwal mwo wóón nei kewe slave mwán me wóón nei kewe slave fefin úpwe ninatiw och ái we manaman lón ekkena rán, me repwe osuni.
19 Me úpwe aworato manaman lón láng me esissil wóón fénúfan—chcha me ekkei me étúét.
20 Ewe akkar epwe wililó ngeni kiroch me ewe maram epwe par ussun chcha me mwen an epwe waroto ránin Jiowa* we mi lap me lillingemwarar.
21 Me meinisin mi kéri iten Jiowa* repwe kúna manaw.” ’
22 “Ámi chón Israel, oupwe aúseling ngeni ekkeei kapas: Oua silei pwe Jises ewe re Nasaret, a tiitiito me ren Kot. Ren i, Kot a féri ekkewe manaman, angang mi amwarar, me ekkewe esissil leimi.
23 Me, me ren minne Kot a tipeni me silei me mwen an a fis, Jises a katolong lepéún aramas. Ren an katolong lepéún aramas mi atai allúk, oua chúfélúetá i wóón efóch irá me oua pwal nieló i.
24 Nge Kot a amanawasefáli i ren an angasaaló seni máló,* pokiten ese wor án máló péchékkúl le amwéchú i.
25 Pún Tafit a apasa ussun i: ‘Fansoun meinisin úa onómu Jiowa* mwei,* pún i a nóm peliefichin pei pwe ngang úsapw fókkun mwékútúkút.
26 Pokiten ei, letipei a pwapwa me chénawei a chengel chapur. Me úpwe* nónnóm lón ápilúkúlúk,
27 pún kosap likitieiló lón Peiás,* are mut ngeni futuken noum we mi túppwél an epwe ngawoló.
28 En ka fen esile ngeniei ewe alen manaw, en kopwe ouraeiló ren pwapwa chapur lón óm nónnóm.’*
29 “Ámi pwii keei, oupwe mut ngeniei ái úpwe pwora le kapas ngenikemi ussun semelapach we Tafit, pwe a máló me peiás, me peiásan we a nóm rech tori ei rán.
30 Pokiten i emén soufós me a silei pwe Kot a pwon fán ékképél ngeni pwe epwe ammótta emén me lein mwirimwirin kewe wóón an leenien móótun king,
31 i a fen silei me mwan ussun manawsefálin ewe Kraist me a kapas ussun, a apasa pwe Kot esap likitaaló i lón Peiás* me futukan esap ngawoló.*
32 Kot a amanawasefáli Jises, me kich meinisin chón pwáraatá ussun ei.
33 Ina minne, pokiten a tekiatá lepeliefichin Kot me a angei ewe ngún mi fel mi pwonetiw seni ewe Sam, i a ninatiw wóómw met ámi oua kúna me rongorong.
34 Pún Tafit ese feitá láng, nge pwisin i a apasa, ‘Jiowa* a ereni ái Samol: “Kopwe móttiw peliefichi
35 tori ái úpwe isettiw chón oputom pwe leenien pecheom.” ’
36 Ina minne, ámi meinisin aramasen Israel oupwe wesewesen silei pwe Kot a féri án Jises epwe Samol me Kraist, ewe emén oua chúfélúetá wóón ewe irá.”
37 Iwe lupwen ra rong ei, a el letiper, me ra ereni Piter me meinisin ekkewe aposel: “Pwiim kaan, met áúpwe féri?”
38 Piter a ereniir: “Oupwe áier, me emén me emén leimi epwe papatais lón iten Jises Kraist pwe komusen ámi kewe tipis, iwe oupwe angei ewe liffang ese kamé, ewe ngún mi fel.
39 Pún ewe pwon fán itemi me néúmi kewe, me fán iten meinisin chókkewe mi nóm towaw, fán iten meinisin chókkewe Jiowa* ach Kot epwe kériireto ngeni pwisin i.”
40 Iwe, a sópweeló le kapas me áweweéchú ewe kapas allim me peppeseer, a apasa: “Oupwe amanawakemi seni ei táppin aramas mi pworoingaw.”
41 Iwe, chókkewe mi pwapwa le etiwa an kapas ra papatais, me lón ena rán ina epwe 3,000 aramas ra kapachetá.
42 Me ra sópweeló le kákkáé seni ekkewe aposel, chiechifengen,* mwéngé, me iótek.
43 Ekkewe aposel ra féri chómmóng manaman me esissil. Meinisin ra kúna ei me a efisi ar repwe súféliti Kot.
44 Meinisin ekkewe mineféén chón káé ra kochufengen me áeáfengen lefiler meinisin met mi wor rer,
45 me ra améméló fénúer me meinisin minne ar me eineti méén we ngeni meinisin, alóngólóng wóón met emén me emén a osupwangan.
46 Iwe, iteiten rán ra nóm lón ewe imwenfel fán tipeeú, me ra mwéngé lón sókkopaten imw me mwéngéfengen ener mwéngé fán pwapwa chapur me seni wenecharen letiper,
47 ra mwareiti Kot me ra kúna chen me ren meinisin ekkewe aramas. Lón pwal chék ena atun, Jiowa* a sópweeló le apacha ngeniir iteiten rán chókkewe repwe kúna manaw.
Footnote
^ Are “ewe kapas a uputiw lón?”
^ Ina epwe 9:00 a.m.
^ Krik, “seni ewe metekin máló”; are ese mwáál, “seni ewe selin máló.”
^ Are “mwen mesei.”
^ Krik, “futukei.”
^ Are “mwen mesom.”
^ Are “mwongoingoiló.”
^ Are “álisifengeniir.”
