Ngeni Chón Ipru 11:1-40
11 Lúkú a wewe ngeni ach áchiféúa minne sia ápilúkúni, ina ewe pisekin ánnet mi fataffatéch mi pwáári pwe mi wesewesen wor ekkewe mettóch sise tongeni kúna.
2 Pún ren ena, ekkewe aramas lóóm* ra angei kapasen pwáraatá pwe Kot a pwapwa rer.
3 Ren lúkú, sia weweiti pwe a kkótoló ei ótóten fénúfan* ren alon Kot, pún met ekkewe sia tongeni kúna, ra fis seni ekkewe mettóch sise tongeni kúna.
4 Ren lúkú, Epel a eáni eú asor ngeni Kot mi aúchea seni án Ken asor, me ren ena lúkú a angei pisekin pwáraatá pwe i emén mi pwúng pún Kot a etiwa an liffang. Iwe pokiten an lúkú, inaamwo iká a fen máló, nge sia chúen káé seni.
5 Ren lúkú, Kot a uwealó Inok ekis pwe esap riáfféú me mwen an máló, me ese wor emén a kúna i pún Kot a uwealó. Iwe, me mwen án Kot uwealó, a fen pwáraatá ngeni pwe a fókkun apwapwaai i.
6 Pwal och, iká ese wor án emén lúkú, iwe, ese fókkun tongeni apwapwaai Kot, pún ié a mochen arap ngeni Kot, a lamot epwe lúkú pwe i wesewesen emén, me i ewe chón liiwini chókkewe mi enletin kúkkútta i.
7 Ren lúkú, Noa a pwáári an niwokkusiti Kot atun a angei éúréúran ussun ekkewe mettóch repwe fis me mwen ar repwe pwááló ngeni aramas, me a fala efóch waimw pwe epwe amanawa chón leimwan. Iwe, ren ena lúkú a apwúngú chón fénúfan, me a wiliiti chón álemwiri pwúng pokiten an lúkú.
8 Ren lúkú, Eperiam a álleasochis lupwen Kot a ereni an epwe ló ngeni eú leeni pwe epwe angei pwe álemwirian. A ló inaamwo iká ese silei ia we epwe ló ie.
9 Ren lúkú, a nónnóm lón ewe fénú mi pwonetiw ussun emén chón ekis, a nóm lón imw mangaku ren Aisek me Jekop, chienan kewe chón álemwiri pwal ena chék pwon.
10 Pún i a witiwiti ewe telinimw mi péchékkúl lóngólóngun, ewe Kot a wisen anapanapa me aúetá.
11 Pwal ren lúkú, Sara a pwopwo* inaamwo iká a chinnap,* pún a lúkú pwe ewe Emén mi eáni ena pwon, i mi túppwél.
12 Ina minne, seni ewe chinnap* Eperiam, chómmóng ra uputiw ussun chómmóngun fúún láng me pwal ussun ppien órosset ese tongeni lea.
13 Meinisin iir ra máló lón ar lúkú. Inaamwo iká ekkewe pwon repwe pwénútá lón mwachkkan, nge me rer ussun itá ra fen kúner me ra pwapwa rer, ra pwal pwáraaló pwe iir chón ekis me resap wiliposoló lón ewe fénú.
14 Pún chókkewe mi kapas lón ena esin napanap ra affatafichi pwe ra enletin kúkkútta pwisin leenier.
15 Iwe nge, iká ra chék ekkekieki ussun ewe leeni ra feito me ie, iwe, epwe wor ar fansoun fich le liwinsefál ngeni.
16 Nge iei ra tipeni eú leeni mi múrinné, ina ewe leeni seni láng. Ina minne, Kot ese sáwásini ar repwe kér ngeni ar Kot, pún i a fen ammólnatá eú telinimw fán iter.
17 Ren lúkú, ussun itá nge Eperiam a fen eáni asor Aisek atun a kúna sóssót me ren Kot. Ewer, ena mwán mi pwapwa le angei ekkewe pwon, a mmólnetá le eáni asor néún we áláemén
18 inaamwo iká Kot a fen ereni: “Mwirimwirum kewe repwe feito seni Aisek.”
19 Nge a lúkú pwe Kot a tufichin amanawaatá néún na pwal mwo nge seni máló, me ussun itá a angeisefáli néún na seni máló. Ei a pwáári met epwe fis lón mwachkkan.
20 Pwal ren lúkú, Aisek a efeiéchú Jekop me Iso ren ekkewe mettóch repwe feito.
21 Ren lúkú, lupwen Jekop epwele máló, a efeiéchú néún Josef kewe me a fel ngeni Kot atun a itetá wóón wokun we.
22 Ren lúkú, lupwen Josef epwele máló, a fós ussun án néún Israel kewe towu seni Isip,* me a allúkú ngeniir ar repwe uwealó chúún kewe seni ikena.
23 Ren lúkú, semen me inen Moses kewe ra opaaló lón úkúúkún úlúngát maram mwirin an uputiw pokiten ra kúna pwe ena semirit a átéch me rese niwokkus ar repwe atai án ewe king we allúk.
24 Ren lúkú, lupwen Moses a wattetá, i ese mochen an epwe iteni néún néún Farao fépwúl,
25 a filaatá an epwe eti néún Kot kewe aramas le kúna riáfféú lap seni ewe pwapwa epwe meefi ren ekis fansoun ren an féri tipis,
26 pún me ren, an kúna itengaw ren an Emén mi Kepit* a kon aúchea lap seni wéún Isip, pún i a nefótófót wóón ewe liiwin epwe angei.
27 Ren lúkú, a ló seni Isip me ese niwokkus ren án ewe king song. Nge a fen sópweeló lón an úppós me ussun itá a kúna ewe Emén sise tongeni kúna.
28 Ren lúkú, a féri ewe Pasofer me aparasatá ewe chcha wóón ekkewe asam, pwe néún Kot we chónláng esap nieló néún chón Israel kewe mwánichi.
29 Ren lúkú, ra fetáleló lón ewe Setipar ussun itá nge ra fetál wóón fénú mi pwás, nge atun ekkewe chón Isip ra sótun fetáleló lón, ra mwalum.
30 Ren lúkú, ewe ttitin Jeriko a tatiw mwirin án ekkewe aramas pwellifeili úkúúkún fisu rán.
31 Ren lúkú, ewe fin lisowu Reap ese fiti ekkewe chón álleasolap le máló pokiten a etiwaéchú ekkewe spai.
32 Iwe met úpwe pwal chúen apasa? Pún ese naf ewe fansoun iká úpwe sópweeló le fós ussun Kition, Parak, Samison, Jefta, Tafit, pwal Samuel, me ekkewe pwal ekkóch soufós.
33 Ren lúkú ra okkufu ekkewe mwú, penaatá minne mi pwúng, angei ekkewe pwon, pinei awen ekkewe laion,
34 akaúlóói ngetengeten ekkei, sú seni mesen ketilas, ra apwangapwang nge ra péchékkúletá, ra pwora lón maun, me ra áchcheeló ekkewe mwichen soufiu mi maun ngeni fénúer.
35 Aramasen ekkewe fefin, ra manawsefál seni máló. Inaamwo iká aramas ra eriáfféwú ekkewe mi túppwél, nge iir rese úkútiw lón ar túppwél ngeni Kot fán iten chék ar repwe ngaseló, ra féri ei pwe repwe manawetá ngeni ewe esin manaw mi fókkun múrinné.
36 Ewer, ekkóch ra kúna sóssót ren kapasen turunufas me kawet, nge lap seni ena, ra féfé ngeni sein me kalapus.
37 Aramas ra manei ngeniir faw, ra kúna sóssótun ar lúkú, a ngerengerfesen inisiir, ra máló ren ketilas, ra úféúf únúchen siip me únúchen kou, ra mwelele, ra kúna riáfféúmwáál, a fis ngeniir kirikiringaw,
38 me ei fénúfan ese fich ngeniir. Ra nómofetál lón fénúpéén me wóón ekkewe chuuk me lón ekkewe pokuwo me lón ekkewe pwaang fán pwúl.
39 Iwe, inaamwo iká iir meinisin ra angei kapasen pwáraatá pwe Kot a pwapwa rer pokiten ar lúkú, nge rese kúna pwénúetáán ewe pwon,
40 pún Kot a fen kúna och mettóch mi múrinné fán itach pwe resap akkomw unuséchúló mwach.
Footnote
^ Are “semelapach kewe.”
^ Are “angei manaman pwe epwe pwopwo.”
^ Weween, ese chúen tongeni néúnéú.
^ Krik, “máló.” Weween, ese tongeni awora mwirimwirin.
^ Ewe kapasen Krik mi néúnéú ikeei a riri ngeni ewe kapasen Krik fán iten ewe puken Ekistos.
^ Krik, “Kraist.”
