Ngeni Ekkewe Chón Efisus 5:1-33
5 Iei minne, oupwe áppirú Kot, pún ámi néún mi áchengicheng,
2 me oupwe sópweeló le pwáári tong, ussun chék ewe Kraist a pwal tongekich* me a fangoló pwisin i pwe epwe eú liffang me eú asor mi pwoéch me ren Kot.
3 Ousap mwo nge féúni lefilemi féfférún lisowumwáál* me sókkun limengaw meinisin are tipemmóng, pún ese fich ngeni aramas mi pin.
4 Ese pwal fich ekkewe napanap mi ássáw are fós mi lamotongaw are kapasen urumwot mi annou, nge fen kapasen kilisou.
5 Pún oua silei me pwisin weweiti, pwe chón lisowumwáál* are chón limengaw are chón tipemmóng—ewe mi wewe ngeni chón fel ngeni uluulun—esap wor álemwirier lón Mwúún ewe Kraist me Kot.
6 Ousap mut ngeni emén an epwe otupukemi ren kapas mi péén, pún ren ekkena esin mettóch án Kot song epwe feito wóón ekkewe mi álleasolap.
7 Ina minne, ousap féri met iir ra féri,*
8 pún me lóóm ámi oua rochopwak, nge iei oua saram lón ewe Samol. Oupwe sópweeló le feffetál ussun chókkewe mi fetál lón saram,*
9 pún saram a uwaani meinisin sókkun múrinné me minne mi pwúng me enlet.
10 Oupwe sópweeló le nochchei met mi fich me ren ewe Samol,
11 me oupwe úkútiw le angolong lón ekkewe angang mi lamotongaw mi riri ngeni rochopwak, nge oupwe fen pwáriireló.
12 Pún a mmen ássáw ach sipwe mwo nge féúni ekkewe mettóch ra féri lemonomon.
13 Meinisin ekkewe mettóch ra pwápwááló ren ewe saram, pún mettóch meinisin mi pwááló, ra saram.
14 Ina minne a makketiw: “Neló, en chón méúr, kopwe pwáátá seni máló, me ewe Kraist epwe sarametiw wóóm.”
15 Iwe, oupwe fókkun mammasaéchú ámi feffetál pún esap ussun fetálin aramas mi umwes, nge epwe ussun aramas mi mirit,
16 oupwe alamotaéchú ámi fansoun, pún ekkeei fansoun ra fókkun ngaw.
17 Ina minne, oupwe úkútiw lón ámi miritingaw, nge oupwe sópweeló le kúkkútta minne letipen Jiowa.*
18 Ousap pwal sakawoló ren wain, pokiten a emmwen ngeni féfféringaw, nge oupwe sópweeló le ourakemiiló ren ewe ngún mi fel.
19 Oupwe apéchékkúlafengenikemi ren ámi eáni ekkewe kél mi fel, kélún mwareiti Kot, me ekkewe kélún fel. Oupwe kél ngeni Jiowa* seni unusen letipemi.
20 Fansoun meinisin oupwe kilisou ngeni ach we Kot me Semach we ren mettóch meinisin lón iten ach we Samol Jises Kraist.
21 Oupwe onómukemi fán nemenien emén me emén lón ámi niwokkusiti Kraist.
22 Ekkewe fefin repwe onómuur fán nemenien pwúlúwer kewe ussun chék ar onómuur fán nemenien ewe Samol,
23 pún ewe mwán i mékúren pwúlúwan we, ussun chék ewe Kraist i mékúren mwichefel, inisin we, ewe chón amanaw fán itan.
24 Iwe, ussun chék án ewe mwichefel onómu fán nemenien ewe Kraist, ekkewe fefin repwe pwal onómuur fán nemenien pwúlúwer kewe lón mettóch meinisin.
25 Ámi mwán kana, oupwe sópweeló le tongei pwúlúwemi kewe, ussun chék pwal ewe Kraist, a tongei ewe mwichefel me fangoló pwisin i fán itan
26 pwe epwe epinaaló ren an limeti ngeni konik, ina án Kot Kapas,
27 pwe ewe mwichefel epwe ling mwen mesan, esap wor tikitikipwúlún, terepwachan, are och taan, nge epwe pin me esap wor limengawan.
28 Pwal ina chék ussun ren ekkewe mwán, repwe tongei pwúlúwer kewe ussun chék ar tongei pwisin inisiir. Emén mwán mi tongei pwúlúwan a tongei pwisin i,
29 pún ese wor emén a oputa pwisin inisin,* nge a fen amwéngééni me aúcheani, ussun chék met ewe Kraist a féri ngeni ewe mwichefel,
30 pokiten kich kifetin inisin.
31 “Ren ei popun, emén mwán epwe likiti seman me inan me pach ngeni* pwúlúwan we, me ekkewe rúúemén repwe eú chék inis.”
32 Ei monomonun Kot mi fókkun lapalap úa kapas ussun, a weneiti Kraist me ewe mwichefel.
33 Iwe nge, ámi kana mwán, oupwe tongei en me pwúlúwemi ussun chék ámi tongei pwisin ámi. Nge ewe fefin epwe fókkun súféliti pwúlúwan we.
Footnote
^ Are ese mwáál, “tongekemi.”
^ Are “ousap ffitilong leir.”
^ Krik, “néún saram.”
^ Krik, “futukan.”
^ Are “nónnóm ren.”
