Ngeni Ekkewe Chón Filipai 4:1-23
4 Iwe ámi pwii kana, úa tongekemi me pwosiitikemi, ámi ái pwapwa me winnei.* Ámi mi áchengicheng, oupwe núkúchar lón ewe Samol ussun met úa fen fós ussun.
2 Úa pesei Iutia, úa pwal pesei Sintike ar repwe tipeeúfengen lón ewe Samol.
3 Ewer, úa pwal tingor ngonuk en chiechiei chón angang mi túppwél, óm kopwe sópweeló le ákkálisi ekkeei fefin mi fitiei lón ái angang weires fán iten ewe kapas allim, fitifengen me Klement me pwal chienei kewe mi mak iter lón ewe puken manaw.
4 Fansoun meinisin oupwe pwapwa lón ewe Samol. Úpwe apasasefálli, Oupwe pwapwa!
5 Ámi tipemirit epwe pwápwááló ngeni aramas meinisin. Ewe Samol ese towaw senikich.
6 Ousap aúrek ren och mettóch, nge oupwe isettá ngeni Kot lón iótek meinisin met oua aúreki, me oupwe iótek ngeni seni unusen letipemi fiti tingor me kilisou.
7 Iwe, án Kot we kinamwe, ewe mi luluuló seni met aramas ra tongeni weweiti, epwe túmúnú letipemi me ekiekimi lón Kraist Jises.
8 Ina minne, ámi pwii kana, oupwe sópweeló le ekieki ekkeei mettóch: Minne mi enlet, minne mi aúchea, minne mi pwúng, minne mi limeliméch, minne mi fich án aramas repwe efich, minne mi ésúúfél, minne mi múrinné, me minne mi fich án aramas repwe mwareiti.
9 Oupwe apwénúetá ekkewe mettóch oua káé seniei, oupwe etiwa, rong, me kúna, iwe ewe Koten kinamwe epwe nónnóm remi.
10 Úa fókkun pwapwa lón ewe Samol pwe iei oua pwársefálli ámi chúngúei. Inaamwo iká oua fen chúngúei, nge ese wor atun ámi oupwe pwáári.
11 Úse apasa ei pokiten úa osupwang, pún úa pwisin káé ái úpwe atufichiei ese lifilifil nónnómui.
12 Úa tongeni pwapwa ren met mi kúkkún are watte. Úa fen silei met ekkóch chék aramas ra silei: Úa káé ái úpwe menemenéch, ese lifilifil iká mi wor enei mwéngé are úa echik, iká úa wéúéch are úa osupwang.
13 Pún a wor ái péchékkúl lón mettóch meinisin ren ewe emén mi fang ngeniei manaman.
14 Iwe nge, úa kilisou ren ámi fitiei lón ái riáfféú.
15 Ren enletin, ámi chón Filipai oua pwal silei pwe mwirin ámi we kerán rong ewe kapas allim, atun úa ló seni Masetonia, ese wor eú mwichefel a ngeniei álillis me angei seniei álillis, pwe fókkun ámi chék,
16 pún atun úa nóm Tesalonika, oua tiitiito met úa osupwangan, esap chék fán eú nge fán ruu.
17 Esap ren ái úpwe kútta liffang, nge úa mochen pwe ámi féffér múrinné epwe lapóló mwen mesen Kot.
18 Iwe nge, a fen wor rei mettóch meinisin úa osupwangan me a fen lap seni. Iei a chómmóng met mi wor rei pún úa angei seni Epafrotitus ekkewe mettóch oua tiinaato. Minne oua tiinaato a ussun eú asor mi pwokkus mi ketiw me ren Kot.
19 Pokiten ei, ái we Kot mi fókkun watte wéún epwe néúnéú Kraist Jises le awora ngenikemi meinisin met oua osupwangan.
20 Iwe, ach we Kot me Semach epwe ling tori feilfeiló chék. Amen.
21 Oupwe uwei ái kapwong ngeni meinisin ekkewe chón pin iir néún Kraist Jises chón káé. Pwiich kewe mi nóm rei ra pwal tiinaaló ar kapwong ngenikemi.
22 Meinisin ekkewe chón pin, nge ákkáeúin chókkewe mi nóm lón telinimwen Sisar,* ra tiinaaló ar kapwong ngenikemi.
23 Amwo ewe Samol Jises Kraist epwe efeiéchúkemi ren an kirekiréch mi somwoló pokiten ewe napanap oua pwáári.
