Ngeni Chón Ipru 3:1-19
3 Ina minne, ámi pwii kana mi pin, mi ké ámi oupwe feitá láng, oupwe ekieki ussun Jises, ewe mi tiitiito* me ewe souasor mi lapalap sia pwáraatá ussun.
2 I a túppwél ngeni Kot, ewe mi ewisa ngeni ena wis, ussun chék Moses, a pwal túppwél atun a angang lón imwen Kot we.
3 Nge ewe ling mi fich ngeni, a kon lap seni án Moses, ussun chék emén mi aúetá eú imw, a kon itéch lap seni ewe imw.
4 Ewer, iteiten imw meinisin a wor chón aúetá, nge ewe Chón Féraatá mettóch meinisin, ina i Kot.
5 Moses a túppwél lón an angang lón unusen imwen Kot we. An angang a pwáraatá ussun ekkewe mettóch Kot epwap kapas ussur me mwirin.
6 Nge Kraist i emén naw mi túppwél lón imwen Kot we. Iwe kich chón leimwan na iká sia sópweeló le kapas fán pwora me kémwéchúnúk wóón ach we ápilúkúlúk, ewe sia pwapwa ren tori sópwólóón.
7 Ina minne, ussun met a makketiw me ren ewe ngún mi fel: “Ikenái, iká oua aúseling ngeni léúwan,
8 ousap tipeférea ussun semelapemi kewe, iir kewe ra fókkun asongaei atun ra sótuniei me lón ewe fénúpéén,
9 ikewe ra sótuniei me ie, inaamwo iká ra fen kúna ái kewe angang ren úkúúkún 40 ier.
10 Ina minne úa oputa ei táppin aramas me erá: ‘Fansoun meinisin ra álleasolapa aloi, me ra tunaaló ái kewe féffér.’
11 Ina minne, úa ékképél fán ái song: ‘Resap tolong lón ái asésé.’ ”
12 Ámi pwii kana, oupwe túmúnúkemi pún án emén tokkoló seni ewe Kot mi manaw a tongeni ámááraatá eú leluk mi ngaw me esap wor an lúkú.
13 Nge oupwe sópweeló le apéchékkúlafengenikemi iteiten rán, lón ei atun mi chúen iteni “Ikenái,” pwe esap wor emén me leimi epwe tipeférealó ren otuputupun manamanen tipis.
14 Pún sipwe angei met ewe Kraist a angei iká pwe sia kémwéchúnúk tori sópwólóón ewe lúkúlúk sia eáni me lepoputáán.
15 Ussun met a fen erá, “Ikenái, iká oua aúseling ngeni léúwan, ousap tipeférea ussun semelapemi kewe, iir kewe ra fókkun asongaei.”
16 Pún ié kewe ra rong, nge ra fókkun asonga? Esap pwe meinisin chókkewe mi towu seni Isip fán emmwenien Moses?
17 Pwal och, ié kewe Kot a oputer ren úkúúkún 40 ier? Esap pwe chókkewe mi féri tipis, iir kewe mi máátiw lón ewe fénúpéén?
18 Nge ié kewe a ékképélúúr ar resap tolong lón an asésé? Esap pwe chókkewe mi álleasolap?
19 Iwe, sia kúna pwe resap tongeni tolong lón an asésé pokiten ese wor ar lúkú.
Footnote
^ Are “ewe aposel.”
