Minne Ekkewe Aposel Ra Féri 28:1-31
28 Mwirin ám áúa tori winifénú, áúa silei pwe iten ewe fénú Malta.
2 Iwe, aramasen ewe fénú* ra pwáári ngenikem kirekiréch mi luló sókkólóón. Ra ékúetá eú ekkei me kirekiréch le etiwakem meinisin pokiten ewe rán mi púng me ewe patapat.
3 Nge lupwen Paul a ionfengeni epinúk amúch me watá wóón ewe ekkei, emén serepenit mi poison a tééwu pokiten ewe pwichikkar me ittiweló wóón péún.
4 Lupwen aramasen ewe fénú* ra kúna ewe man mi poison mi ittiwetiw me wóón péún, ra poputá le eráfengen lefiler: “Ese mwáál ei mwán emén chón nimanaw, me inaamwo iká a manawelong seni lemataw, Pwúngiéch* esap mut ngeni an epwe manaw.”
5 Iwe nge, a wichikaalong ewe man lón ewe ekkei me ese feiengaw.
6 Nge iir ra ekieki pwe epwe pwo are mwittir turuló me máló. Mwirin ar witiwiti ren fansoun langattam me kúna pwe ese wor och mi ngaw a fis ngeni, ra siwili ekiekiir me poputá le apasa pwe i emén kot.
7 Iwe, únúkkún ena leeni a wor ekkóch fénú, fénúen ewe mwán mi aúchea lón ena fénú, itan Puplius, me i a etiwakem me awasélaéchúkem úkúúkún úlúngát rán.
8 A sereni pwe semen Puplius we a kokkoon wóón peet pwe a úri pwichikkar me semwenin nuuk mi luló metekin, me Paul a tolong ren me a iótek, a isettá péún wóón me echikara i.
9 Mwirin an fis ei, meinisin ekkewe aramas mi semmwen wóón ewe fénú ra pwal feito me Paul a echikareretá.
10 Ra pwal pwáári ar kilisou ren ar ngenikem chómmóng liffang, me lupwen áúpwele su, ra ammasoua ewe siip ngeni met áúa osupwangan.
11 Mwirin úlúngát maram, áúa sáiló wóón efóch siip, wóón lesopwun me mwan, a wor liosun “Néún Seus Kewe Át.” Ena siip seni Aleksantria, a nóm lón ewe fénú atun ewe fansoun patapat.
12 Lupwen áúa inelong Sirakus, áúa nónnóm ikena úkúúkún úlúngát rán,
13 seni ikena áúa sáiló me tori lón Rekium. Mwirin eú rán, och ásepwál a enito me éér, nge lón ewe oruuen rán, áúa tori lón Puteoli.
14 Me ikeei ie áúa kúna chienem kewe chón lúkú me ra pesekem ám áúpwe nónnóm rer úkúúkún fisu rán. Nge mwirin ám nóm rer, áúa feiló ngeni Rom.
15 Lupwen chienem kewe chón lúkú mi nóm ikena ra rong ewe pwóróus usúm, ra feito pwe repwe chuurikem lón Úlúngát Imwen Waséla, nge ekkóch me leir ra pwal mwo nge luuto ngeni ewe Leenien Amémé lón Appius. Lupwen Paul a kúner a kilisou ngeni Kot me a péchékkúletá.
16 Iwe, lupwen áúa tolong lón Rom, a mumutá ngeni Paul an epwe pwisin imuuló lón imwan, nge emén soufiu epwe mmasa i.
17 Iwe nge, mwirin úlúngát rán a kérfengeni ekkewe mwán mi aúchea lein ekkewe chón Jus. Lupwen ra chufengen, i a ereniir: “Pwii kaan, inaamwo iká úse féri och mettóch mi ú ngeni ekkewe aramas are éérenien semelapach kewe, nge ra kalapuseei me lón Jerusalem me atolongaei lepéún ekkewe chón Rom.
18 Nge mwirin ar féri angangen etittin, ekkewe chón Rom rese kúna och mwáálli pwe repwe nieiló, ina minne ra mochen omusaeiwu.
19 Nge lupwen ekkewe chón Jus rese tipeeú ngeni, úa ósópwisekin ámweta ngeni Sisar, nge esap pokiten a wor ái kapasen tipi ngeni aramasen mwúúi we.
20 Iwe, iei popun úa tingor pwe úpwe chuurikemi me kapas ngenikemi, pún ren án chón Israel we ápilúkúlúk, iei popun úa féfé ren sein.”
21 Ra apasa ngeni: “Áúse mwo angei taropwe seni Jutia fán itom, are ese pwal wor emén me lein pwiich kewe mi etto seni ikena a apwóróusa are kapas ussun och mettóch mi ngaw ussumw.
22 Nge áúa ekieki pwe mi éch áúpwe rongo sonuk met óm ekiek, pún ren enletin, áúa silei pwe aramas ra kapasen ú ngeni ei mineféén lamalam ekis meinisin.”
23 Ra akkóta eú rán ar repwe chuuri i, me ra fókkun chómmóng le feito ren lón leenian we. Me seni lesossor tori lepwin, a áwewe ngeniir ewe mettóch ren an unusen pwáraatá ussun ewe Mwúún Kot, pwe epwe etipetiper le eáni lúkú lón Jises seni ewe Allúkún Moses me makkeien ekkewe soufós.
24 Ekkóch ra poputá le lúkú met a apasa, nge ekkóch rese lúkú.
25 Iwe, pokiten ra tipefesen lefiler, ra poputá le ló, me Paul a apasaatá ei eú mettóch:
“A pwúng minne ewe ngún mi fel a apasa me ren ewe soufós Aisea ngeni semelapemi kewe,
26 mi apasa, ‘Kopwe feiló ngeni ekkeei aramas me ereniir: “Oupwe wesewesen rong nge ousap fókkun weweiti, me oupwe wesewesen nengeni nge ousap fókkun kúna.
27 Ekiekin ekkeei aramas ese suuk. Ra rong nge rese apwénúetá. Ra amméúrú meser me appúngaló selinger pwe resap kúna are rong och mettóch. Mwirilóón rese weweiti met a lamot ar repwe féri, me rese liwinitiei me úse echikareretá.” ’
28 Ina minne, oupwe silei pwe ei angangen amanaw seni Kot a fen esilesil ngeni aramasen ekkewe ekkóch mwú, iir repwe wesewesen aúseling ngeni.”
29 * ——
30 Paul a nómotiw ikena ren unusen ruu ier lón eú imw a mémméénatiw, me a etiwa fán kirekiréch meinisin chókkewe mi feito ren,
31 a afalafaler ewe Mwúún Kot me asukula ussun ewe Samol Jises Kraist fán watteen pwora nge ese wor met a pinei.
Footnote
^ Ekkewe aramas rese kapas lón kapasen Krik.
^ Are “chókkewe mi eáni pwal eú fós.”
^ Krik, Di′ke, ese mwáál ei kapas a weneiti ewe kot fefin mi wisen féri kapwúng.
