Minne Ekkewe Aposel Ra Féri 20:1-38
20 Lupwen a kúkkúnúló ewe osukosuk, Paul a tiiti ekkewe chón káé, iwe mwirin an apéchékkúler me kapwong ngeniir, a poputááni an sái ngeni Masetonia.
2 Mwirin an fetálfeil lón ekkena kinikin me ngeni chókkewe mi nóm ikena ie chómmóng kapasen apéchékkúl, a tori Kris.
3 A nóm ikena ie úkúúkún úlúngát maram. Nge pokiten ekkewe chón Jus ra ekiekin rawangawei i atun an epwele sái ngeni Siria, a filaatá an epwe liwin nge epwe pwer lón Masetonia.
4 Sopater néún Pirus we seni Perea, a eti i, pwal Aristarkus me Sekuntus seni Tesalonika, Kaius seni Terpe, Timoty, me Tikikos me Trofimus seni lón ewe fénú Eisia.
5 Ekkeei mwán ra akkomwoló mwem me ra witikem lón Troas,
6 nge mwirin ekkewe ránin ewe Pilawa Ese Lefen, áúa sái wóón mataw seni Filipai, nge mwirin nimu rán áúa toriir me lón Troas, iwe áúa nómotiw ikena fisu rán.
7 Lón ewe áeúin ránin wiik, atun áúa mwichfengen pwe áúpwe mwéngé, Paul a poputá le afalafal ngeniir, pún lón ewe rán mwirin, epwele ló. Iwe, a attama an afalafal tori lukenipwin.
8 Ina minne, a wor chómmóng lamp lón ewe ruumw asan ikewe ia áúa mwichfengen ie.
9 Iwe, lupwen án Paul kakkapas emén alúwél át itan Iutikos mi móót lón ewe asammwacho a méúrúchouló, nge ren an méúr a turutiw seni ewe aúlúngátin sássár, iwe, ra minatá nge a fen má.
10 Nge Paul a feitiw fan, a chapoló wóón me turufaaló, me apasa: “Oupwe kaúló le akúrang pún i mi manaw.”
11 Iwe, Paul a feitá asan me ra poputá le mwéngé. I a pwal sópweeló le kapas ngeniir ren och fansoun tori an a rániló, iwe mwirin, a ló.
12 Iwe, ra uwealó ewe át nge a manaw me ra meefi watteen ourur.
13 Iwe, áúa akkomwoló wóón ewe siip me sáiló ngeni Assos, ikewe áúa ekiekin angei Paul me ie, pún mwirin an ngenikem emmwen ussun ei mettóch, i a ekiekin feiló ikena ie nge epwe chék fetál.
14 Iwe, atun a torikem me lón Assos, áúa angei i me sáiló ngeni Mitilene.
15 Iwe, ám áúa sáiló seni ikena lón ewe rán mwirin, iwe áúa tori Kios, nge lón ewe rán mwirin ena, áúa tori Samos, nge sorotá, áúa wareiti Mailitus.
16 Paul a filaatá an epwe onuchchang seni Efisus pwe esap áeá och fansoun me lón ewe fénú Eisia, pún a atapwal an epwe tikeri Jerusalem lón ewe ránin Chulapen Pentikos iká epwe tufich ngeni.
17 Iwe nge, seni lón Mailitus a tiinaaló an kapas ngeni Efisus me tiiti ekkewe mwán mi ásimaw lón ewe mwichefel.
18 Lupwen ra feito ren, i a apasa ngeniir: “Oua fókkun silei ussun napanapei leimi seni ewe áeúin rán úa kerán tolong lón ewe fénú Eisia,
19 ussun ái slave ngeni ewe Samol ren watteen tipetekison. Me pokiten ekkewe chón Jus ra rawangaweei, ngang úa kechiw me kúna riáfféú,
20 oua pwal silei pwe úa afalafal ngenikemi nge úse túkúmaaló ekkewe mettóch mi échúitikemi are úa asukulakemi lein mwicheichen aramas pwal seni imw ngeni imw.
21 Nge úa unusen pwáraatá ngeni ekkewe chón Jus me ekkewe chón Krik pwe a lamot repwe áier, fel ngeni Kot, me lúkú lón ach Samol Jises.
22 Iwe, nengeni! fán emmwenien* ewe ngún mi fel ngang úpwele sáiló Jerusalem inaamwo iká úse silei met epwe fis ngeniei me ikena,
23 lúkún chék án ewe ngún mi fel pwáppwáraatá ngeniei seni lón telinimw me telinimw, me apasa pwe fétek me riáfféú ra witiwitiei.
24 Nge ngang, úse ekieki pwe a aúchea ngeniei pwisin manawei. Pwal eú, met úa mochen úpwe féri, ina ái úpwe apwénúetá minne a lamot úpwe féri me ewe angang úa angei seni ewe Samol Jises, ina ái úpwe unusen esilefeili kapas allimen án Kot kirekiréch mi somwoló.
25 “Iwe nengeni! Úa silei pwe ese wor emén me leimi ekkeei úa afalafala ngeni ussun ewe Mwú epwe chúen kúnasefáli mesei.
26 Iei minne, úa kérikemi pwe oupwe pwáraatá lón ei rán ikenái pwe esap tipisi málóón* emén aramas,
27 pún úa afalafal ngenikemi nge úse túkúmaaló senikemi meinisin án Kot kewe kapasen fén.*
28 Oupwe túmúnú pwisin ámi me unusen ewe mwichen siip, ewe, ewe ngún mi fel a seikikemiitá pwe oupwe chónemmweni, pwe oupwe túmúnú ewe mwichefelin Kot, ewe a mééni ren chchaan Néún we ussun emén chón mmasen siip.
29 Úa silei pwe mwirin ái úpwe feiló, wolif mwacho repwe tolong leimi me repwe kirikiringaw ngeni ewe mwichen siip,
30 nge seni me leimi, epwe wor ekkóch mwán repwe ámwáálaló ewe enlet pwe repwe erikaló ekkewe chón káé ngeni pwisin iir.
31 “Ina popun oupwe mammasa, me chechchemeni pwe ren úkúúkún úlúngát ier, lerán me lepwin, úse fókkun úkútiw le fénéú emén me emén leimi fán ssúrún chénún mesei.
32 Nge iei úpwele likitikemiiló ngeni Kot me an we kapasen kirekiréch mi somwoló, ewe kapas mi tongeni apéchékkúlakemiitá me fang ngenikemi ewe álemwir mi kawor ngeni meinisin ekkewe mi pin.
33 Úse mocheniaiti néún emén silifer are kolt are úfan.
34 Ámi oua pwisin silei, pwe úa angang ren pei pwe úpwe awora met úa osupwangan pwal met osupwangen chókkewe mi etiei.
35 Úa pwáár ngenikemi lón mettóch meinisin pwe ren ámi angang weires lón ei napanap, mi lamot oupwe álisi iir kewe mi apwangapwang me mi lamot oupwe chechchemeni án ewe Samol Jises kewe kapas, lupwen pwisin i a apasa: ‘A watte pwapwaan fang lap seni angei.’ ”
36 Iwe, mwirin an apasa ekkeei mettóch, i a fitiir meinisin le fótopwúkútiw me iótek.
37 Ren enletin, ra fókkun kechiw meinisin, me ra turufaaló Paul* me kisi fán tong,
38 pún ra fókkun weires ren an we apasa pwe resap chúen tongeni kúna mesan. Iwe, ra etaló ren ewe siip.
Footnote
^ Krik, “féféén.”
^ Are “chchaan.”
^ Are “unusen minne Kot a tipeni.”
^ Krik, “úlletá lekéén úwen Paul.”
