Néún Jemes Taropwe 5:1-20
5 Oupwe aúseling ámi aramas mi pisekisek, oupwe kechiw me ngúngúres ren ekkewe riáfféú repwele torikemi.
2 Wéúmi kewe ra kirouló, nge pwétúr ra áni úfemi kewe.
3 Ámi kolt me silifer ra paarangoló, nge paaranger epwe pwáraaló ámi mwáál me epwe ocheei futukemi. Minne oua ikkisoni epwe ussun eú ekkei lón ekkewe ránin lesópwólóón.
4 Nengeni, ekkewe chón angang mi kini uwaan ámi kewe atake ra kechiw pokiten ouse ngeniir peioffur, nge Jiowa,* ewe sounemenemen ekkewe láng, a rong án chókkana kechiwen álillis.
5 Oua manaweni manawen kinamwe me féri chék mochenimi me wóón ei fénúfan. Oua mwéngé me kitinnupuló tori ewe ránin ninniiló.
6 Ámi oua etipisi me nieló ewe chón pwúng. I a ú ngenikemi.
7 Iwe, ámi pwii kana, oupwe mosonottam tori warotoon ewe Samol. Nengeni, ewe chón atake a chék witiwiti ewe uwa mi aúchea epwe kini seni ewe pwúl, a mosonottam tori warotoon ewe útten mesemwan me ewe útten mwirin.
8 Ámi oupwe pwal mosonottam, oupwe apposa letipemi pún warotoon ewe Samol a chék arapoto.
9 Ámi pwii kana, ousap songfengen* lefilemi pwe ewe Samol esap apwúngúkemi. Nengeni, ewe Soukapwúng a útá ppen ekkewe asam.
10 Ámi pwii kana, oupwe áppirú ekkewe soufós, iir kewe mi kapas fán ásengesin Jiowa,* ra kúna chómmóng riáfféú me ra likiitú fán mosonottam.
11 Oua silei pwe chókkewe mi likiitú ra pwapwa.* Oua fen silei ussun án Jop likiitú me oua rong ifa ussun Jiowa* a efeiéchú i. Oua kúna pwe Jiowa* i emén Kot mi uren tong me úméúméch.
12 Ámi pwii kana, mwen mettóch meinisin, oupwe úkútiw le ékképél. Ousap ékképélú láng are fénúfan are pwal ekkóch ékképél. Ámi “Ewer” epwe ewer, nge ámi “Aapw” epwe aapw, pwe ousap tolong lón kapwúng.
13 Iká a wor emén leimi a nóm lón weires, iwe, epwe sópweeló le iótek. Iká a wor emén leimi a pwapwa, iwe, epwe eáni kélún mwareiti.
14 Iká emén leimi a samaw, i epwe kérato ekkewe mwán mi ásimaw lón ewe mwichefel pwe repwe ióteki me epiti i lón iten Jiowa.*
15 Iwe, ewe iótek mi pop seni lúkú epwe apéchékkúla ena chón samaw,* me Jiowa* epwe echikara. Pwal och, iká a féri tipis, an tipis epwe musoló.
16 Iei minne, oupwe pwárfengeni ámi kewe tipis me ióteki emén me emén leimi pwe oupwe chikar. Án emén chón pwúng tingormaw lón iótek a manaman.
17 Elias emén aramas ussun chék kich, nge atun a tinikken le iótek an esap púng rán, iwe ese púng rán lón ewe fénú ren úkúúkún úlúngát esopw ier.
18 Mwirin a pwal iótek sefál, iwe a púngútiw rán seni láng me a uwa ewe fénú.
19 Ámi pwii kana, iká emén me leimi a tokkoló seni ewe enlet, nge emén a eliwinisefáli,
20 oupwe silei pwe ena emén mi álisi an epwe likitaaló ekkewe féffér mi ngaw a féri, a seláni manawan me Kot epwe omusaaló an kewe tipis mi chómmóng.
Footnote
^ Are “ngúnúngúnúngawfengen.” Krik, “ngasellap.”
^ Are “feiéch.”
^ Are ese mwáál, “chón mélúlú.”
