Ngeni Ekkewe Chón Filipai 1:1-30
1 Seni Paul me Timoty, néún Kraist Jises kewe chón angang, ngeni meinisin ekkewe chón pin néún Kraist Jises chón káé mi nóm Filipai fengen me ekkewe chónemmwen me chónálillisin mwichefel:
2 Amwo ewe kirekiréch mi somwoló me ewe kinamwe seni Semach Kot me ewe Samol Jises Kraist epwe nónnóm remi.
3 Úa kilisou ngeni ái Kot fansoun meinisin atun úa chemenikemi
4 lón iteiten meinisin ái iótekin tingor fán ásengesimi meinisin. Úa pwapwa iteiten ái eáni iótekin tingor,
5 pokiten ewe álillis oua awora fán iten ewe kapas allim seni ewe áeúin ránin ámi kerán rong tori ikenái.
6 Pún úa lúkúlúk ren ei mettóch, pwe Kot ewe mi poputááni ewe angang mi múrinné lón ámi epwe áwesaaló tori ewe ránin Kraist Jises.
7 Mi pwúng ngeniei ái úpwe ekieki ei ussumi meinisin, pokiten úa tongekemi seni unusen letipei, ámi ekkewe mi fitiei le eáni ewe kirekiréch mi somwoló lón ái kalapus, me lón ái penaatá ewe kapas allim me atun úa fós ngeni ekkewe néúwisin mwú pwe epwe wor ach pwúúng le afalafala ewe kapas allim.
8 Pún Kot nei chón pwáraatá ren úkúúkún ái pwosiitikemi meinisin fiti tong ussun chék án Kraist Jises we tong.
9 Iwe, iei met úa sópweeló le ikkiótek ussun, pwe ámi tong epwe lallapoló fiti ewe sile mi enlet me unusen weweéch,
10 pwe oupwe tongeni filaatá ekkewe mettóch mi fókkun aúchea, pwe esap wor ámi mwáál me ousap áchepeteki ekkewe ekkóch tori ewe ránin Kraist,
11 me oupwe ur ren ekkewe uwaan pwúng ren án Jises Kraist álillis, pwe aramas repwe silei úkúúkún watteen amwararen Kot me mwareiti.
12 Iwe, ámi pwii kana, úa mochen oupwe silei pwe nónnómui iei a álisaatá feffeitáán ewe kapas allim,
13 pwe ekkewe chón mmasa ewe kingen Rom me pwal aramas meinisin ra silei pwe ngang úa kalapus fán ásengesin Kraist.
14 Iei, pokiten ái kalapus, a lapóló án lape ngeni pwiich kewe lón ewe Samol lúkúlúk me ra kan apwóróusafeili ewe kapasen Kot fán pwora.
15 Ewer, ekkóch ra afalafala ewe kapas allim ussun ewe Kraist pokiten ar lólówó me okkuf ngeniei, nge ekkóch pokiten letiper mi múrinné.
16 Chókkana mi afalafal fán letip mi múrinné, ra afalafalafeili ussun ewe Kraist seni ar tong pokiten ra silei pwe úa kefilitá ái úpwe penaatá ewe kapas allim.
17 Nge chókkana mi afalafal pokiten ar lólówó me okkuf ngeniei, ra féri ena esap pokiten letiper mi múrinné nge pokiten koum, pún ra mochen osukosukaei lón ái kalapus.
18 Iwe, met mwirilóón? Kraist a silleló lón sókkopaten napanap ese lifilifil iká ren likótuputup are ren enlet, me úa pwapwa ren ena. Ren enletin, ngang úpwe pwal sópweeló le pwapwa,
19 pún úa silei pwe úpwe kúna manaw pokiten ámi iótek me álillisin ewe ngún mi fel Jises Kraist a fang ngenikich.
20 Ei a tipeeú ngeni ái lúkúlúk me ái ápilúkúlúk pwe esap wor met úpwe fókkun sáw ren, nge ren ái pwora le fós, Kraist epwe lingeló rei* ussun chék me mwan, ese lifilifil iká ren manaw are ren máló.
21 Iká úa manaw, úa áeá manawei fán iten Kraist, nge iká úa máló, ina feiéchúi.
22 Iwe iká úpwe sópweeló le manaw lón inisin futuk, ngang úpwe tongeni alapaaló ái angang fán iten ewe Kraist. Iwe nge, úsapw pwáári met úpwe filaatá.
23 A weires ái úpwe filaatá lefilen ekkena ruu mettóch, pún úa mochen ngaseló me nónnóm ren Kraist, pún ina met mi fókkun múrinné.
24 Iwe nge, a kon aúchea ngenikemi ái úpwe chék nónnóm remi lón futuk.
25 Ren ei popun, úa silei pwe úpwe chúen manaw, ewer, úpwe chék nónnóm remi meinisin pwe oupwe feffeitá lón ámi angang ngeni Kot me oupwe pwapwa lón ámi lúkú,
26 iwe atun úpwe liwinitikemi, epwe lapóló ámi pwapwa pokiten ámi chón tapweló mwirin Kraist Jises.
27 Oupwe manaweni ewe manaw mi fich ngeni kapas allimen ewe Kraist pwe ese lifilifil iká úpwe chuurikemi are úsapw, oupwe úppós, eáni eú chék ekiek,* tipeeúfengen, me eáni eú chék letip pwe oupwe akkamwéchú ámi lúkú ewe kapas allim,
28 me ousap niwokkusiti chón oputakemi. Ekkena mettóch ra ánnetatá pwe repwe ninniiló, nge ámi oupwe kúna manaw, me Kot a fen affata ena.
29 Pún a fen fang ngenikemi ewe feiéch ren ámi oupwe eáni lúkú lón Kraist me pwal kúna riáfféú fán ásengesin.
30 Pún a torikemi ekkewe osukosuk ra pwal toriei, ekkewe oua silei pwe ra chúen tottoriei.
