Eú Pwáraatá Ngeni Jon 4:1-11
4 Mwirin ei, úa kúna eú asam mi suuk lón láng, me ewe áeúin méngúngú úa rong an fós ngeniei a ussun ttikin efóch rappwa, a apasa: “Kopwe feito ikeei, me úpwe áiti ngonuk ekkewe mettóch repwele fis.”
2 Mwirin, án Kot we ngún mi fel a mwittir feitiw wóói, me nengeni, a wor eú leenien móótun king mi nóm láng nge a wor emén a mómmóót wóón.
3 Ena Emén mi mómmóót a saramaram ussun ewe faw mi aúchea itan jasper me ewe faw aúchea mi par, nge pwellin ena leenien móótun king, eú resim mi saramaram a pwellieló ussun ewe faw itan emeralt.
4 A wor 24 leenien móótun king ra pwellieló ewe leenien móótun king, nge úa kúna 24 souakkomw* mi móót wóór mi úféúf úf mi pwech me a wor mwárámwár kolt wóón chamwer.
5 Seni wóón ewe leenien móótun king, a fiiwu inefi me a wor méngúngú me chopulap. A pwal wor fisu lamp mi kú mwen ewe leenien móótun king, me ekkena ra wewe ngeni án Kot kewe fisu manaman.
6 Me mwen ewe leenien móótun king, a wor och mettóch mi ussun mataw mi kúrúffat ussun kilaas, ussun ewe faw itan kristal.
Lukanapen me pwellin únúkkún ewe leenien móótun king, a wor fémén ménúmanaw mi kuuló inisiir ren féún maas, ra nóm mwer pwal lúkúsékúrúr.
7 Wóón mesen ewe áeménún ménúmanaw a ussun emén laion, nge wóón mesen ewe arúúeménún ménúmanaw a ussun emén átemwánnin kou, nge wóón mesen ewe aúlúménún ménúmanaw a ussun mesen emén aramas, nge wóón mesen ewe aféménún ménúmanaw a ussun emén ikel mi ákkáás.
8 Emén me emén ekkewe fémén ménúmanaw a wor wonofóch péúkásiir, nge wóón me fán péúkásiir kana ra kuuló ren féún maas. Unusen rán me unusen pwiin ra kan apasa: “A pin, a pin, a pin Jiowa* Kot, ewe mi Unusen Manaman, ewe mi nónnóm me mwan, iei, me ewe epwe feito.”
9 Iteiten fansoun án ekkewe ménúmanaw ra elingaaló me ésúúfélú me kilisou ngeni ewe Emén mi móót wóón ewe leenien móótun king, ewe Emén mi manaw tori feilfeiló chék,
10 ekkewe 24 souakkomw ra chapetiw mwen ewe Emén mi móót wóón ena leenien móótun king me fel ngeni ena Emén mi manaw tori feilfeiló chék, me ra maneló mwáriir kewe mwen ewe leenien móótun king, me apasa:
11 “A fich ngonuk, Jiowa* ám Kot, óm kopwe angei ling, súfél, me manaman pokiten en ka féraatá mettóch meinisin. Mettóch meinisin ra fférútá pokiten letipom.”
