Minne Ekkewe Aposel Ra Féri 26:1-32
26 Akripa a ereni Paul: “A mumutá ngonuk óm kopwe pwisin kapas fán itom.” Iwe, Paul a eitiewu péún me poputá le pélúweni fán pwisin itan:
2 “King Akripa, úa pwapwa pwe úa nóm mwen mesom, pwe ikenái úpwe kapas fán itei ussun ekkeei mettóch meinisin ekkewe chón Jus ra etipisiei wóón,
3 ákkáeúin pokiten en emén mi silefichi meinisin ekkewe ééreni pwal minne ekkewe chón Jus ra ánini wóón. Ina minne, úa tingormaw ngonuk óm kopwe mosonottam le aúseling ngeniei.
4 “Ren enletin, ekkewe chón Jus meinisin ra fókkun silei ewe napanapen manaw úa manaweni seni lealúwélúi lein nei aramas me pwal lón Jerusalem,
5 iká ra mochen, repwe erenuk pwe ngang emén Farisi. Napanapen án ekkewe Farisi fel, a kon tichik lap seni án ekkóch chón Jus.
6 Nge iei úa útá mwen kapwúng pokiten ápilúkúlúkún ewe pwon Kot a ngeni semelapach kewe,
7 iei chék pwal ewe pwon ach kewe 12 einang ra ápilúkúlúkú pwe repwe kúna pwénúetáán ren ar tinikken le angang ngeni Kot lepwin me lerán. Iwe King, pokiten ei ápilúkúlúk, ekkewe chón Jus ra etipisiei.
8 “Pwata ouse lúkú pwe Kot a amanawasefáli ekkewe mi máló?
9 Nge ngang, úa lúkúlúk pwe úpwe féri chómmóng féffér mi ú ngeni iten Jises ewe re Nasaret.
10 Ina met úa wesewesen féri lón Jerusalem. Úa lokeeló lón imwen kalapus chómmóng me lein ekkewe chón pin, pún úa angei ái mumutá seni ekkewe souasor mi lap, me atun repwele ninniiló, úa tipeeú ngeni.
11 Fán chómmóng úa eriáfféwúr me lón ekkewe sinakok meinisin pún úa sótun eriániir ar repwe likitaaló ar lúkú. Me pokiten úa fókkun lingeringeritiir, úa pwal mwo nge eriáfféwúmwááliir me pwal ekkewe lón telinimw mi nóm towaw.
12 “Lón eú atun, úa feiló ngeni Tamasikos pokiten ekkewe souasor mi lap ra ékkúnéweiló ái úpwe pwal féri ena mettóch ikena ie,
13 úa kúna me wóón ewe al leolowas eú saram mi fókkun saramaram lap seni ttinen akkar mi fiitiw pwellin únúkki seni láng me únúkkún chókkewe mi fitiei.
14 Iwe, lupwen ám meinisin áúa turuló lepwúl, úa rong eú méngúngú a apasa ngeniei lón kapasen Ipru: ‘Saul, Saul, pwata ka eriáfféwúmwááliei? Ka pwisin efeiengawók ren óm ú ngeniei.’*
15 Nge úa apasa: ‘Samol, en ié?’ Iwe, ewe Samol a apasa: ‘Ngang Jises, ewe ka eriáfféwúmwááli.
16 Kopwe pwáátá me útá wóón pecheom kana. Iei popun úa pwá ngonuk, pwe úpwe filuketá óm kopwe nei chón angang me emén chón pwáraatá ekkewe mettóch ka fen kúna ussui, pwal ekkewe mettóch úpwe féri óm kopwe kúner.
17 Me úpwe selánuk seni ekkeei aramas me seni ekkewe ekkóch mwú, iir kewe úa tiinukoló rer,
18 pwe kopwe suukaaló meser, okulluur seni rochopwak ngeni saram me seni nemenemen Setan ngeni Kot, pwe repwe angei omusomusen ar kewe tipis me ewe álemwir mi kawor ngeni ekkewe mi piniló ren ar lúkú lón ngang.’
19 “Ina minne, King Akripa, ngang úse álleasolapa kúnaei we seni láng,
20 nge úa uwei ewe pwóróus, akkomw ngeni chókkewe mi nóm lón Tamasikos, mwirin ngeni chókkewe mi nóm lón Jerusalem, me meinisin lón fénúen Jutia, me pwal ngeni ekkewe ekkóch mwú, ar repwe áier me kul ngeni Kot ren ar féri ekkewe angang mi fich ngeni áier.
21 Iei popun ekkewe chón Jus ra turufiei me lón ewe imwenfel me sótuni ar repwe nieiló.
22 Iwe nge, pokiten úa fen kúna álillis seni Kot, ngang úa sópweeló tori ikenái le áweweei ewe kapas allim ngeni kúkkún me watte, úa chék apasa met ekkewe Soufós me pwal Moses ra apasa pwe epwe fis—
23 pwe ewe Kraist epwe kúna riáfféú me pokiten i ewe áeménún epwe manawetá seni máló, i epwe esilefeili saram ngeni ekkeei aramas me ngeni aramasen ekkewe ekkóch mwú.”
24 Iwe, atun Paul a apasa ekkeei mettóch, Festus a apasa fán léúwommóng: “Paul, a turu sonuk óm ekiek! Óm watteen silelap a oumwesukoló!”
25 Nge Paul a apasa: “Ámmáfel Festus, ese turu seniei ái ekiek, minne úa apasa mi enlet me úa kapas fán ekiek mi mirit.
26 Pún ren enletin, ewe king ewe úa suuk chééché ngeni lón ái kapas, a fókkun silei ekkeei mettóch. Úa lúkúlúk pwe a fókkun kúna ekkena mettóch meinisin pún ese wor eú me leir a fis lemonomon.
27 King Akripa, ka lúkú minne ekkewe soufós ra apasa? Ngang úa silei pwe ka lúkú.”
28 Nge Akripa a ereni Paul: “Lón fansoun mwochomwoch chék ka tongeni ewilieiló ái úpwe wiliiti emén Chón Kraist.”
29 Ren ena, Paul a apasa: “Úa iótek ngeni Kot pwe ese lifilifil iká lón fansoun mwochomwoch are fansoun langattam, esap chék en nge pwal meinisin chókkewe mi aúseling ngeniei ikenái repwe wiliiti emén ussun chék ngang, nge esap ren ekkeei féféén kalapus.”
30 Iwe, ewe king a útá me pwal ewe governor me Pernis me ekkewe mwán mi mómmóót rer.
31 Nge atun repwele feiló, ra poputá le eráfengen lefiler: “Ei mwán ese féri och mi fich ngeni máló are an epwe kalapus.”
32 Iwe, Akripa a ereni Festus: “Iká ei mwán ese tingor an epwe feiló ren Sisar, itá epwele fen musowu.”
Footnote
^ Krik, “ren óm chepeti ewe wok mechá.” Ei a weneiti efóch wok mi kken mesan fán iten emmwenin man.
