Ngeni Filimon 1:1-25
1 Seni ngang Paul, emén chón kalapus fán iten ái angang ngeni Kraist Jises, pwal seni pwiich Timoty, ngeni chienem chón angang mi áchengicheng Filimon,
2 me ngeni fefinem Apia, me ngeni chienem Arkipus, néún Kraist soufiu, me ngeni ewe mwichefel mi nóm lón imwom.
3 Amwo ewe kinamwe me kirekiréch mi somwoló seni Semach Kot me ewe Samol Jises Kraist epwe nóm remi.
4 Fansoun meinisin úa kilisou ngeni ái Kot atun úa féúni itom lón ái kewe iótek,
5 pún úa kan rongorong ussun óm lúkú me ewe tong ka eáni fán iten* ewe Samol Jises me fán iten* meinisin chókkewe mi pin.
6 Úa iótek pwe ewe lúkú ka pwáári epwe amwékútuk le mirititi mettóch meinisin mi múrinné a wor rech pokiten Kraist.
7 Pún úa meefi watteen pwapwa me ourur ren ái rongorong ussun óm tong, pokiten a péchékkúletá letipen ekkewe chón pin reom, en pwii.
8 Ina minne, ikáámwo a wor watteen ái pwúúng fán ásengesin Kraist le erenuk met mi pwúng óm kopwe féri,
9 nge pokiten ewe tong, a fen éch úpwe tingoreek, ngang Paul emén mwán mi chinnap, nge iei úa pwal emén chón kalapus fán ásengesin Kraist Jises.
10 Úa tingor ngonuk fán iten nei we Onesimus. Úa ussun emén seman atun úa nóm lón kalapus.*
11 Me akkomwan ese wor lamotan ngonuk, nge iei a wor lamotan ngonuk pwal ngeniei.
12 Ngang úa tiinsefálieló reom. I ewe úa tongei.
13 Úa mochen epwe chék nónnóm rei pwe epwe wiuk le angang ngeniei lón ái kalapus fán ásengesin ewe kapas allim.
14 Nge úse mochen féri och mettóch me lúkún óm mutatá, pwe óm féffér múrinné esap fis fán osenimu, nge epwe seni pwisin mochenum.
15 Neman iei wesewesen popun a mwo ló sonuk ren ekis fansoun, pwe epwe tongeni nómsefál reom tori feilfeiló,
16 esap chúen ussun emén chón angang nge a lap seni emén chón angang. A ussun emén pwiich mi áchengicheng, ákkáeúin me rei, nge epwele fen ifa me áchengichengin me reom, ussun emén chón angang me pwal emén pwiich mi áchengicheng lón án ewe Samol angang.
17 Iwe, iká ka ekieki pwe ngang emén chienom, fán kirekiréch kopwe etiwa i ussun chék óm etiwaei.
18 Iwe nge, iká a féri ngonuk och mettóch mi mwáál are liwinimmang ngonuk, ngang úpwe wisen omusa.
19 Ngang Paul, úa pwisin makkeei ei taropwe me úa pwon pwe úpwe wisen omusa an liwinimmang. Nge ka silei pwe pwal en a watte óm liwinimmang ngeniei.
20 Ewer, pwii, amwo kopwe etiwa ái ei tingor fán ásengesin ewe Samol. Kopwe ekinamwei letipei fán ásengesin Kraist.
21 Úa lúkúlúk pwe kopwe álleasochis, ina popun úa mak ngonuk pún úa silei pwe kopwe féri met mi lap seni minne úa apasa.
22 Pwal eú, kopwe pwal ammólnatá leeniei, pún neman ren ámi iótek úpwe musowu me úa tongeni ló chuurikemi.
23 Án Epafras, chienei we lón imwen kalapus fán ásengesin Kraist Jises, kapwong ngonuk,
24 pwal án Mark, Aristarkus, Timas, me Luk, iir chienei kewe chón angang.
25 Amwo án ewe Samol Jises Kraist kirekiréch mi somwoló epwe nónnóm remi pokiten ewe napanap mi múrinné oua pwáári.
