Ngeni Chón Ipru 10:1-39
-
Asoren man ese tongeni amóeló tipis (1-4)
-
Ewe Allúk, ina chék ngúnúwen met epwe feito (1)
-
-
Án Kraist asor fán eú chék fán iten fansoun meinisin (5-18)
-
Eú mineféén al mi emmwenikich ngeni manaw (19-25)
-
Sisap etiwaaló ach mwichfengen (24, 25)
-
-
Éúréúr fán iten emén mi tipeni le féfféri tipis (26-31)
-
Sipwe lúkúlúk me lúkú pwe sipwe likiitú (32-39)
10 Pokiten ewe Allúk ina chék ngúnúwen ekkewe mettóch mi múrinné repwe feito, nge esap ikkena wesewesen ekkewe mettóch, iwe ewe Allúk me ekkewe asor aramas ra kan ákkeáni iteiten ier resap tongeni ounuséchúoló chókkewe mi fel ngeni Kot.
2 Iká ina, iwe esap pwe ewe angangen eáni asor epwele úkútiw? Pún chókkewe mi eáni angang mi pin ra fen liméchúló, iwe resap chúen mengiringir ren ar kewe tipis.
3 Nge, ekkena asor ra áchchema ngeni aramas iteiten ier pwe iir chón tipis,
4 pún ese tufich án chchaan ekkewe kou me siike repwe uwealó tipis.
5 Ina minne, atun a feito fénúfan, i a apasa: “ ‘Kese chúen efich ekkewe asoren man me ekkewe pwal ekkóch asor, nge ka ammólnatá eú inis fán itei.
6 Kese chúen etiwa ekkewe asoren kek me asoren tipis.’
7 Iwe úa apasa: ‘Nengeni, úa feito. Iei met a makketiw lón ewe puk ussui. Ái Kot, úa feito pwe úpwe féri letipom.’ ”
8 Mwirin an we apasa: “Kese chúen efich are kese chúen etiwa ekkewe asoren man me ekkewe pwal ekkóch asor me ekkewe asoren kek me asoren tipis”—ekkewe asor ra eáni me ren ewe Allúk—
9 iwe, a pwal apasa: “Nengeni, úa feito pwe úpwe féri letipom.” A amóeló ewe minen akkomw pwe epwe anúkúchara ewe oruuan.
10 Pokiten ei ‘letipen’ Kot, sia piniló ren án Jises Kraist asoresini inisin fán eú chék fán iten fansoun meinisin.
11 Pwal och, meinisin ekkewe souasor ra kan nóm lón en me leenian iteiten rán pwe repwe féri ar angang mi pin me eáni ekkewe asor ra kan eáni iteitan, ekkewe rese fókkun tongeni unusen amóeló tipis.
12 Nge Kraist a eáni eú chék asor fán iten tipis nge manamanan a nóm tori feilfeiló chék, mwirin a móttiw lepeliefichin Kot.
13 Iwe, seni ena atun a witiwit tori án chón koputan kewe repwe wiliiti leenien pwuun pechen.
14 Pún ren ewe eú chék asor, i a ounuséchúoló chókkewe mi piniló tori feilfeiló chék.
15 Pwal och, ewe ngún mi fel a pwal ánneta ei ngenikich, akkomw a apasa:
16 “Jiowa* a apasa, ‘Iei ewe pwonen etipeeú úpwe eáni ngeniir mwirin ekkena fansoun. Ngang úpwe isenalong ái kewe allúk lón letiper me makkeretiw lón ekiekiir.’ ”
17 Mwirin a pwal apasa: “Úsapw chúen chemeni tipisiir kewe me ar kewe féffér mi ngaw.”
18 Iwe, ia a wor ie omusomusen ekkeei mettóch, ese chúen lamot asor fán iten tipis.
19 Ina minne, ámi pwii kana, pokiten sia lúkúlúk le tolong lón ewe leeni mi pin ren chchaan Jises,
20 ewe a suuki ngenikich eú mineféén al mi emmwenikich ngeni manaw me ren ewe kaaten, ewe mi wewe ngeni futukan,
21 me pokiten a wor emén néúch souasor mi lapalap lón ewe imwen Kot,
22 sipwe arap ngeni ren enletin letipach me ach unusen lúkú, pún letipach a limelim seni eú mwelien letip mi ngaw, me inisich a limelim lón konik mi liméch.
23 Ousipwe achocho le esilefeili ach we ápilúkúlúk me sisap tipemwárámwár, pún ewe emén mi eáni ena pwon, i mi alúkúlúk.
24 Ousipwe ekieki ussun ach sipwe alollolaatái emén me emén kich ren ach sipwe pwáári tong me féffér múrinné.
25 Ousisap etiwaaló ach mwichfengen, ussun met ekkewe ekkóch ra féfféri, nge sipwe apéchékkúlafengenikich, me alapaaló ach féri ekkeei mettóch meinisin pún ewe rán a arapoto.
26 Pún iká sia tipeni le féfféri tipis mwirin ach silei ewe sile mi pwúng ussun ewe enlet, iwe esap chúen wor asor fán iten ach tipis,
27 nge fán niwokkus sipwe witiwiti ewe kapwúng me ewe song mi sarara ussun ekkei, ewe epwe arosaaló chókkewe mi ú ngeni Kot.
28 Emén mi álleasolapa ewe Allúkún Moses epwe ninniiló ren án rúúemén are úlúmén kapasen pwáraatá nge esap kúna úméúméch.
29 Met meefiemi, epwe ifa úkúúkún watteen ewe kapwúng mi fich ngeni emén mi puratiw Néún Kot we, mi ekieki pwe ese wor aúchean chchaan ewe pwonen etipeeú mi fen epinipiniló ren, me asonga ewe ngúnún Kot ewe mi fangoto kirekiréch mi somwoló?
30 Pún sia silei ewe Emén mi apasa: “Wisei ái úpwe ngeni emén chappen an tipis. Ngang úpwe ngeniir chappen ar féffér mi ngaw.” A pwal erá: “Jiowa* epwe apwúngú néún aramas.”
31 A mmen eniwokkus án emén kúna kapwúng me ren ewe Kot mi manaw.
32 Iwe nge, oupwe chechchemeni pwe mwirin ámi silei ewe enlet, oua likiitú fán watteen weires fiti riáfféú.
33 Fán ekkóch oua kúna esiit me riáfféúmwáál mwen mesen aramas, me fán ekkóch oua fiti chókkewe mi pwal kúna ekkena esin mettóch lón ar riáfféú.
34 Oua pwáári tong ngeni chókkewe mi nóm lón kalapus, me oua chúen pwapwa inaamwo iká emén a angei pisekimi, pún oua silei pwe mi wor pisekimi mi fókkun múrinné seni me epwe nómoffóch.
35 Ina minne, ousap péútaaló senikemi ámi pwora,* ewe epwe atoto ngenikemi watteen liiwin.
36 A lamot ngenikemi likiitú, pún mwirin ámi féri letipen Kot, oupwe kúna pwénútáán an pwon.
37 Pún “ekiseló chék,” “ewe emén epwe feito epwele war me esap mmang.”
38 “Nge nei we chón angang mi pwúng epwe manaw ren lúkú,” me “iká epwe nimárámársefál, ngang úsapw pwapwa ren.”
39 Iwe, esap kich ewe sókkun aramas mi nimárámársefál mi emmwen ngeni kitetteriló, nge kich ewe sókkun aramas mi wor ach lúkú pwe sipwe seláni manawach.
