Ngeni Chón Ipru 2:1-18
2 Ina popun a lamot ach sipwe fókkun nefótófót wóón ekkewe mettóch sia rong pwe sisap pase seni ewe lúkú.
2 Pún iká a pwá pwe mi pwúng met ekkewe chónláng ra apasa, me iká a fis fán pwúng kapwúngún meinisin tipis me féfférún álleasolap,
3 ifa ussun sipwe tongeni sú iká pwe sia túmúnúngaw ngeni ewe amanaw mi lapalap? Pún ach Samol a akkomw kapas ussun, me chókkewe mi rong ra ánneta ngenikich,
4 me Kot a pwal pwáári pwúngún ena ren an áeá esissil me manaman me sókkopaten angang mi amwarar, pwal ren einetin ewe ngún mi fel me ren mochenin letipan.
5 Pún Kot ese ewisa ngeni ekkewe chónláng ar repwe nemeni ewe fénúfan epwele feito, ewe áúa fós ussun.
6 Nge iei met emén aramas a fen pwáraatá: “Met aúchean emén aramas pwe ka ekieki ussun, are met aúchean emén néún aramas pwe ka túmúnú?
7 Ka féri an epwe ekis kis seni ekkewe chónláng, ka ámwárámwára ngeni ling me itéch, me seikaatá an epwe túmúnú férien poum kewe.
8 Ka fen isettiw mettóch meinisin fán pechen.” Pún atun Kot a mut ngeni mettóch meinisin an epwe nemeni, ese wor och esap nóm fán nemenian. Iwe nge, iei sisaamwo kúna án Jises a nemeni mettóch meinisin.
9 Nge sia kúna Jises, ewe mi ffér an epwe ekis kis seni ekkewe chónláng, me pokiten a kúna riáfféún máló, a mwárámwár ling me itéch. Iwe, ren án Kot kirekiréch mi somwoló, i a máló fán iten aramas meinisin.
10 Mettóch meinisin ra fisitá ren i me ra fisitá fán iten lingen Kot. Iwe, ren án chómmóng naw repwe lingeló, a fich án Kot epwe mut ngeni ewe Samol an epwe riáfféú, ina minne a fich an epwe amanawer.
11 Pún ewe emén mi epinipiniló me chókkewe repwe piniló, iir meinisin seni chék emén sam, ina popun ese sáw le kér ngeniir pwiin,
12 ussun met a erá: “Úpwe esilei ngeni pwii kewe itom. Úpwe mwareituk ren kél lein chón ewe mwichefel.”
13 A pwal erá: “Ngang úpwe onómu ái ápilúkúlúk wóón i.” A pwal erá: “Ngang iei ren ekkewe semirit Jiowa* a ngeniei.”
14 Iwe nge, pokiten “ekkewe semirit” iir futuk me chcha, i a pwal wiliiti futuk me chcha, pwe ren an máló epwe nieló ewe emén mi efisi máló, ina i ewe Tefil,
15 me epwe tongeni angasaaló meinisin chókkewe mi fétek lón unusen manawer ren ar niwokkusiti máló.
16 Pún esap wesewesen ekkewe chónláng ekkewe a álisiir, nge a álisi mwirimwirin Eperiam kewe.
17 Ina minne, a lamot an epwe ussun chék “pwiin kewe” lón mettóch meinisin. A féri ena pwe epwe tongeni wiliiti emén souasor mi lapalap mi féri án Kot angang ren úméúméch me álleasochis pwe epwe eáni eú asoren chásefál fán iten tipisin aramas.
18 Pokiten i pwisin a kúna riáfféú atun a kúna sóssót, iwe a tongeni álisi chókkewe mi pwal kúna sóssót.
