Eú Pwáraatá Ngeni Jon 1:1-20
1 Ikkeei ekkewe mettóch Jises Kraist a pwáraaló. Jises a angei me ren Kot ekkena mettóch pwe epwe áiti ngeni néún Kot kewe chón angang minne epwele fis ekiseló chék. Jises a tiinaaló néún we chónláng ngeni Jon, néún Kot we chón angang,* an epwe ereni ekkewe mettóch mi liosuetá minne epwele fis,
2 átewe mi pwáraatá ewe kapas Kot a áiti ngeni me meinisin met Jises Kraist a apasa,* ewer, mettóch meinisin a kúna.
3 A pwapwa ewe emén mi léúwommóng le álleani kapasen ei oesini me chókkewe mi rong me apwénúetá minne a mak lón, pún ewe fansoun mi kefililó a arapoto.
4 Ngang Jon, úa mak ngeni ekkewe fisu mwichefel mi nóm lón ewe fénú Eisia:
Amwo epwe nónnóm remi ewe kirekiréch mi somwoló me ewe kinamwe seni “ewe Emén mi nónnóm iei, ewe mi nónnóm me mwan, me ewe epwe feito,” me seni ekkewe fisu manaman mi nóm mwen an we leenien móótun king,
5 pwal seni Jises Kraist, “ewe Chón Pwáraatá mi Túppwél,” “ewe áeménún chón manawetá seni máló,” me “ewe Sounemenemen ekkewe kingen fénúfan.”
Ngeni ewe mi tongekich me angasakicheló seni ach kewe tipis ren pwisin chchaan—
6 me ewe mi férikich pwe sipwe eú mwú me souasor ngeni an we Kot me Seman we—ewer, epwe angei ewe ling me manaman tori feilfeiló. Amen.
7 Nengeni, i epwe feito lón ekkewe kuchu, me iteiten maas meinisin repwe kúna i, me pwal chókkewe mi pwosu i. Me meinisin einangen fénúfan repwe pwisin éfénú fán mwáriir fán letipeta pokiten i. Ewer, Amen.
8 Jiowa* Kot a apasa, “Ngang ewe Alfa me ewe Omeka,* ewe Emén mi nónnóm iei, ewe mi nónnóm me mwan, me ewe epwe feito, ewe mi Unusen Manaman.”
9 Ngang Jon, pwiimi we me chienemi lón ámi riáfféú, ewe epwe fitikemi lón ewe Mwú, me etikemi le likiitú lón ach tapweló mwirin Jises, úa nónnóm wóón ewe té itan Patmos pokiten úa fós ussun Kot me pwáraatá ussun Jises.
10 Ewe ngún mi fel a efisi ái úpwe kúna ekkewe mettóch repwe fis lón ránin ewe Samol. Úa rong me lúkúsékúrúi eú méngúngú mi léúwommóng mi ussun ttikin efóch rappwa,
11 mi apasa: “Kopwe makkeetiw lón eú puk minne ka kúna me tiinaaló ngeni ekkewe fisu mwichefel lón Efisus, Smirna, Perkamom, Taiataira, Sartis, Filatelfia, me Leotisia.”
12 Úa kulsefál pwe úpwe katol ié we e fós ngeniei, nge atun úa kul, úa kúna fisu leenien lamp mi ffér seni kolt,
13 nge lukanapen ekkewe leenien lamp úa kúna emén mi ussun néún aramas mi úféúf eché úf mi ttam me ririitá fán mwárin efóch riri mi ffér seni kolt.
14 Pwal och, meten mékúran ra pwechepwech ussun pwechen únen siip, me ussun pwechen sno, nge mesan a ussun pulopulen ekkei,
15 me pechen kewe ra meriweriw ussun piras mi meriweriw atun a keten wóón ekkei, me léúwan a léúwommóng ussun akúrangen eú watteen chénúpupu.
16 Me a wor fúúféú fúú lón péúmwáánin péún, nge efóch ketilas mi ttam me kken me rúúepek a itiwu me lón awan, nge wóón mesan a ussun saramen akkar atun a fókkun saramaram ttinan.
17 Atun úa kúna, úa turuló órun pechen ussun emén mi máló.
Iwe, a watá péúmwáánin péún wóói me apasa: “Kosap niwokkus. Ngang ewe Akkomwan me ewe Amuchúlóón,
18 me ewe emén mi manaw, me ngang úa máló, nge nengeni, ngang úa manaw tori feilfeiló chék, me a nóm rei ekkewe kiien máló me Peiás.*
19 Ina minne, kopwe makkeetiw ekkewe mettóch ka kúna, ekkewe mettóch mi fis iei, me ekkewe mettóch repwe fis mwirin ekkeei.
20 Ekkewe fúúféú fúú ka kúna me lón péúmwáánin pei me ekkewe fisu leenien lamp mi ffér seni kolt, iir monomonun Kot, me iei weweer: Ekkewe fúúféú fúú, ra wewe ngeni chón kúnéén* ekkewe fisu mwichefel, nge ekkewe fisu leenien lamp, ra wewe ngeni ekkewe fisu mwichefel.
Footnote
^ Are “néún Jises slave.”
^ Krik, “án Jises Kraist pwáraatá.”
^ Are “ewe A me ewe Z.” Alfa me Omeka ikkena ekkewe áeúin me sáingoon mesen mak lón Krik.
^ Krik, “chónláng.”
