Ngeni Ekkewe Chón Efisus 3:1-21
3 Ren ei popun, ngang Paul, úa kalapus fán iten Kraist Jises me fán itemi ámi aramasen ekkewe ekkóch mwú—
2 oua wesewesen rong pwe úa kewis ngeni ewe wis ái úpwe álisikemi le angei ewe feiéch seni án Kot kirekiréch mi somwoló,
3 ewer, Kot a pwáári ngeniei an monomon, ewe úa fen ekis makkeei ngenikemi ussun me mwan.
4 Iwe, atun oupwe álleani ei, oua tongeni silei ussun ái weweiti ewe monomonun Kot ussun ewe Kraist.
5 Ei monomon ese esile ngeni ekkewe pilóón aramas me mwan epwe ussun án ewe ngún mi fel pwáári iei ngeni néún kewe aposel mi pin me ekkewe soufós.
6 Iei ewe monomon: Aramasen ekkewe ekkóch mwú iir kewe mi wiliiti néún Kraist Jises chón káé, repwe álemwiri met Kraist a álemwiri me repwe wiliiti kinikinin ewe inis. Iir repwe angei pwal ekkewe mettóch Kot a pwonei ngenikem pokiten ewe kapas allim.
7 Ngang úa wiliiti chón angangen ei monomonun Kot pokiten an kirekiréch mi somwoló. I a ngeniei ei liffang me ren an we manaman.
8 Ngang, emén mi kisifóchófóch me lein ekkewe chón pin meinisin. I a ngeniei ei kirekiréch mi somwoló pwe úpwe tongeni afalafala ngeni chón ekkewe ekkóch mwú kapas allimen wéún ewe Kraist ese wor éúkúúkún
9 me úpwe áiti ngeni aramas meinisin kókkótun ewe monomon mi opoló ren fansoun langattam lón Kot, ewe emén mi féraatá mettóch meinisin.
10 A fis ei iei pwe ren kókkótun ewe mwichefel, Kot a mochen esilei ngeni ekkewe mwú me nemenem* lón láng, an tipáchem mi pwááló lón sókkopaten napanap.
11 Ei a tipeeú ngeni minne a tipeni an epwe apwénúetá seni chék me lóóm lóóm ewe mi riri ngeni ewe Kraist, ach Samol Jises,
12 ewe ren i, a wor ach pwora le fós me sia tongeni arap ngeni Kot fán lúkúlúk pokiten ach lúkú lón i.
13 Ina minne, ngang úa tingorekemi pwe ousap fangetá fán ásengesin ái kewe riáfféú fán itemi, pwe iei ámi ling.
14 Ren ei popun úa fótopwúkú ngeni ewe Sam,
15 ewe iten meinisin famili lón láng me wóón fénúfan ra pop seni.
16 Úa iótek pwe Kot, ewe mi somwoló an ling, epwe áeá ewe manaman an we ngún mi fel a kan awora le apéchékkúla letipemi me ekiekimi.
17 Úa iótek ngeni Kot pwe Kraist, me pwal ámi tong ngeni ekkewe ekkóch, repwe nónnóm lón letipemi pokiten ámi lúkú. Amwo oupwe warar me núkúcharetiw wóón ewe lóngólóng,
18 pwe ámi me meinisin ekkewe chón pin oupwe unusen weweiti chélapen me langattamen me tekian me alóllóólun,
19 me oupwe silei án Kraist tong, ewe mi luluuló seni án aramas sile, pwe oupwe unusen uroló ren napanapen Kot kewe.
20 Kot a tongeni féri minne mi ssenúkúló me somwosomwoló seni meinisin minne sia tingor are ekieki me ren an manaman mi akkangang lón kich.
21 Ina minne, a fich ngeni an epwe angei ling me ren ewe mwichefel me pwal me ren Kraist Jises, tori meinisin táppin aramas feilfeiló chék. Amen.
Footnote
^ Ese mwáál, ei a weneiti ekkewe chónláng.
