Ngeni Ekkewe Chón Efisus 4:1-32
4 Ina minne ngang, ewe mi kalapus fán iten ewe Samol, úa tingormaw ngenikemi pwe oupwe manaweni ewe manaw mi fich ngeni ewe kékké oua ké ngeni:
2 fansoun meinisin oupwe tipetekison, tipepwetete, mosonottam, engilófengen lefilemi ren tong,
3 me oupwe fókkun achocho le túmúnú ewe tipeeú mi pop seni ewe ngún mi fel, fiti ewe kinamwe mi pinúkúfengenikemi.
4 Mi wor eú inis, me eú ngún, ussun chék an wor eú ápilúkúlúk oua ké ngeni,
5 emén chék Samol, eú lúkú, eú papatais,
6 emén chék Kot me Semen meinisin, ewe mi lapalap seni meinisin, ewe mi angang wóón kich meinisin, me ewe an manaman a angang wóón meinisin.
7 Iwe, emén me emén kich sia angei ewe kirekiréch mi somwoló me ren Kot, nge Kraist ewe a wisen ngeni emén me emén kich ena liffang.
8 Pún iei met a makketiw: “Lupwen a feitá lón ewe leeni mi tekiatá, a uwealó ekkewe chón ooló, mwirin i a tiinaaló ekkeei mwán pwe iir liffang.”
9 Iwe, met weween ei itiitin kapas “a feitá”? Weween, i a pwal feitiw lón ekkewe leeni fan, weween, fénúfan.
10 Ena emén mi feitiw pwal ina i chék ewe a feitá lón ewe leeni mi tekia seni ekkewe láng, pwe i epwe apwénúetá mettóch meinisin.
11 A fangoló ekkóch ar repwe aposel, ekkóch pwe repwe soufós, ekkóch pwe repwe chón afalafal, ekkóch pwe repwe chón mmas me sense,
12 pwe repwe áwena ekkewe chón pin, pwe repwe angang ngeni ekkewe ekkóch, pwe repwe aúfichietá inisin ewe Kraist,*
13 tori án oukich meinisin sipwe tipeeú lón ewe lúkú me lón ewe sile mi enlet ussun Néún Kot we, iwe ren ena sipwe ásimawóló ussun chék Kraist.
14 Iwe sisap chúen ussun semirit, pún ié mi fitaaló án aramas kewe asukul mi chofona iir kewe mi otupu aramas, epwe ussun efóch waa lemataw mi mammaanfeil ren mwékútúkútún ekkewe lóó me pépéfeil ren enienin ásepwál.
15 Nge ren tong, atun sia kapas enlet, ousipwe mámmááritá lón mettóch meinisin mi tipeeú ngeni ewe mékúr, Kraist.
16 Ren i, meinisin kifetin ewe inis ra kochufengen fán tipeeú me angangfengen lón iteiten nekupukup meinisin pwe repwe awora met mi lamot ngeni ewe inis. Atun iteiten eú me eú kifet ra féri en me wisan, iwe epwe álisaatá mámmááritáán ewe inis lón an aúfichietá pwisin i lón tong.
17 Iwe, iei met úa apasa me pwáraatá lón ewe Samol, ousap chúen eáni ewe manaw chón ekkewe ekkóch mwú ra manaweni lón ar eáni ekiek mi lamotongaw.
18 Ar ekiek a rochopwak me ra towaw seni ewe manaw mi pop seni Kot, pokiten rese mochen silei Kot, me pokiten tipeféreaan letiper.
19 Rese chúen meefi mengiringirin letiper, ese chúen wor pinepinen ar resap féri féfférún angolossá* ren ar féfféri meinisin féffér mi limengaw fiti mochenia.
20 Nge esap ina met oua káé ussun ewe Kraist.
21 Jises a asukula ewe enlet, me iká oua rongorong seni me káit seni, iwe oupwe fókkun silefichi ekkena mettóch.
22 Oua fen káit ámi oupwe pwilitawu ewe manawen lóóm mi lóngólóng wóón napanapemi me lóóm mi limengawoló ren mochenian mi otupukemi.
23 Iwe, oupwe sópweeló le eáni eú mineféén napanapen ekiek,
24 me oupwe eáni* ewe manaw mi fé mi ffér me ren met Kot a tipeni, ewe manaw mi enletin pwúng me túppwél.
25 Iwe, pokiten iei oua péútaaló angangen otuputup, emén me emén ámi oupwe kapas enlet ngeni chón órumi pún oukich kifetin eú chék inis.
26 Oupwe song, nge ousap féri tipis; ousap amwéchú ámi song tori tuputiwen ewe akkar;
27 ousap mut ngeni ewe Tefil an epwe etipetipakemi.
28 Emén mi sossolá esap chúen solá, nge epwe fen angang weires me féri angang múrinné ren péún, pwe epwe tongeni wor met epwe fang ngeni emén mi osupwang.
29 Ousap atowu och kapas mi ánnioput* seni lón awemi. Nge oupwe fen chék eáni kapas mi múrinné, pún chókkewe mi rongorong repwe péchékkúletá ren.
30 Pwal och, ousap áletipechowu án Kot we ngún mi fel. Pún oua fen pwaau ren pwe oupwe ngaseló ren ewe méén kepich atun epwe waroto ewe ránin amanaw.
31 Oupwe péútaaló senikemi meinisin sókkun chou, song, koput, chúwérúwér, me kapas mi ámmetek, me ekkewe pwal ekkóch sókkun mettóch mi efeiengaw.
32 Nge oupwe kirekiréchfengen lefilemi, unusen chúngúfengenikemi, enletin omusaaló tipisin emén me emén ussun chék án Kot enletin omusaakemiiló ren Kraist.
