Ngeni Chón Ipru 7:1-28
7 Átei Melkisetek, kingen Salem, néún ewe Kot mi Unusen Tekia souasor, a chuuri Eperiam atun án Eperiam liwin seni an nieló ekkewe king me a efeiéchú,
2 iwe, Eperiam a ngeni eú leengolun mettóch meinisin. Akkomw, itan we a wewe ngeni “Kingen Pwúng,” nge me lúkún ena, i kingen Salem, weween, “Kingen Kinamwe.”
3 Ese ffat ié seman me inan, ese wor uruwoon an lewo, ese ffat ineet a uputiw me ineet a máló, nge pokiten a ffér pwe epwe ussun ewe Néún Kot, iwe, a souasor tori feilfeiló chék.
4 Nengeni úkúúkún tekian ena mwán, ewe semelapach we Eperiam a ngeni leengolun ekkewe mettóch mi múrinné seni meinisin a liapeni lón maun.
5 Mi pwúng, me ren ewe Allúk, néún Lifai kewe mi angei wiser wisen souasor repwe ioni leengol seni aramas, weween seni pwiir kewe, inaamwo iká iir mwirimwirin Eperiam.
6 Nge ei mwán esap mwirimwirin néún Lifai kewe, a angei leengol seni Eperiam me a efeiéchú Eperiam, ewe mi angei ekkewe pwon seni Kot.
7 Aramas meinisin repwe tipeeú ngeni pwe ewe mi kis epwe angei feiéch seni ewe mi lap.
8 Ekkewe chón Lifai ra angei leengol me iir ra tongeni máló, nge ewe pwal emén mwán mi angei leengol, ekkewe Taropwe mi Pin ra affata pwe a chék sópwósópwoló le manaw.
9 Sia pwal tongeni apasa pwe pwal mwo nge Lifai, ewe mi angei leengol, a fen méénatiw leengol me ren Eperiam,
10 pún i esaamwo uputiw seni semelapan na atun Melkisetek a chuuri.
11 Iwe nge, iká mi tufich án emén epwe unuséch me ren kókkótun án ekkewe chón Lifai angangen souasor (pún ina kinikinin ewe Allúk mi kawor ngeni aramas), iwe pwata a lamot an epwe wor pwal emén souasor ussun Melkisetek nge esap ussun Aaron?
12 Pokiten a siwil ewe angangen souasor, a lamot epwe pwal siwil ewe Allúk.
13 Pún ewe emén ekkena mettóch ra fós ussun a feito seni pwal eú einang, ewe ese mwo wor emén seni a angang ren ewe róngen asor.
14 Pún a ffat pwe ach Samol a feito seni Juta, nge Moses ese fós ussun án souasor repwe feito seni ena einang.
15 A fataffatéchúló ena lupwen pwal emén souasor mi ussun chék Melkisetek a waroto,
16 ewe emén mi wisen souasor, esap pokiten an we einang ussun met ewe Allúk a apasa, nge pokiten ewe manaman mi awora ngeni ewe manaw ese tongeni kitetteriló.
17 Pún iei met Kot a apasa pwe minen pwáraatá ussun i: “En emén souasor ussun chék Melkisetek me kopwe souasor tori feilfeiló chék.”
18 Ina popun, Kot a amóeló ewe allúk minen akkomw pokiten a apwangapwang me ese álilliséch.
19 Pún ese wor met ewe Allúk a ounuséchúoló, nge ewe ápilúkúlúk mi múrinné Kot a ngenikich a ounuséchúoló. Iwe pokiten ena, sia arap ngeni Kot.
20 Pwal och, a fis ei ren pwon fán ékképél
21 (ren enletin, mi wor chókkewe ra souasor nge ese fiti pwon fán ékképél, nge ei emén a souasor ren eú pwon fiti án Kot ékképél, ewe mi apasa ei ussun i: “Ngang Jiowa* úa ékképél, me úsapw tongeni siwili ái ekiek, ‘En emén souasor tori feilfeiló chék’ ”),
22 ina minne, Jises a wiliiti ewe pisekin ánnet mi affata pwe eú pwonen etipeeú mi múrinné epwe pwénúetá.
23 Pwal och, pokiten ekkewe souasor ra mámmáló, rese tongeni sópweeló wiser, ina popun ekkóch ra wiir me sópweeló wiser na.
24 Nge pokiten i a manaw tori feilfeiló chék, ese wor emén epwe wii lón wisan we souasor.
25 Ina minne a pwal tufichin unusen seláni chókkewe mi iótek ngeni Kot lón itan. I a tongeni selániir pokiten a chék mammanaw ren an epwe tingorei Kot an epwe álisiir.
26 Pún a lamot ngenikich an epwe wor emén néúch ei esin souasor mi lapalap, i mi túppwél, ese wor tipisin, ese wor limengawan, mi káimuuló seni chón tipis, me a tekiatá seni láng.
27 Ese ussun ekkewe souasor mi lapalap, pún ese lamot an epwe eáni asor iteiten rán, akkomw fán iten pwisin tipisin, mwirin fán iten ekkewe aramas. A eáni asor fán eú chék atun a asoresini pwisin manawan. Me a eáni ena asor pwe epwe álisi aramas tori feilfeiló chék.
28 Pún ewe Allúk a seikaatá ekkewe souasor mi lapalap iir aramas mi wor ar apwangapwang, nge kapasen ewe pwon mi fiti ékképél mwirin ewe Allúk a seikaatá emén Naw, i átewe mi unuséch tori feilfeiló.
