Minne Ekkewe Aposel Ra Féri 24:1-27
24 Mwirin nimu rán, ewe souasor mi lapalap Ananaias a feitiw fán ekkóch néúwisin Jus me emén souallúk itan Tertullus, me ra waalong ren ewe governor ar kapasen otuttur fán iten Paul.
2 Lupwen Tertullus a kékkéto pwe epwe kapas, i a poputá le tipimwáál ngeni Paul mwen mesen governor Feliks, a apasa:
“En Ámmáfel Feliks, kilisou ngonuk pwe áúa manaw lón kinamwe, me pokiten óm angangéch le nemenem, a fis feffeitá lein ekkewe aramas,
3 fansoun meinisin me pwal lón leeni meinisin áúa etiwa ei fán watteen kilisou.
4 Nge ren ái úsapw chúen asolapaaló óm fansoun, úa tingormaw ngonuk óm kopwe kirekiréch le aúseling ngenikem ekis fansoun.
5 Pún ám áúa fen kúna pwe ei mwán emén chón efisi osukosuk, mi efisi angangen efitikoko lein meinisin ekkewe chón Jus wóón unusen fénúfan, me i emén chón emmweni ewe mineféén lamalam án chón Nasaret.
6 I a pwal sótuni an epwe epiningawa ewe imwenfel, ina minne áúa turufi i.
7 * ——
8 Lupwen kopwe pwisin etittina, kopwe silei ussun ekkeei mettóch meinisin áúa etipisi wóón.”
9 Ren ena, ekkewe chón Jus ra pwal fiti le etipisi i, ra chék péchéúló pwe mi pwúng ekkeei mettóch.
10 Lupwen ewe governor a chimwe ngeni Paul an epwe kapas, i a pélúweni:
“Úa fókkun silei pwe ka soukapwúng fán iten chón ei mwú ren chómmóng ier, ngang úa pwapwa le kapas pwe úpwe pwisin penaeitá.
11 Esaamwo lap seni 12 rán seni ewe atun úa feitá fel lón Jerusalem. Iwe, iká ka mochen silei iká mi pwúng ena, ka tongeni eis.
12 Iir resap kúna ái ánini ngeni emén me lón ewe imwenfel are efisi eú mwichen aramas ar repwe kochufengen lón ekkewe sinakok are lón unusen ewe telinimw.
13 Rese pwal tongeni ánnetatá ngonuk ekkewe mettóch ra etipisiei wóón lón ei atun.
14 Nge ngang úpwe pwáár ngonuk pwe mi pwúng pwe úa manaweni manawei me ren minne ra eita ngeni eú mineféén lamalam. Lón ei napanap úa eáni angang mi pin ngeni Koten semelapei kewe, pún úa lúkú meinisin ekkewe mettóch mi nóm lón ewe Allúk me makketiw lón makkeien ekkewe soufós.
15 Me a wor ái ápilúkúlúk lón Kot, ewe ápilúkúlúk ekkeei mwán ra pwal ápilúkúlúkú, pwe epwe wor eú manawsefál fán iten ekkewe mi pwúng me ekkewe rese pwúng.
16 Ina minne, fansoun meinisin úa achocho ái úpwe eáni eú mwelien letip mi liméch mwen mesen Kot me aramas.
17 Iwe, mwirin fite ier, úa ló Jerusalem pwe úpwe uwealó liffangen úméúméch ngeni aramasen mwúúi me eáni asor.
18 Lupwen úa féri ekkeei mettóch, ra kúnaei me lón ewe imwenfel wesin ái angangen elimelim me ren ewe Allúk, nge esap ren eú mwichen aramas are ái efisi eú osukosuk. Nge a wor ekkóch chón Jus seni ewe fénú Eisia ikena,
19 iir kewe itá repwe nóm mwom pwe repwe etipisiei iká epwe wesewesen wor met repwe tipi ngeniei wóón.
20 Are, mut ngeni ekkeei mwán ikeei ar repwe pwisin apasa met féfféringawei ra kúna atun úa útá mwen án chón Jus we mwichen soukapwúng mi tekia,
21 chilóón chék ei eú mettóch úa kékkéwu fán léúwommóng atun úa útá leir: ‘Ikenái úa kúna kapwúng mwen mesemi pokiten ewe manawsefál án ekkewe mi máló!’ ”
22 Iwe nge, pokiten Feliks a fókkun sileéchú ekkewe mettóch ussun ei Al, a poputá le tiiniireló me apasa: “Ineet chék Lisias ewe meilapen mwichen soufiu epwe feitiw, úpwapw apwúngaló ekkeei mettóch mi weneitikemi.”
23 Iwe, a allúkú ngeni ewe meilapen soufiu pwe ewe mwán epwe chék ares nge epwe mut ngeni ekkóch mettóch a mochen féri, me mut ngeni chiechian kewe ar repwe álisi ngeni minne a osupwangan.
24 Mwirin fitu rán, Feliks a feito fán pwúlúwan we Trusilla, emén chón Jus, me a tiiti Paul me aúseling ngeni an kapas ussun ewe lúkú lón Kraist Jises.
25 Nge atun Paul a kapas ussun pwúng me nemeni pwisin mochenich me ewe ránin kapwúng epwele feito, Feliks a niwokkus me a pélúweni: “Kopwele mwo feiló iei, nge ineet úa pwal tufich ngeni úpwapw tiitisefál en.”
26 Lón chék pwal ena atun, a ekieki pwe Paul epwe uwou ngeni moni. Ina popun, a soun tiiti i fán chómmóng me pwóppwóróus ngeni.
27 Nge lupwen a fen luló ruu ier, Porkius Festus a siwili Feliks. Iwe, pokiten Feliks a mochen kúna chenin me ren ekkewe chón Jus, a likitaaló Paul lón kalapus.
