Néún Jemes Taropwe 4:1-17
4 Ia a pop seni ie fiu me ánini lefilemi? Esap pwe a pop seni ámi mochenian futuk mi ú fengen lón letipemi?
2 Oua mocheniaiti och mettóch nge ouse angei. Oua sópweeló le koputfengen me mocheniaiti pisekin aramas, nge ouse tongeni angei och. Oua sópweeló le fiu ussun itá nge oua fiti eú maun. Iká ese wor och remi, iwe ese wor pún ouse tingor.
3 Lupwen oua tingor ouse angei, pokiten oua tingor ren eú popun ese pwúng, ren ámi oupwe chék apwapwaai mochenin futukemi.
4 Ámi chón lisowumwáál,* ouse silei pwe chiechi ngeni ei fénúfan a wewe ngeni oputa Kot? Ina minne, ié a mochen chiechi ngeni ei fénúfan, a pwisin féri an epwe emén chón oputa Kot.
5 Are oua ekieki pwe ese wor popun án ewe wokisin apasa: “Letipach* mi emmwenikich ach sipwe lólówó, a efisi ach sipwe fókkun tipeni sókkopaten mettóch”?
6 Iwe nge, ewe kirekiréch mi somwoló I a fang, a fókkun lapalap seni lólówó. Ina minne, ewe wokisin a apasa: “Kot a ú ngeni chón lamalamtekia, nge a fang kirekiréch mi somwoló ngeni chón tipetekison.”
7 Ina minne, oupwe álleasochisi Kot me ú ngeni ewe Tefil, iwe, epwe sú senikemi.
8 Oupwe arap ngeni Kot, iwe i epwe arap ngenikemi. Ámi chón tipis kana, oupwe limeti péúmi, me ámi chón tipekinikin kana, oupwe eliméchú letipemi.
9 Oupwe letipechou me letipeta me ngúngúres. Ámi takir epwe wiliiti letipeta, nge ámi pwapwa epwe wiliiti letipechou.
10 Oupwe átekisonakemiitiw mwen mesen Jiowa,* me i epwe átekiakemiitá.
11 Ámi pwii kana, oupwe úkútiw le esiitafengenikemi. Ié a esiita are apwúngú pwiin, a esiita me apwúngú allúk. Iwe, iká ka apwúngú allúk, esap en emén chón apwénúetá allúk, nge en emén soukapwúng.
12 Kot chék ewe Chón Ffér Allúk me Soukapwúng. I chék a tongeni seláni are nieló emén. Iwe, en ié pwe kopwe apwúngú chón órum?
13 Oupwe aúseling, ámi mi apasa: “Ikenái are lesor ousipwe sái ngeni enan telinimw me nónnóm ikena eú ier, sipwe féri ach business me angei winnach,”
14 pwe ouse silei met epwe fis ngenikemi lesor. Pún manawemi a ussun eú étún konik mi pwá ren ekis chék fansoun, nge mwirin móróló.
15 Nge itá oupwe fen apasa: “Iká fán letipen Jiowa,* iwe sipwe manaw me féri ien me ien.”
16 Nge iei oua lamalamtekia lón ámi sikesik. Ena esin sikesik a fókkun ngaw.
17 Ina minne, iká emén a silei ifa ussun epwe féri minne mi pwúng nge ese féri, iwe a tipis.
