Néún Jemes Taropwe 3:1-18
3 Ámi pwii kana, esap chómmóng me leimi repwe wiliiti sense, pún oua silei pwe sipwe angei watteen kapwúng lap seni ekkewe ekkóch.
2 Pún kich sia mwáálliló fán chómmóng. Iká emén esap mwáálliló lón an kapas, i emén mi unuséch, a pwal tufichin nemeni unusen inisin.
3 Iká sia uwoulóng mechá* lón awen ekkewe oris pwe repwe álleasochis ngenikich, sia pwal emmweni unusen inisiir.
4 Ekieki pwal ussun efóch siip: Ikáámwo a fókkun watte me pasefetál ren péchékkúlen ásepwál, nge ewe mwán mi nóm mwan a tongeni kasinfetálei ren an áeá efóch kúkkúnún sópwun irá.
5 Pwal ina ussun ren chénawach, eú kúkkúnún kifetin inisich nge a tongeni watte an sikesik. Pwal mwo eú kúkkúnún ngeten ekkei a tongeni kenaaló eú wollap, iká met?
6 Chénawach, a ussun eú ekkei. Ina eú kifetin inisich mi ur ren minne mi ngaw me a elimengawaaló unusen inisich. A tongeni efeiengawa manawach me a ussun Keena* pokiten a efeiengaw.
7 Pún iteiten manmwacho me machchang me mantété me ménún leset meinisin repwe fesir me ra fen fesireló ren aramas.
8 Nge ese wor emén aramas a tongeni efesira chénawan. Sise tongeni nemeni me a efeiengaw, a uren poison mi tongeni nieló emén.
9 Sia áeá le mwareiti Semach we Jiowa* Kot, nge sia pwal áeá le anúmamawa aramas, iir kewe mi ffér “lón napanapen Kot.”
10 Seni chék eú aw, a towu kapasen feiéch me anúmamaw.
Ámi pwii kana, ese pwúng ach sipwe féri ena.
11 Ifa ussun, konik mi ngar me konik mi kipwin ra tongeni puwachetá seni chék eú puwachen konik?
12 Ámi pwii kana, efóch fiik ese tongeni uwaani uwaan olif, are efóch kreip ese tongeni uwaani uwaan fiik, iká met? Iwe, sáát ese pwal tongeni opuowu konik.
13 Mi wor emén leimi a tipáchem me weweéch? A lamot an epwe wor án ena emén féffér múrinné mi pwáári pwe a féri mettóch meinisin fán mosonoson, ewe mi pop seni tipáchem.
14 Nge iká a wor lólówó me koum lón letipemi, ousap sikesik me apasa met mi ú ngeni ewe enlet.
15 Esap ina ewe tipáchem mi feitiw seni asan, nge ina án fénúfan, án chókkewe mi chék fitaaló mettóchun futuk, me án ekkewe timon.
16 Pún ia a wor lólówó me koum ie, ikena a pwal wor kkótongaw me meinisin sókkun mettóch mi ánnioput.
17 Nge ewe tipáchem seni asan, áeúin a limeliméch, mwirin a kinamwe, tipemirit, tipemecheres le álleasochis, uren úméúméch, me féri féffér múrinné, esap aapaap, me esap likótuputup.
18 Chókkewe mi efisi kinamwe repwe fóffót fán kinamwe me kini uwaan pwúng.
Footnote
^ Ina och sáál mi féfé ngeni úwen me awen emén oris pwe epwe tongeni nemeni ia epwe feiló ie.
