Minne Ekkewe Aposel Ra Féri 3:1-26
3 Iwe, Piter me Jon ra feitá ngeni ewe imwenfel fán iten ewe kulókun iótek, ewe etiuen kulók,*
2 me emén mwán mi pechemá seni leuputiwan a kekiito. Iteiten rán ra onómu únúkkún ewe asamen imwenfel itan Echipwér pwe epwe tingor liffangen úméúméch seni chókkewe mi tolong lón ewe imwenfel.
3 Lupwen a kúna Piter me Jon ar repwele tolong lón ewe imwenfel, a poputá le tingor liffangen úméúméch.
4 Nge Piter me Jon ra newenewen ngeni ewe mwán, iwe Piter a apasa: “Kopwe nengenikem.”
5 Iwe i a attoler, a ekieki pwe epwele angei och seniir.
6 Iwe nge, Piter a apasa: “Ese wor nei silifer me kolt, nge met mi wor rei, úpwe ngonuk. Lón iten Jises Kraist ewe re Nasaret, kopwe fetál!”
7 Iwe, a amwéchú peliefichin péún me aútáái. Mwittir chék, pechen kewe ra péchékkúleló,
8 me a mwetemwet wóón pechen kewe, a poputá le fetál me a fitiirelong lón ewe imwenfel, a fetál me mwetemwet me mwareiti Kot.
9 Iwe, meinisin ekkewe aramas ra kúna an fetál me mwareiti Kot.
10 Me ra poputá le esilla i, pwe i ewe mwán mi soun móót me witiwiti liffangen úméúméch ren ewe imwenfel, ren ewe ttit itan Asamalap Echipwér me ra unusen máirú me fókkun pwapwa ren met a fis ngeni.
11 Atun ewe mwán a chúen kémwéch Piter me Jon, meinisin ekkewe aramas ra ssáto rer ikewe mi iteni Alen Salomon, ra unusen máirú.
12 Lupwen Piter a kúna ei, a ereni ekkewe aramas: “Ámi aramasen Israel, pwata oua fókkun mwaar ren ei, me pwata oua nennengenikem ussun itá nge ren pwisin ám manaman are ám angang ngeni Kot seni wenecharen letipem áúa féri án átei epwe fetál?
13 Ewe Koten Eperiam me Aisek me Jekop, ewe Koten semelapach kewe, a elingaaló néún we Chón Angang, Jises, ewe oua atolonga me amamesini mwen mesen Pailat inaamwo iká a filaatá an epwe omusawu i.
14 Ewer, oua amamesini ena emén mi pin me pwúng, nge oua tingor an epwe ngenikemi emén mwán chón nieló aramas,
15 me oua nieló ewe Samolun manaw. Nge Kot a amanawaatá i seni máló, me ám chón pwáraatá ussun ena.
16 Iwe, ren itan we, me ren ám lúkú lón itan, ei mwán oua kúna me silei a péchékkúletá. Ám lúkú lón i, a efisi án ei mwán epwe unusen péchékkúletá me mwen mesemi meinisin.
17 Iwe, ámi pwii kana, úa silei pwe oua féri ei pokiten ouse silei iká i wesewesen ié, ussun met néúmi kewe sounemenem ra pwal féri.
18 Nge lón ei napanap, Kot a apwénúetá ekkewe mettóch a fen apasa me lóóm me ren awen ekkewe soufós meinisin, pwe néún we Kraist epwe kúna riáfféú.
19 “Ina minne, oupwe áier me kulsefál pwe epwe télúló ámi kewe tipis, iwe ekkewe fansoun ngaseló epwe feito seni pwisin Jiowa,*
20 me i epwe tiinaato ewe Kraist mi seikitá fán itemi, Jises.
21 Jises epwe witiwit lón láng tori poputáán liwinsefálin meinisin ekkewe mettóch Kot a fen apasa me ren awen néún kewe soufós mi pin me lóóm lóóm.
22 Ren enletin, Moses a apasa: ‘Jiowa* ámi we Kot epwe seikaatá seni me lein pwiimi kewe emén soufós fán itemi ussun chék ngang. Oupwe aúseling ngeni meinisin met a erenikemi.
23 Nge ié ese aúseling ngeni ena Soufós, epwe fókkun péútmwááliló seni me lein ekkewe aramas.’
24 Ren enletin, poputá seni ewe soufós Samuel, meinisin ekkewe soufós ra esilefeili ussun ekkeei rán.
25 Ámi néún ekkewe soufós me chón álemwiri ewe pwonen etipeeú Kot a eáni ngeni semelapemi kewe, a ereni Eperiam: ‘Me ren mwirimwirum we, meinisin ekkewe famili wóón fénúfan repwe kúna feiéch.’
26 Mwirin án Kot seikaatá néún we Chón Angang, a tiinaaló i remi akkomw pwe epwe efeiéchúkemi ren an epwe okullu emén me emén leimi seni ámi kewe féffér mi fókkun ngaw.”
