Néún Jemes Taropwe 1:1-27
1 Ngang Jemes, emén néún Kot me ewe Samol Jises Kraist chón angang, úa kapwong ngeni ekkewe engol me ruu einang mi toropasfeil lón sókkopaten leeni.
2 Ámi pwii kana, oupwe pwapwa atun oua kúna sókkopaten sóssót,
3 pún oua silei pwe iká a ina ussun sóssótun ámi lúkú, iwe epwe efisi ámi likiitú.
4 Nge oupwe mut ngeni likiitú an epwe áweséchúoló an angang pwe oupwe tongeni unuséch me esap wor ámi tikitikipwúl lón mettóch meinisin, me ousap osupwangen och mettóch.
5 Iká emén me leimi a osupwangen tipáchem, epwe tittingorei Kot, iwe, epwe angei, pún Kot a fangafangéch ngeni meinisin me esap song ngeni ena emén mi tingor.
6 Nge epwe tittingor ren lúkú, esap fókkun tipemwárámwár. Pún emén mi tipemwárámwár a ussun lóón lemataw ásepwál a chék péénfetálei o oturfeili.
7 Ren enletin, ena esin aramas esap ekieki pwe epwe angei och mettóch seni Jiowa.*
8 I emén mi tiperúerú me wiliwilikkis lón féfférún meinisin.
9 Nge emén pwiich mi tekisosson epwe pwapwa pún a tekiatá mwen mesen Kot,
10 nge emén pwiich mi pisekisek epwe pwal pwapwa pún a tekisonetiw. Pún emén mi pisekisek epwe máló ussun epé pééniráán lemal.
11 Tétáán ewe akkar fiti pwichikkaran a eiemámmálóói ewe irá, me pééniráán a mworetiw o lingan a móróló, pwal ina ussun ren emén mi pisekisek, epwe móróló atun a cheei wéún.
12 A pwapwa ewe emén mi sópweeló lón an likiitú fán sóssót, pún lupwen a ketiw me ren Kot, epwe angei ewe feiéchún manaw. Ina ewe feiéch Jiowa* a pwonei ngeni chókkewe mi sópweeló le tongei I.
13 Lupwen emén a kúna sóssót, esap apasa: “Iei sóssótui me ren Kot.” Popun, pún ese wor emén a tongeni sótuni Kot an epwe féri minne mi ngaw me Kot esap pwal sótuni emén an epwe féri minne mi ngaw.
14 Nge emén me emén a kúna sóssót lupwen pwisin mochenin a sótuni me otupwaaló.
15 Iwe, lupwen án emén mochenia a fókkun péchékkúleló, a efisi an epwe tipis, iwe epwe emmwen ngeni máló.
16 Ámi pwii kana mi áchengicheng, ousap tupuló.
17 Meinisin sókkun liffang mi múrinné me meinisin sókkun liffang mi unuséch ra feitiw seni asan. Ra feitiw seni ewe Semen saramen láng, ewe ese sissiwil ussun sissiwilikisin núrún och mettóch.
18 Pún seni pwisin letipan, a efisi ach sipwe uputiw ren an áeá ewe kapas mi enlet. A féri ena pwe sipwe wiliiti mwenuwaan férian kewe.
19 Ámi pwii kana mi áchengicheng, oupwe chechchemeni ei: A lamot án meinisin repwe mwittir ngeni rong, mmang ngeni kapas, me mmang ngeni song,
20 pún án emén song esap aworato án Kot pwúng.
21 Ina minne, oupwe asúoló senikemi meinisin sókkun limengaw me minne mi ngaw meinisin, me oupwe tipetekison le mut ngeni Kot an epwe fótukaalong an kapas lón letipemi, ewe mi tongeni seláni manawemi.
22 Iwe nge, oupwe chón apwénúetá ewe kapas nge sap chón rong chék, pún oute pwisin otupukemi ren ámi ekiek mi mwáál.
23 Pún iká emén a chék rong ewe kapas nge ese apwénúetá, i a ussun emén mi oori pwisin wóón mesan lón eú kilasen oori.
24 A oori pwisin i, nge mwirin an a feiló, a mwittir ménúkaaló napanapan.
25 Nge ewe emén mi nennelong lón ewe allúk mi unuséch mi emmwen ngeni ngaseló me sópweeló le féri ena, epwe wiliiti emén chón apwénúetá ewe kapas, nge esap emén chón rong chék me ménúkaaló. Iwe, i epwe pwapwa lón minne a féri.
26 Iká emén a ekieki pwe i emén chón fel ngeni Kot nge ese nemeni chénawan, i a otupu pwisin letipan me epwe lamotmwáál an fel.
27 Nge iei ewe sókkun fel mi limeliméch o ese wor limengawan mwen mesen Semach Kot: Sipwe túmúnú ekkewe mi máásen me chókkewe mi má seniir pwúlúwer lón ar riáfféú, me sipwe túmúnú pwisinkich seni limengawen ei fénúfan.
