Néún Jemes Taropwe 2:1-26
2 Ámi pwii kana, mi tufich ámi oupwe lúkú ach we Samol Jises Kraist mi tekiatá nge pwal aapaap ngeni ekkewe ekkóch?
2 Iká emén mwán a tolong lón ámi mwiich nge a néúnéú ring kolt me úféúf úf mi ling, nge pwal emén mwán mi wéúngaw a tolong nge a úféúf úf mi limengaw,
3 oua efich ewe mi úféúf úf mi ling me ereni, “Kopwe móót lón ei leeni mi múrinné,” nge ereni ewe mi wéúngaw, “Kopwe chék úkkúútá” are, “Kopwe móttiw ikeei órun pechei”?*
4 Iká ina, iwe esap pwe ámi oua lifilifil aramas, me eáni kapwúng lón napanap mi ngaw?
5 Ámi pwii kana mi áchengicheng, oupwe rongorong. Esap pwe Kot a filaatá chókkewe mi wéúngaw me ren ekiekin chón fénúfan ar repwe pisekisek lón lúkú me repwe chón álemwiri ewe Mwú, ewe a pwonei ngeni chókkewe mi tongei i?
6 Nge ámi oua ésúfélúngawa ekkewe mi wéúngaw. Esap pwe ekkewe mi pisekisek iir ra eriáfféwúkemi me átekinikemiilong lón kapwúng?
7 Esap pwe ra turunufasa ewe it mi ésúúfél oua iteni?
8 Nge iká oua apwénúetá ewe allúk mi lap me ren ei wokisin, “Kopwe tongei chón órum ussun óm tongei pwisin en,” iwe oua féri minne mi múrinné.
9 Nge iká oua chék sópweeló lón ámi aapaap, iwe oua tipis, me a pwá me ren ewe allúk pwe ámi chón atai allúk.
10 Pún iká emén a álleasochisi meinisin masouen ewe Allúk nge a atai eú me leir, iwe i a atai unusen masouen ena Allúk.
11 Pún ewe emén mi apasa, “Kosap lisowumwáál,” a pwal apasa, “Kosap nimanaw.” Nge iká kese lisowumwáál nge ka nimanaw, iwe ka wiliiti emén chón atai allúk.
12 Oupwe sópweeló le eáni kapas me féffér ussun chék chókkewe repwe kúna kapwúng me ren ewe allúk mi angasaaló aramas.*
13 Pún emén ese pwáári úméúméch epwe kúna kapwúng ese fiti úméúméch. Úméúméch a tekia seni kapwúng.
14 Ámi pwii kana, met lamoten án emén apasa pwe a wor an lúkú nge ese fiti féffér? Ena lúkú esap tongeni seláni, iká met?
15 Iká emén pwiich are fefinach chón lúkú a osupwangen úfan, me a nafangaw anan mwéngéén eú rán,
16 nge emén me leimi a ereni, “Kopwe feiló fán kinamwe, epwichikarók me amétuk,” nge ouse uwou ngeni met ewe a osupwangan, met lamoten ena?
17 Iwe, pwal ina ussun ren lúkú, iká ese fiti féffér múrinné, a máló.
18 Iwe nge, emén epwe apasa: “Mi wor óm lúkú, nge a wor ái féffér. Kopwe pwáár ngeniei óm lúkú ese fiti féffér, nge ngang úpwe pwáár ngonuk ái lúkú ren ái féffér.”
19 En ka lúkú pwe mi wor emén chék Kot, iká met? Mi éch ena. Nge ekkewe timon ra pwal lúkú me chechchech.
20 En emén mi umwes, kese silei pwe lúkú ese fiti féffér a lamotmwáál?
21 Esap pwe semach we Eperiam a kúna pwúng ren an féffér mwirin an eáni asor néún we Aisek wóón ewe róngen asor?
22 A pwá pwe an lúkú a fiti féffér, me an lúkú a unuséchúló ren an kewe féffér,
23 me a pwénúetá ei wokisin mi apasa: “Eperiam a wor an lúkú, ina minne me ren Jiowa,* i emén aramas pwúng,” me i a iteni chiechien Jiowa.*
24 Iwe, emén aramas epwe emén chón pwúng me ren Kot ren an féffér, nge esap chék ren an lúkú.
25 Pwal ina ussun ren ewe fin lisowu Reap. A pwal emén chón pwúng me ren Kot ren an féffér mwirin an etiwaéchú ekkewe chón kúné me tiiniireló wóón pwal efóch al.
26 Ina minne, ewe inis a máló iká ese wor manaw* ren, iwe pwal ina ussun ren lúkú, a máló iká ese fiti féffér.
